ഒടുവില്‍ ഇന്ത്യന്‍ ലോകസഭയിലേക്കുള്ള തിരഞ്ഞെടുപ്പ് ഔദ്യോഗികമായി പ്രഖ്യാപിച്ചു. ഏഴു ഘട്ടങ്ങളായാണ് ഇത്തവണ തിരഞ്ഞെടുപ്പ് പൂര്‍ത്തിയാകുന്നത്. 2019 ഏപ്രില്‍ 11 നു തുടങ്ങി മെയ് 19 ന് തിരഞ്ഞെടുപ്പ് അവസാനിക്കും. മൂന്നാം ഘട്ടത്തിലാണ് കേരളത്തില്‍ വോട്ടെടുപ്പ് നടക്കുന്നത് ഏപ്രില്‍ 23ന്. ഫലമറിയാന്‍ ഒരു മാസം മലയാളി കാത്തിരിക്കേണ്ടിവരും. മെയ് 23 ഉച്ചയാകുമ്പോഴേക്ക് വരുന്ന അഞ്ചുവര്‍ഷക്കാലം രാജ്യത്തെ ആരു നയിക്കുമെന്ന് അറിയാം.

മുഖ്യതിരഞ്ഞെടുപ്പ് കമ്മീഷണര്‍ സുനില്‍ അറോറ പൊതു തിരഞ്ഞെടുപ്പു പ്രഖ്യാപിച്ചതിനു പിന്നാലെ പ്രമുഖ നേതാക്കള്‍ തിരഞ്ഞെടുപ്പിനെ സ്വാഗതം ചെയ്തുകൊണ്ട് രംഗത്തുവന്നു. ഇനിയങ്ങോട്ട് ലോകത്തിലെ ഏറ്റവും വലിയ ജനാധിപത്യരാജ്യമായ ഭാരതം അതിന്റെ മഹാഉല്‍സവത്തിന്റെ ആഘോഷവേളകളില്‍ ആറാടുകയായിരിക്കും. ഇന്ത്യാമഹാരാജ്യത്തിന്റെ യഥാര്‍ത്ഥ ഭരണാധികാരികളായ പൊതുജനത്തിന്റെ മൂല്യം വാനോളം ഉയരുന്ന നാളുകളാണ് വരാന്‍ പോകുന്നത്.

70 വര്‍ഷമായി സാധ്യമാകാതിരുന്ന അടിസ്ഥാന ആവശ്യങ്ങള്‍ സാധ്യമാക്കുന്നതിനു വേണ്ടിയാണ് അഞ്ച് വര്‍ഷമായി ബി.ജെ.പി സര്‍ക്കാര്‍ പ്രവര്‍ത്തിച്ചതെന്നാണ് പ്രധാനമന്ത്രി നരേന്ദ്ര മോദി ഇന്ന് ട്വിറ്ററില്‍ കുറിച്ചത്. പൊതു തെരഞ്ഞെടുപ്പിനെ സ്വാഗതം ചെയ്തുകൊണ്ട് രംഗത്തുവന്നതാണ് അദ്ദേഹം.
ജനാധിപത്യത്തിന്റെ ഉത്സവമായ തിരഞ്ഞെടുപ്പുകള്‍ ഇതാ വന്നെത്തിയിരിക്കുന്നു. സജീവമായ പങ്കാളിത്തത്തിലൂടെ 2019 ലെ ലോക്‌സഭാ തെരഞ്ഞെടുപ്പിനെ സമ്പുഷ്ടമാക്കാന്‍ ഇന്ത്യക്കാരോട് അഭ്യര്‍ഥിക്കുന്നു. വരുന്ന തെരഞ്ഞെടുപ്പില്‍ കനത്ത പോളിങ് രേഖപ്പെടുത്തുമെന്നാണ് പ്രതീക്ഷ. ചരിത്രപരമായ ഫലം തന്നെ ഈ തെരഞ്ഞെടുപ്പില്‍ ഉണ്ടാകുമെന്നാണ് പ്രതീക്ഷിക്കുന്നത്. ആദ്യമായി വോട്ടു ചെയ്യുന്നവരെ പ്രധാനമന്ത്രി പ്രത്യേകം സ്വാഗതം ചെയ്യുകയും ചെയ്തു.

റെക്കോര്‍ഡ് പോളിങ് രേഖപ്പെടുത്താനാണ് ആദ്യമായി വോട്ടവകാശം രേഖപ്പെടുത്താന്‍ ഒരുങ്ങുന്നവരോട് പ്രധാനമന്ത്രിയുടെ ആഭ്യര്‍ത്ഥന. ബിജെപി സര്‍ക്കാരിന്റെ നേട്ടങ്ങളെ എടുത്തു പറഞ്ഞ അദ്ദേഹം ഈ സര്‍ക്കാരിനെ വീണ്ടും അധികാരത്തിലെത്തിക്കണമെന്ന് ജനങ്ങളോട് അഭ്യര്‍ത്ഥിച്ചു..

