ലോക്‌സഭാ തിരഞെടുപ്പില്‍ ചാലക്കുടിയില്‍ സിനിമാ താരം ഇന്നസെന്റിന് എല്‍ഡിഎഫ് വീണ്ടും അവസരം നല്‍കുമെന്ന് റിപ്പോര്‍ട്ടുകള്‍ പുറത്തുവന്നതിന് പിറകെ രൂക്ഷ വിമര്‍ശനവുമായി സംവിധായകന്‍ ഡോ. ബിജു. നടി ആക്രമിക്കപ്പെട്ട വിഷയത്തില്‍ ഇന്നസെന്റ് എടുത്ത നിലപാടുകളെ വിമര്‍ശിച്ചാണ് ബിജു സ്താനാര്‍ത്ഥിത്വ റിപ്പോര്‍ട്ടുകളെ വിമര്‍ശിക്കുന്നത്. അക്കാലത്ത് ആ സംഘടനയുടെ പ്രസിഡന്റ്‌റ് കൂടിയായ ഒരു ഇടത് പക്ഷത്തെ എം പി സ്വീകരിച്ച നിലപാട് തീര്‍ത്തും പിന്തിരിപ്പനും കുറ്റാരോപിതന് പിന്തുണ നല്‍കുന്നതും ആയിരുന്നെന്നും അദ്ദേഹം പറയുന്നു.

ലിംഗ സമത്വം , സ്ത്രീ പക്ഷ കാഴ്ചപ്പാടുകള്‍ തുടങ്ങിയ ഇടങ്ങളില്‍ ഏറെ പ്രതീക്ഷകള്‍ നല്‍കുന്ന നിലപാടുകള്‍ ഉയര്‍ത്തിയത് ഇടത് പക്ഷമാണ് എന്ന് പറഞ്ഞുകൊണ്ടാണ് ഡോ. ബിജു പോസ്റ്റ് ആരംഭിക്കുന്നത്. എന്നാല്‍ അടുത്തിടെ നടി ആക്രമിക്കപ്പെട്ട വിഷയവുമായി ബന്ധപ്പെട്ട് കടുത്ത സ്ത്രീ വിരുദ്ധ നിലപാടുകള്‍ ആണ് മലയാള സിനിമാ താരങ്ങളുടെ സംഘടന ആയ എഎംഎംഎ പുലര്‍ത്തിയിരുന്നതെന്നും, ഇതിന്റെ സാരഥികളില്‍ ഒരാളെ വീണ്ടും സ്ഥാനാര്‍ത്ഥിയാക്കുന്നതിലൂടെ ഇടതുപക്ഷം സമൂഹത്തിന് എന്ത് സന്ദേശമാണ് നല്‍കുന്നതെന്നും അദ്ദേഹം ചോദിക്കുന്നു. ഇന്നസെന്റിനെ പേരെടുത്ത് പറയാതെയാണ് വിമര്‍ശനം.

പോസ്റ്റിന്റെ പൂര്‍ണരൂപം

സമകാലിക കേരളത്തില്‍ ഇടതു പക്ഷം ഏറെ പ്രതീക്ഷകള്‍ നല്‍കുന്നുണ്ട് ഒട്ടേറെ കാര്യങ്ങളില്‍. ലിംഗ സമത്വം , സ്ത്രീ പക്ഷ കാഴ്ചപ്പാടുകള്‍ തുടങ്ങിയ ഇടങ്ങളില്‍ വലിയ നിലപാടുകള്‍ തന്നെയാണ് ഇടത് പക്ഷം ഉയര്‍ത്തിയത്. മലയാള സിനിമയിലെ ഒരു നടി ആക്രമിക്കപ്പെട്ട വിഷയവുമായി ബന്ധപ്പെട്ട് കടുത്ത സ്ത്രീ വിരുദ്ധ നിലപാടുകള്‍ ആണ് മലയാള സിനിമാ താരങ്ങളുടെ സംഘടന ആയ എഎംഎംഎ പുലര്‍ത്തിയിരുന്നത്.

നടനും ആ സംഘടനയുടെ മുന്‍ പ്രസിഡന്റ്‌റ് കൂടിയായ ഒരു ഇടത് പക്ഷത്തെ എം പി ഈ വിഷയത്തില്‍ സ്വീകരിച്ച നിലപാട് തീര്‍ത്തും പിന്തിരിപ്പനും കുറ്റാരോപിതന് പിന്തുണ നല്‍കുന്നതും ആയിരുന്നു. ദേശീയ ശ്രദ്ധ നേടിയ ഈ വിഷയത്തില്‍ ഇടത് പക്ഷത്തെ പ്രതിനിധീകരിക്കുന്ന ഒരു ജനപ്രതിനിധി എന്നത് പോലും മറന്ന് കടുത്ത സ്ത്രീ വിരുദ്ധ നിലപാട് സ്വീകരിച്ച ഒരാളെ വീണ്ടും ഇടതു പക്ഷം സ്ഥാനാര്‍ഥി ആക്കുന്നത് പൊതു സമൂഹത്തിനു എന്തു സന്ദേശമാണ് നല്‍കുന്നത് എന്ന കാര്യത്തില്‍ തികഞ്ഞ അത്ഭുതം ഉണ്ട്....