ചൂട് മനുഷ്യനേയും മൃഗങ്ങളേയും ഒരുപോലെ ബാധിക്കുകയാണ്. അതിനാല്‍ തന്നെ പല ആനകളും ഇടയുന്നുണ്ട്. നിരവധി പേര്‍ മദമിളകിയ ആനയുടെ ആക്രമണത്തില്‍ അടുത്തിടെ മരിച്ചിരുന്നു. എന്നാല്‍ മദപ്പാടിളകുമ്പോഴും പാപ്പാനോടുള്ള ആനയുടെ സ്‌നേഹം കഥകളില്‍ മാത്രമള്ള ഇപ്പോഴുമുണ്ട്. അതിന് സമാനമായ സംഭവമാണ്അയ്യപ്പന്റെ നാടായ പന്തളത്ത് ഉണ്ടായത്.

അമ്പലത്തിലെ ഉത്സവ എഴുന്നള്ളിപ്പു കഴിഞ്ഞു തളയ്ക്കാന്‍ കൊണ്ടുവന്ന ആന വിരണ്ടോടി. സമീപമുണ്ടായിരുന്ന കാറും തട്ടയില്‍ ജ്യോതി ഭവനില്‍ യശോധരന്റെ വീടിന്റെ മതിലും തകര്‍ത്തു . ഇന്നലെ പുലര്‍ച്ചെ 4 മണിയോടെ നരിയാപുരത്തു നിന്നു തുമ്ബമണ്‍ മുട്ടം വരെ ആന വിരണ്ടോടി.തുടര്‍ന്ന് പന്തളം പത്തനംതിട്ട റോഡില്‍ എത്തി തുമ്പമണ്‍ വഴി രാവിലെ 7 മണിയോടെ മുട്ടം താഴത്ത് എത്തി റോഡിനു കുറുകെ നിലയുറപ്പിച്ചു.

ഓട്ടത്തിനിടെ കെഎസ്ആര്‍ടിസി ബസിലും വൈദ്യുതി തൂണിലും കുത്തി.വെണ്‍മണി കോയിപ്പുറത്ത് ഗോപാലകൃഷ്ണന്‍ നായരുടെ നീലകണ്ഠന്‍ എന്ന ആനയാണ് വിരണ്ടോടിയത്. ഇതോടെ ഈ റോഡിലെ ഗതാഗതം തടസപ്പെട്ടു. തുമ്ബമണ്ണിലേക്ക് വരുന്ന വഴി മൂന്ന് വൈദ്യുതി തൂണുകളും കുത്തിമറിക്കാന്‍ ശ്രമം നടത്തി.

ആനയ്‌ക്കൊപ്പം മേല്‍നോട്ടക്കാരനായ മുടിയൂര്‍ക്കോണം സ്വദേശി അഖിലും സഹായിയും മാത്രമേ ഉണ്ടായിരുന്നുള്ളു. ആന നാട്ടില്‍ ആളെ ബഹളമുണ്ടാക്കുന്ന ഘട്ടത്തിലാണ് മുന്‍ പാപ്പാന്‍ മനു ഇതറിയുന്നത്. മനു ഓടിയെത്തുമ്പോള്‍ കലിതുള്ളി നില്‍ക്കുന്ന കൊമ്പനേയാണ് കാണുന്നത്. സര്‍വവും ഇളക്കിമറിച്ച് നാട് തന്നെ മറിക്കുന്ന അവസ്ഥ. മനുവാകട്ടെ രണ്ടും കല്‍പ്പിച്ച് മുന്നില്‍ കയറി നിന്നു... ആന മനുവിന്റെ നേരെ തിരിഞ്ഞു. കുത്താനായി പായുന്ന ആന. മനു അലറി വിളിച്ചു... മോനെ നീലകണ്ഠാ അടങ്ങെടാ... എന്നെ കൊന്നിട്ട് പൊയ്‌ക്കോ.... മുന്‍പാപ്പാന്റെ സങ്കടം കണ്ടിട്ടോ എന്തോ പിന്നെ ആന ചലിച്ചില്ല. ദേഷ്യമെല്ലാം പൂഴിയിളക്കി തീര്‍ത്തു. ആന വഴങ്ങുന്നെന്ന് കണ്ട പാപ്പാന്‍ മനു ആനയെ സ്‌നേഹത്തോടെ അടുത്തുള്ള റബര്‍ തോട്ടത്തില്‍ തളച്ചു. തുടര്‍ന്ന് പഴവും ഓലയും കുടിക്കാന്‍ വെള്ളവും നല്‍കി. സമീപമുള്ള കിണറുകളില്‍ നിന്നു വെള്ളം കോരിയെത്തിച്ച് ശരീരം തണുപ്പിച്ചു. ഇതോടെ സ്‌നേഹ പ്രകടനമായി. ഇതെല്ലാം നാട്ടുകാര്‍ കൗതുകത്തോടെയാണ് കണ്ടത്.

കോട്ടയത്ത് കുളിപ്പിക്കാന്‍ കിടത്തുമ്പോള്‍ ആനയുടെ അടിയിലേക്കു തെന്നി വീണ് മരിച്ച പാപ്പാന്റെ കഥ എല്ലാവര്‍ക്കുമറിയാം. പാപ്പാന്‍ അരുണ്‍പണിക്കരുടെ മരണശേഷം അദ്ദേഹത്തിന്റെ ചെരിപ്പുകളിലൊന്നു തുമ്പിക്കൈയോടു ചേര്‍ത്തു പിടിക്കുന്ന ഭാരത് വിശ്വനാഥന്‍ എന്ന ആനയുടെ കാഴചയും കണ്ണീരുണര്‍ത്തുകയാണ്. ചെരിപ്പുകളിലൊന്ന് തുമ്പിക്കൈയില്‍ എടുത്ത ശേഷം കൊമ്പോടു ചേര്‍ത്തു പിടിച്ചു. താഴെപ്പോകുമ്പോള്‍ വീണ്ടും എടുത്തു തുമ്പിക്കൈയില്‍ വയ്ക്കും. ഇതിനിടെ പാപ്പാന്മാരില്‍ ഒരാള്‍ ചെരിപ്പെടുത്തു മാറ്റാന്‍ ശ്രമിച്ചെങ്കിലും ആന സമ്മതിച്ചില്ല. കണ്ടു നിന്നവരെ കരയിച്ച രംഗം കൂടിയായിരുന്നു ഇത്.

പാപ്പാന്‍ വീണത് അറിയാതെയാണ് ആന നിലത്തിരുന്നത്. കുളിപ്പിക്കുന്നതിനിടെ കിടക്കാന്‍ നിര്‍ദേശിച്ച് അരുണ്‍ വടികൊണ്ട് ആനയുടെ ദേഹത്ത് തട്ടി. ആന കിടക്കാന്‍ ശ്രമിക്കുന്നതിനിടെ സമീപം നിന്നിരുന്ന അരുണ്‍ കാലു തെന്നി ആനയുടെ അടിയിലേക്ക് വീഴുകയായിരുന്നു. പാപ്പാന്‍ വീണത് അറിയാതെ പിന്‍കാല്‍ മടക്കി കിടന്ന ആനയുടെ അടിയില്‍പെട്ട അരുണ്‍ തല്‍ക്ഷണം മരിച്ചു. പാപ്പാന്‍ അടിയില്‍പെട്ടതറിഞ്ഞ ആന പൂര്‍ണമായും കിടക്കാതെ മുന്‍കാലുകളില്‍ ഉയര്‍ന്നു നിന്നു. അങ്ങനെ ഒരിക്കലും തീരാത്തതാണ് ആനക്കഥ...