അതേസമയം, ബിജെപി സര്‍ക്കാരിനെ അധികാരത്തില്‍ നിന്ന് പുറത്താക്കാന്‍ ജനങ്ങളോട് ആഹ്വാനം ചെയ്തുകൊണ്ടാണ് ദല്‍ഹി മുഖ്യമന്ത്രി അരവിന്ദ് കെജ്‌രിവാള്‍ രംഗത്തുവന്നത്.

നമ്മുടെ ജനാധിപത്യത്തിന്റെ യഥാര്‍ത്ഥ ശക്തിയായ ജനങ്ങളിലേക്ക് കാര്യങ്ങള്‍ എത്തിയിരിക്കുകയാണ്. ഇന്ത്യയുടെ ചരിത്രത്തിലെ ഏറ്റവും വലിയ ഏകാധിപത്യ ഫെഡറല്‍ വിരുദ്ധ സര്‍ക്കാരിനെ പുറത്താക്കാന്‍ സമയമായി. നോട്ടുനിരോധനം, തൊഴിലവസരങ്ങള്‍, മതസൗഹാര്‍ദം ഇല്ലാതാക്കിയത് തുടങ്ങിയവയെ കുറിച്ച് ഉത്തരങ്ങള്‍ തേടാന്‍ സമയമായിരിക്കുകയാണ്. ഇതാണ് കെജ്‌രിവാളിന്റെ കുറിപ്പില്‍ വ്യക്തമായിക്കിയിരിക്കുന്നത്.

എന്‍.ഡി.എ സര്‍ക്കാരിനെ വീണ്ടും അധികാരത്തിലെത്തിക്കണമെന്ന പ്രധാനമന്ത്രി നരേന്ദ്രമോദിയുടെ അഭ്യര്‍ഥനക്ക് മറുപടിയുമായി ബി.എസ്.പി നേതാവ് മായാവതിയും രംഗത്തുവന്നിട്ടുണ്ട്..

ഇന്ത്യയിലെ സമാധാന പ്രിയരായ 130 കോടി ജനങ്ങള്‍ ഇതിനേക്കാള്‍ മികച്ച സര്‍ക്കാരിനെ അര്‍ഹിക്കുന്നുവെന്നാണ് മായാവതിയുടെ അഭിപ്രായം. പാവപ്പെട്ടവര്‍ക്കെതിരായ മോദി സര്‍ക്കാര്‍ ജനങ്ങളുടെ ശാന്തിയും സമാധാനവും തകര്‍ത്തുവെന്ന് അവര്‍ പറയുന്നു. അതിനാല്‍ പുതിയ സര്‍ക്കാര്‍ ഭരണഘടനയെ ഉയര്‍ത്തിപ്പിടിക്കുന്നതും ജനാധിപത്യ മൂല്യങ്ങളെ ബഹുമാനിക്കുന്നതും ആയിരിക്കണമെന്നാണ് മായാവതിയുടെ പക്ഷം.

മൊത്തത്തില്‍, തിരഞ്ഞെടുപ്പ് ചൂടിലേക്ക് രാജ്യം പ്രവേശിച്ചതിന്റെ പ്രതികരണങ്ങളാണ് നേതാക്കളില്‍ നിന്നു കേട്ടത്. ഇന്ത്യയിലാകമാനമെന്ന പോലെ കേരളത്തിലും വരും ദിനങ്ങളില്‍ ഈ ചൂട് കൂടും. തങ്ങളുടെ സ്ഥാനാര്‍ത്ഥികളെ മുഴുവന്‍ പ്രഖ്യാപിപിച്ച് തെരഞ്ഞെടുപ്പങ്കത്തില്‍ ഇപ്പോള്‍ ഒരടി മുമ്പില്‍ നില്‍ക്കുകയാണ് ഇടതുപക്ഷ മുന്നണി. തര്‍ക്കങ്ങള്‍ പരിഹരിച്ച് ഐക്യമുന്നണിയും ബിജെപിയും അധികം വൈകാതെ കളത്തിലറങ്ങുമെന്നു തന്നെയാണ് പ്രതീക്ഷ. അതോടെ ഗോദയില്‍ തീപാറാന്‍ തുടങ്ങും. നിശബ്ദരായി വിധി മനസ്സിലെഴുതി വോട്ടര്‍മാരും കാത്തിരിക്കുകയാണ്, എല്ലാവരും കാത്തരിക്കുന്ന ഏപ്രില്‍ 23 അടുത്തു വരുന്നതും കാത്ത്.