ശബരിമല പ്രക്ഷോഭ സമയത്ത് എല്ലാം മനസിലൊതുക്കി മിസോറാം ഗവര്‍ണറായി കഴിയുകയായിരുന്ന കുമ്മനം രാജശേഖരന്‍ എല്ലാം തുറന്നു പറയുകയാണ്. കേരളത്തിലേക്കുള്ള തിരിച്ച് വരവില്‍ ഉപാധികളില്ലെന്നാണ് കുമ്മനം രാജശേഖരന്‍ വ്യക്തമാക്കുന്നത്. മതസ്വാതന്ത്ര്യം എല്ലാവര്‍ക്കും ആവശ്യമാണ്. എന്നാല്‍ ശബരിമല വെറുമൊരു മതവിഷയമല്ല. ഭരണഘടനാപരമായ അവകാശം നേടിയെടുക്കാന്‍ ഒരു ജനത നടത്തിയ പോരാട്ടമാണ്. ജനപക്ഷത്ത് നിന്ന ഒരേയൊരു പാര്‍ട്ടി ബിജെപിയായിരുന്നുവെന്നും പറഞ്ഞു.

തുറന്ന മനസോടെയാണ് കേരളത്തിലേക്കുള്ള തന്റെ തിരിച്ച് വരവ്. സംഘടനയാണ് തീരുമാനിക്കേണ്ടത് ഞാന്‍ എന്ത് ചെയ്യണമെന്നത്. സംഘടന എന്ത് തീരുമാനിച്ചാലും അത് വഹിക്കാന്‍ ഞാന്‍ തയ്യാറാണ്. എന്റെ സേവനം ഞാന്‍ സംഘടനയ്ക്ക് വാഗ്ദാനം ചെയ്തിട്ടുണ്ട്. ഇത്ര നാളത്തെ പൊതു പ്രവര്‍ത്തനത്തില്‍ സംഘടനയ്ക്ക് വേണ്ടി ജീവിതം സമര്‍പ്പിച്ചിട്ടുള്ള ആളാണ് താനെന്നും കുമ്മനം രാജശേഖരന്‍ മാധ്യമങ്ങളോട് പറഞ്ഞു.

തെരഞ്ഞെടുപ്പ് സംബന്ധിച്ച് ഏത് ചുമതല ഏല്‍പിച്ചാലും അതു ചെയ്യുമെന്നും കുമ്മനം രാജശേഖരന്‍ വ്യക്തമാക്കി. സ്ഥാനാര്‍ത്ഥിയാവണമെന്ന് ഒരു നിര്‍ബന്ധവുമില്ലെന്നും കുമ്മനം പറഞ്ഞു. ഏല്‍പ്പിക്കുന്ന ഉത്തരവാദിത്തം അങ്ങേയറ്റം ഭംഗിയായി അച്ചടക്കത്തോടെ നിര്‍വ്വഹിക്കുമെന്നും കുമ്മനം വിശദമാക്കി. ഒരു പ്രതീക്ഷയും വച്ചല്ല കേരളത്തിലേക്ക് വരുന്നതെന്നും കുമ്മനം രാജശേഖരന്‍ പറഞ്ഞു.

ലോക്‌സഭാ തെരഞ്ഞെടുപ്പില്‍ ഇരുപത് മണ്ഡലങ്ങളിലും ബിജെപിക്ക് പ്രതീക്ഷയുണ്ട്. കേരളത്തില്‍ മാറ്റം ആഗ്രഹിക്കുന്ന ജനങ്ങള്‍ കൂടിവരികയാണെന്നും കുമ്മനം രാജശേഖരന്‍ പറഞ്ഞു. കേരളത്തിലെ തെരഞ്ഞെടുപ്പാണ് തന്റെ ലക്ഷ്യമെന്നും അല്ലാതെ പ്രത്യേകിച്ച് ഒരു മണ്ഡലമല്ല ലക്ഷ്യമെന്നും കുമ്മനം രാജശേഖരന്‍ പറഞ്ഞു.

മലയാളം പത്രം വായിക്കാന്‍ നിവര്‍ത്തിയില്ല, മിക്കവാറും നെറ്റ് ഡൗണായതിനാല്‍ കേരളത്തില്‍ സംഭവിക്കുന്ന കാര്യങ്ങള്‍ ഉടന്‍ തന്നെ അറിയാന്‍ മിസോറാമില്‍ ചെറിയ ബുദ്ധിമുട്ട് നേരിട്ടിരുന്നെങ്കിലും ഇവിടുത്തെ രാഷ്ട്രീയ സാഹചര്യത്തേക്കുറിച്ച് താന്‍ ബോധവാനാണെന്നും കുമ്മനം പറഞ്ഞു.