മാണിവിഭാഗം പോരിന് ; കേരള കോണ്ഗ്രസിന്റെ കോട്ടയം സീറ്റിലെ സ്ഥാനാര്ഥിയെ പാര്ട്ടി ചെയര്മാന് കെ.എം.മാണി ഇന്ന് പ്രഖ്യാപിക്കും
കേരള കോണ്ഗ്രസിന്റെ കോട്ടയം സീറ്റിലെ സ്ഥാനാര്ഥിയെ പാര്ട്ടി ചെയര്മാന് കെ.എം.മാണി ഇന്ന് പ്രഖ്യാപിക്കുമെന്നാണ് വാര്ത്തകള് . പി.ജെ. ജോസഫിനെ സ്ഥാനാര്ഥിയാക്കുന്നതിനെതിരെ മണ്ഡലത്തിലെ വലിയ വിഭാഗം നേതാക്കളും പ്രവര്ത്തകരും രംഗത്തെത്തിട്ടുണ്ട് സിറ്റിങ് എംഎല്എ മാരെ സ്ഥാനാര്ഥികളാക്കരുതെന്നും മണ്ഡലത്തില് നിന്നുള്ളവരെ സ്ഥാനാര്ഥിയാക്കണമെന്ന ആവശ്യവും ശക്തമായി. ജോസഫ് വിഭാഗം ആത്മവിശ്വാസത്തിലാണെങ്കിലും കോട്ടയത്തെ നേതാക്കളുടെ അഭിപ്രായം തേടാനുള്ള മാണിയുടെ ഈ തീരുമാനം പിജെയ്ക്ക് കുരുക്കാകും.
ജോസഫിനെ സ്ഥാനാര്ഥിയായി അംഗീകരിക്കാനാകില്ലെന്ന കടുത്ത നിലപാടിലാണ് കോട്ടയം മണ്ഡലത്തിലെ നേതാക്കളും അണികളും. പിജെയ്ക്ക് സീറ്റ് നല്കുന്നത് പാര്ട്ടി കാല്ക്കല് വെച്ച് കീഴടങ്ങുന്നതിന് തുല്യമാണെന്നാണ് നേതാക്കളുടെ നിലപാട്. പി.ജെ. ജോസഫിനെ സ്ഥാനാര്ഥിത്വത്തില് നിന്ന് അകറ്റി നിര്ത്താനുള്ള ശ്രമങ്ങളും ഇതോടെ മാണി വിഭാഗം ഊര്ജിതമാക്കി. നിര്ണായക തീരുമാനം പ്രഖ്യാപിക്കും മുന്പ് നിയോജക മണ്ഡലം ഭാരവാഹികളുടെ യോഗം കെ.എം. മാണി വിളിച്ചിട്ടുണ്ട്. പിജെയെ ഒഴിവാക്കാന് ഈ അവസരം പ്രയോജനപ്പെടുത്താനാണ് നീക്കം. നിയോജക മണ്ഡലം പ്രസിഡന്റുമാരെയും മണ്ഡലം പ്രസിഡന്റുമാരെയും വെവേറെ കണ്ട് സ്ഥാനാര്ഥി ആരെന്ന കാര്യത്തില് ഭൂരിപക്ഷം അഭിപ്രായം തേടുകയാണ് മാണിയുടെ ലക്ഷ്യം.എംഎല്എമാര് മത്സരിക്കരുതെന്ന് അഭിപ്രായം ഇതിനോടകം ഉയര്ന്നുകഴിഞ്ഞു. ഇതിന് പുറമെ മണ്ഡലത്തില് നിന്നുള്ള ഒരാളെ തന്നെ സ്ഥാനാര്ഥിയാക്കണമെന്നുമാണ് ആവശ്യം. ഇക്കാര്യങ്ങള് പാര്ട്ടി ചെയര്മാന് ഭാരവാഹികള് ഇന്ന് എഴുതി നല്കും. ഇതോടെ പിജെയെ ഒഴിവാക്കി മാണി ഗ്രൂപ്പില് നിന്ന് സ്ഥാനാര്ഥിയെ കണ്ടെത്താന് അവസരം ഒരുങ്ങും.
സ്റ്റീഫന് ജോര്ജ്, പ്രിന്സ് ലൂക്കോസ്, തോമസ് ചാഴിക്കാടന് എന്നിവരുടെ പേരുകളാണ് പരിഗണിക്കുന്നത്. ഞായറാഴ്ച നടന്ന പാര്ലമന്റെറി പാര്ട്ടി യോഗത്തിലും ജോസഫ് മത്സരിക്കാന് താല്പര്യമുണ്ടെന്ന് വ്യക്തമാക്കിയതായാണ് സൂചനകള്. കേരള കോണ്ഗ്രസിന് ഒരുസീറ്റ് മാത്രമേ നല്കാനാവൂയെന്ന കോണ്ഗ്രസ് തീരുമാനം അംഗീകരിക്കാന് ധാരണയായി എന്ന തരത്തിലാണ് വാര്ത്തകള് പരന്ന്.ഇതിനുശേഷം കഴിഞ്ഞ ദിവസം വൈകീട്ട് നടന്ന സ്റ്റിയറിങ് കമ്മിറ്റി യോഗത്തിലും ജോസഫ് ഇതേ ആവശ്യം തുറന്നുപറഞ്ഞു . കണ്ണൂരില്നിന്നുള്ള അംഗം ജോയി സെബാസ്റ്റിയന് ജനങ്ങള് ഏല്പിച്ച വിശ്വാസത്തില്നിന്ന് പിന്മാറി എം.എല്.എമാര് മത്സരിക്കുന്നത് ശരിയാണോയെന്ന ചോദ്യമുയര്ത്തി.വയനാട് ജില്ല പ്രസിഡന്റ് കെ.ജെ. ദേവസ്യയും പരോക്ഷമായി ജോസഫിന്റെ ആവശ്യത്തെ എതിര്ത്തു. മറ്റുചില അംഗങ്ങളും വിമര്ശനം ഉന്നയിച്ചതായാണ് വിവരം. ഇതോടെ, പാര്ട്ടി ഓഫിസ് ചുമതലയുള്ള ജനറല് സെക്രട്ടറി ജോയി എബ്രഹാം തീരുമാനം കെ.എം. മാണിക്ക് വിടണമെന്ന നിര്ദേശം മുന്നോട്ടുവെച്ചു. ഇത് കൈയടികളോടെ യോഗം പാസാക്കി. ഒരുമണിക്കൂര് നീണ്ട യോഗത്തില് 102 അംഗങ്ങളില് 98 പേരും പങ്കെടുത്തു. ഇതില് ഭൂരിഭാഗവും മാണി അനുകൂലികളാണ്. ഈ സാഹചര്യത്തിലാണ് ജോസഫിന്റെ സ്ഥാനാര്ഥി നിര്ണയം നീട്ടിയതെന്നും പറയപ്പെടുന്നു. പാര്ട്ടി ചെയര്മാന് കെ.എം. മാണി തീരുമാനം പറഞ്ഞുകഴിഞ്ഞതിനാല് കൂടുതലൊന്നും പറയാനില്ലെന്ന് സ്റ്റിയറിങ് കമ്മിറ്റി േയാഗത്തിനുശേഷം പുറത്തിറങ്ങിയ പി.ജെ. ജോസഫ് പറഞു. ജോസഫിനോട് മാധ്യമപ്രവര്ത്തകര് നിരവധി ചോദ്യങ്ങള് ഉന്നയിച്ചെങ്കിലും മറുപടിയുണ്ടായില്ല.
.
https://www.facebook.com/Malayalivartha
