പ്രളയം കൊണ്ടുപോയ പോയ സ്വപ്നങ്ങളെ തിരികെ പിടിക്കാനുള്ള നെട്ടോട്ടമാണ് ഇനി. നഷ്ടപ്പെടലിന്റെയും വേദനകളുടേയും കടലാഴങ്ങളില്‍ നിന്നും പ്രതീക്ഷയുടെ കര തേടിയുള്ള യാത്രയിലാണ് പലരും. കുത്തിയൊലിച്ചെത്തിയ വെള്ളത്തില്‍ പൊലിഞ്ഞു പോകുമായിരുന്ന ജീവനെ ചേര്‍ത്തു പിടിച്ചവര്‍ക്ക് അവര്‍ എന്ത് പകരം നല്‍കും. നന്ദി എന്ന വാക്കുകൊണ്ടല്ലാതെ ഏത് തുലാഭാരം കൊണ്ട് തൂക്കിയാലും ആ നന്ദിയും കടപ്പാടും തികഞ്ഞുവെന്ന് വരില്ല.

ദുരിതക്കയത്തില്‍ നിന്നും ജീവിതത്തിന്റെ മറുകര തേടിയവര്‍ ഹൃദയം കൊണ്ട് നന്ദി പറയുകയാണ്. സുരക്ഷാ മുനമ്പിലേക്ക് കൈപിടിച്ചു കയറ്റിയവര്‍ക്കായി കുറച്ച് ഹൃദയാക്ഷരങ്ങള്‍ കൊണ്ട് നന്ദി വാക്ക്.

രക്ഷാപ്രവര്‍ത്തകര്‍ക്ക് നന്ദി രേഖപ്പെടുത്തി, ടെറസ്സില്‍ 'താങ്ക്യൂ' എന്ന് വലിയ അക്ഷരത്തില്‍ രേഖപ്പെടുത്തിയിരിക്കുന്നു. വെളുത്ത പെയിന്റ് കൊണ്ടെഴുതിയ ആ വാക്കുകള്‍ കൊച്ചിയിലെ ഒരു വീട്ടില്‍ നിന്നുള്ളതാണ്. കാഴ്ച്ച മറയുന്നതു വരെയും കണ്ണെടുക്കാതെ കണ്ടിരിക്കാന്‍ തോന്നും, അത്രമേല്‍ ഹൃദ്യമാണ് ആ കാഴ്ച

സോഷ്യല്‍ മീഡിയയുടെ കണ്ണും മനസും ഉടക്കിയ ആ മനോഹര കാഴ്ച്ച നേവി വക്താവിന്റെ ഔദ്യോഗിക വക്താവിന്റെ ട്വിറ്റര്‍ പേജ് വഴിയാണ് പുറം ലോകം കണ്ടത്. ചുവന്ന തുണിയോ വെള്ളത്തുണിയോ സഹായം അഭ്യര്‍ത്ഥിച്ച് താഴെ നിന്നും ഉയരുന്നുണ്ടോ എന്ന് ഹെലികോപ്റ്ററിലിരുന്ന് സസൂക്ഷ്മം നിരീക്ഷിച്ചു കൊണ്ടിരിക്കുന്ന രക്ഷാപ്രവര്‍ത്തകരുടെ കണ്ണിന് കുളിര്‍മ സമ്മാനിക്കുകയാണ് ഇത്തരം കാഴ്ചകള്‍.