ഗുണ്ടകള് പോലീസുദ്യോഗസ്ഥന്റെ വീട് ആക്രമിച്ചു, വര്ഷങ്ങളായി ഈ ഗുണ്ടാസംഘത്തിന്റെ ഭീഷണിയിലാണ് കഴിയുന്നതെന്ന് നാട്ടുകാര്
മാന്നാര് പോലീസ് സ്റ്റേഷനിലെ കണ്ട്രോള് റൂം വെഹിക്കിള് ഡ്രൈവറായ സൂരജിന്റെ മാവേലിക്കര, തെക്കേക്കര ചെറുകുന്നത്ത് വീട്ടില് ഗുണ്ടാ ആക്രമണം. തെക്കേക്കര ചെറുകുന്നം വടുതല പറമ്പില് കിഴക്കതില് വീട്ടിലാണ് ആക്രമണമുണ്ടായത്. ശനിയാഴ്ച വൈകുന്നേരം അഞ്ചരയ്ക്ക് സൂരജ് വീട്ടിലില്ലാതിരുന്നപ്പോഴാണ് സംഭവം. നിരവധി ക്രിമിനല് കേസുകളില് പ്രതികളായവരാണ് തന്റെ വീട് ആക്രമിച്ചതെന്നും എല്ലാവരെയും തനിക്കറിയാമെന്നും സൂരജ് പറഞ്ഞു.
വടിവാളും കമ്പി വടികളും ഉള്പ്പെടെയുള്ള മാരകായുധങ്ങള് കൊണ്ടുള്ള ആക്രമണം നടക്കുന്ന സമയം സൂരജിന്റെ ഭാര്യ കീര്ത്തിയും മൂന്നുവയസുള്ള മകളും, ഇളയ സഹോദരന്മാരായ സരൂജും സനൂപും പ്രായമായ അമ്മയുമാണ് വീട്ടിലുണ്ടായിരുന്നത്. അപകടത്തില് പരിക്കേറ്റ് വിശ്രമിക്കുകയായിരുന്ന സരൂജിനെ കാണാന് എത്തിയ സുഹൃത്ത് രാജീവ്, തിരികെ മടങ്ങുന്നതിനിടയില് അക്രമിസംഘം മാരകായുധങ്ങളുമായി ആക്രമിച്ചു.
പ്രാണരക്ഷാര്ഥം സൂരജിന്റെ വീട്ടിലേക്ക് തിരികെ ഓടിക്കയറിയ രാജീവിന്റെ പിന്നാലെ പാഞ്ഞെത്തിയ അക്രമി സംഘം സൂരജിന്റെ ഭാര്യയെയും അമ്മയെയും ആക്രമിക്കാന് ശ്രമിക്കുകയും വധഭീഷണി മുഴക്കുകയും ചെയ്തു. കാല്മുട്ടിന് പരിക്കേറ്റ് വിശ്രമിക്കുകയായിരുന്ന സൂരജിനെ (26) ചവിട്ടി താഴെയിട്ട് അപായപ്പെടുത്താന് ശ്രമിച്ചു.
വടിവാളുകൊണ്ടുള്ള ആക്രമണത്തില് നിന്നും തലനാരിഴയ്ക്കാണ് തന്റെ ജീവന് തിരിച്ചു കിട്ടിയതെന്ന് ജില്ലാ ആശുപത്രിയില് ചികിത്സയില് കഴിയുന്ന സൂരജ് പറഞ്ഞു. ആക്രമണത്തില് പരിക്കേറ്റ സൂരജിനെ ആശുപത്രിയിലെത്തിക്കാന് വന്ന സുഹൃത്തുക്കളെയും സംഘം ഭീഷണിപ്പെടുത്തി.
വര്ഷങ്ങളായി ഈ ഗുണ്ടാസംഘത്തിന്റെ ഭീഷണിയിലാണ് കഴിയുന്നതെന്ന് നാട്ടുകാര് പറയുന്നു. ഈ സംഘത്തിന്റെ വര്ഷങ്ങളായുള്ള സാമൂഹ്യ വിരുദ്ധ പ്രവര്ത്തനങ്ങളില് വലിയ പ്രതിഷേധമാണുയരുന്നത്.
https://www.facebook.com/Malayalivartha
