എന്തായിരുന്നു കഴിഞ്ഞ ചിത്തിര ആട്ട വിശേഷം മുതല്‍ മണ്ഡല മകരവിളക്ക് കാലം വരെ ശബരിമലയില്‍ സംഭവിച്ചത്. ഒരു വശത്ത് സര്‍ക്കാരും സിപിഎമ്മും കൂടി സുപ്രീം കോടതി വിധിയുടെ പേരുപറഞ്ഞ് യുവതികളെ ഒളിച്ച് കടത്താന്‍ പാടുപെട്ടു. ഇലവുങ്കല്‍, നിലയ്ക്കല്‍ മുതല്‍ സന്നിധാനം വരെ യുദ്ധ സമാനമായ അന്തരീക്ഷത്തില്‍ 15,000ത്തോളം പോലീസുകാരെയാണ് മാറി മാറി നിയോഗിച്ചത്. ഇതിനിടെ പോലീസിന്റെ അകമ്പടിയോടെ യുവതികളെ കയറ്റാനുള്ള ശ്രമങ്ങള്‍ പലതവണ നടന്നു. എന്നാല്‍ അതേനിലയില്‍ തന്നെ ഭക്തരും അതേറ്റെടുത്തപ്പോള്‍ നേരായ മാര്‍ഗത്തില്‍ സര്‍ക്കാരിന് യുവതികളെ ശബരിമലയില്‍ കയറ്റാനായില്ല. ബിന്ദുവിനേയും കനക ദുര്‍ഗയേയും രാത്രിയുടെ മറവില്‍ ശബരിമലയിലെത്തിച്ചത് ഏറെ പേരുദോഷമുണ്ടാക്കി. ഹര്‍ത്താല്‍ മാമാങ്കം പോലും കേരളത്തിലുണ്ടായി.

ഇതൊന്നും ജനങ്ങള്‍ മറക്കാത്ത അവസ്ഥയില്‍ ദേ തെരഞ്ഞെടുപ്പും എത്തി, ശബരിമല നടയും തുറന്നു. എന്നാല്‍ എല്ലാത്തവണത്തേയും പോലെ ഇത്തവണയും നട തുറന്നപ്പോള്‍ ശബരിമലയില്‍ നിരോധനാജ്ഞ പ്രതീക്ഷിച്ചതാണ്. എന്നാല്‍ ഈ സമയത്ത് ശബരിമലയെ തൊട്ടു കളിച്ചാല്‍ വലിയ വോട്ട് ബാങ്ക് നഷ്ടപ്പെടുമെന്ന് സിപിഎമ്മിനറിയാം. അതിനാല്‍ തന്നെ ശബരിമല ശാന്തമാക്കി നിര്‍ത്താനാണ് പോലീസിന് നല്‍കിയ നിര്‍ദേശം. മാത്രമല്ല യുവതികളെ കയറ്റാന്‍ കൂട്ടുനില്‍ക്കേണ്ടെന്നും നിര്‍ദേശം നല്‍കിക്കഴിഞ്ഞു. ഇനിയും യുവതികള്‍ കയറാന്‍ ശ്രമിച്ചാല്‍ അത് ബിജെപി വന്‍ നേട്ടമാകുമെന്നാണ് കണക്കാക്കുന്നത്. ചുരുക്കി പറഞ്ഞാല്‍ ശബരിമലയില്‍ സ്‌പെഷ്യല്‍ ഓഫറാണ്. തെരഞ്ഞെടുപ്പ് നടക്കുന്ന ഏപ്രില്‍ 23 വരെ ഈ ഓഫര്‍ തുടരും. എത്ര വേണോ ശരണം വിളിക്കാം ആരും എതിര്‍ത്തില്ല. ഒരു നിരോധനാജ്ഞയും ഉണ്ടാകില്ല. അതേസമയം എന്നും ഇങ്ങനെ തെരഞ്ഞെടുപ്പായിരുന്നെങ്കിലെന്ന് ജനങ്ങളും ചിന്തിച്ചു പോകുന്നു. എന്നാല്‍ എത്ര ശാന്തമായേനെ...

