തലശേരിയില്‍ ടിഎന്‍ടി ചിട്ടി കമ്പനിയുടെ മറവില്‍ സംസ്ഥാനത്ത് 500 കോടി രൂപയുടെ തട്ടിപ്പ് നടത്തിയ സംഭവത്തില്‍ അന്വേഷണം ക്രൈംബ്രാഞ്ചിനെ ഏല്‍പ്പിച്ചു. ഇതിനിടയില്‍ കേസിലെ മുഖ്യപ്രതികളായ സഹോദരങ്ങള്‍ വിദേശത്തേക്ക് കടന്നതായ സൂചനയും ലഭിച്ചിട്ടുണ്ട്. പ്രതികള്‍ സ്വിറ്റ്‌സര്‍ലന്‍ഡിലേക്ക് കടന്നതായാണ് വിവരം ലഭിച്ചിട്ടുള്ളതെന്നും പ്രതികളെ പിടികൂടുന്നതിന് വേണ്ടി വന്നാല്‍ ഇന്റര്‍ പോളിന്റെ സഹായം തേടുമെന്നും ഉന്നത പോലീസ് ഉദ്യോഗസ്ഥര്‍ പറഞ്ഞു.

മുഖ്യമന്ത്രിയുടെ ഉത്തരവു പ്രകാരമാണ് അന്വേഷണം ക്രൈംബ്രാഞ്ച് ഏറ്റെടുത്തത്. തട്ടിപ്പിനിരയായ നൂറു കണക്കിനാളുകളുടെ പരാതിയാണ് ഇതിനകം പോലീസിന് ലഭിച്ചിട്ടുള്ളത്. കണ്ണൂര്‍ ജില്ലയില്‍ തട്ടിപ്പിനിരയായവര്‍ മുഖ്യമന്ത്രിയെ നേരിട്ട് കണ്ട് പരാതി നല്‍കുകയും ചെയ്തിരുന്നു.

ഇരിങ്ങാലക്കുട ആസ്ഥാനമായി പ്രവര്‍ത്തിച്ചിരുന്ന കമ്പനി കേരളത്തില്‍ 48 ശാഖകളിലൂടെയാണ് തട്ടിപ്പ് നടത്തിയിട്ടുള്ളത്. നിലവില്‍ എല്ലാ ശാഖകളും അടച്ചു പൂട്ടിയിരിക്കുകയാണ്. സ്ഥാപനത്തിന്റെ പേര് മാറ്റത്തിന് അണിയറയില്‍ നീക്കം നടക്കുന്നതിനിടയിലാണ് സ്ഥാപനം അടച്ചു പൂട്ടിയത്.

അതാത് പ്രദേശത്തെ വനിതാ ജീവനക്കാരെയാണ് എല്ലാ ശാഖകകളില്‍ നിന്നും പണം ശേഖരിക്കുന്നതിന് നിയമിച്ചിരുന്നത്. തലശേരിയില്‍ എട്ടു ബില്‍ കളക്ടര്‍മാരില്‍ ഏഴ് പേരും വനിതകളായിരുന്നു. 2012-ല്‍ അനുഗ്രഹ ചിറ്റ്‌സ് എന്ന പേരിലാണ് തലശേരിയില്‍ കമ്പനിയുടെ ശാഖ തുറന്നത്. പിന്നീട് ടിഎന്‍ടി ചിറ്റ്‌സ് എന്ന പേരു മാറ്റം നടത്തി. ഇപ്പോള്‍ ധനാഞ്ജല്‍ എന്ന പേര് സ്വീകരിക്കാന്‍ ഒരുങ്ങുന്നതിനിടയിലാണ് സ്ഥാപനം പൂട്ടി ഉടമകള്‍ മുങ്ങിയത്.

കണ്ണൂര്‍, വളപട്ടണം, കൂത്തുപറമ്പ് ,പയ്യന്നൂര്‍, ചെറുപുഴ, ആലക്കോട്, തലശേരി തുടങ്ങിയ ശാഖകള്‍ കേന്ദ്രീകരിച്ചാണ് കണ്ണൂര്‍ ജില്ലയില്‍ തട്ടിപ്പ് നടന്നത്. തലശേരിയിലും പരിസരത്തുമായി 700 പേര്‍ തട്ടിപ്പിനിരയായതായാണ് പോലീസിന് ലഭിച്ചിട്ടുള്ള സൂചന. ഇതിനകം ഇരുനൂറ് പേര്‍ പോലീസില്‍ പരാതി നല്‍കി കഴിഞ്ഞു.കേരളത്തില്‍ ആറായിരത്തിലധികം ആളുകള്‍ തട്ടിപ്പിനിരയായിട്ടുള്ളതായിട്ടാണ് റിപ്പോര്‍ട്ടുകള്‍ നല്‍കുന്ന സൂചന.

കണ്ണൂര്‍ ജില്ലയില്‍ നിന്നും 60 കോടി രൂപ തട്ടിയെടുത്തിട്ടുള്ളതായിട്ടാണ് പ്രാഥമിക അന്വേഷണത്തില്‍ വ്യക്തമായിട്ടുള്ളതെന്ന് പോലീസ് പറഞ്ഞു. തട്ടിപ്പിനിരയായ എരഞ്ഞോളി സുമിത് നിവാസില്‍ സുബിന്റെ പരാതി പ്രകാരമാണ് തലശേരിയില്‍ പോലീസ് കേസ് രജിസ്റ്റര്‍ ചെയ്തിട്ടുള്ളത്. ചിട്ടിക്കമ്പനി ഉടമകളായ നോര്‍ത്ത് പറവൂര്‍ കുഞ്ഞിക്കായി കുറുപ്പശേരി ടെല്‍സണ്‍ തോമസ് (44), സഹോദരന്‍ നെല്‍സണ്‍ തോമസ് (42) എന്നിവരെ പ്രതി ചേര്‍ത്തു കൊണ്ട് രജിസ്റ്റര്‍ ചെയ്ത കേസില്‍ 406,420 റെഡ് വിത്ത് 34 ഐ പി സി, എന്നീ വകുപ്പുകളാണ് ചുമത്തിയിട്ടുള്ളത്.