മീനമാസ പൂജകള്‍ക്കും ആറാട്ട് ഉത്സവത്തിനുമായി ശബരിമല ഇന്നലെയാണ് നട തുറന്നത്. തന്ത്രിയുടെയും മേല്‍ശാന്തിയുടെയും കാര്‍മികത്വത്തില്‍ തിങ്കളാഴ്ച വൈകുന്നേരം അഞ്ചു മണിയോടെയാണ് നട തുറന്നത്.

മാസപൂജയും ആറാട്ട് ഉത്സവവുമാണ് പത്തു ദിവസം നീണ്ടുനില്‍ക്കുന്ന ചടങ്ങുകള്‍. ഇന്ന് രാവിലെ ഏഴുമണിക്ക് ധര്‍മശാസ്താ ക്ഷേത്രത്തില്‍ കൊടിയുയര്‍ന്നു. 21ന് ആറാട്ടിനു ശേഷം ഉത്സവ പൂജകള്‍ക്ക് സമാപനം കുറിച്ച് നടയടയ്ക്കും. ശ്രീകോവിലിന്റെ സ്വര്‍ണം പൊതിഞ്ഞ പുതിയ വാതില്‍ സമര്‍പ്പണവും നടക്കും.

നിലവില്‍ ശബരിമലയില്‍ സംഘര്‍ഷ സാഹചര്യങ്ങളില്ലെന്നാണ് വിലയിരുത്തല്‍. മുന്നൂറോളം പോലീസുകരെ മാത്രമാണ് ശബരിമലയിലും നിലയ്ക്കലും പമ്പയിലുമായി സുരക്ഷയ്ക്ക് നിയോഗിച്ചിരിക്കുന്നത്. തീര്‍ഥാടകര്‍ക്കുള്ള നിയന്ത്രണവും നീക്കിയിട്ടുണ്ട്.

അതേസമയം ശബരിമല തെരഞ്ഞെടുപ്പ് വിഷയം ആക്കരുതെന്ന് തെരഞ്ഞെടുപ്പ് ഓഫീസര്‍ പറഞ്ഞതും വന്‍ വിവാദമായി. ഇതു പറയാന്‍ തെരഞ്ഞെടുപ്പ് കമ്മീഷന് അധികാരമില്ലെന്നാണ് ബിജെപി പറയുന്നത്.

തെരഞ്ഞെടുപ്പില്‍ ശബരിമല വിഷയം ഉയര്‍ത്തിക്കൊണ്ടുവരുമെന്നും ശബരിമലയുമായി ബന്ധപ്പെട്ട സര്‍ക്കാര്‍ നിലപാടുകള്‍ തെരഞ്ഞെടുപ്പില്‍ ചര്‍ച്ച ചെയ്യുമെന്നും കുമ്മനം രാജശേഖരനും കെ. സുരേന്ദ്രനും പറഞ്ഞു.

ദൈവം, മതം, ജാതി എന്നിവ പ്രചാരണവിഷയമാക്കുന്നത് തെരഞ്ഞെടുപ്പ് ചട്ടങ്ങളുടെ ലംഘനമാണ്. ഇങ്ങനെയുണ്ടായാല്‍ സ്ഥാനാര്‍ത്ഥിക്കെതിരെ കേസെടുക്കുമെന്നും കമ്മീഷണര്‍ അറിയിച്ചിരുന്നു.

സാമുദായിക ധ്രൂവീകരണം മുന്നില്‍കണ്ടുള്ള പ്രചാരണങ്ങള്‍ ചട്ടലംഘനമായി കണക്കാക്കുമെന്ന് സംസ്ഥാന തെരഞ്ഞെടുപ്പ് കമ്മീഷണര്‍ ടിക്കാറാം മീണ അറിയിച്ചിരുന്നു. ശബരിമല ഉള്‍പ്പെടെയുള്ള വിഷയങ്ങള്‍ തെരഞ്ഞെടുപ്പില്‍ പ്രചാരണായുധം ആക്കരുതെന്നും അദ്ദേഹം മുന്നറിയിപ്പ് നല്‍കി.