കേരളത്തില്‍ 14 മുതല്‍ 16 സീറ്റുകള്‍ നേടാന്‍ സാധ്യതയുണ്ടെന്നും പ്രചരണം ശക്തമാക്കണമെന്നും ഇടതു മുന്നണി കരുതുന്നു. വിവിധ മണ്ഡലങ്ങളില്‍ പാര്‍ട്ടി നടത്തിയ സര്‍വേയിലാണ് തീരുമാനം.

പിണറായി വിജയനും കോടിയേരി ബാലകൃഷണനും ഉള്‍പ്പെടെയുള്ള നേതാക്കള്‍ സജീവമായി രംഗത്തിറങ്ങണമെന്നും അതു വഴി വന്‍ വിജയം നേടുമെന്നും സി പി എം വിശ്വസിക്കുന്നു.

സംസ്ഥാനത്ത് യു ഡി എഫ് ജയിക്കുമെന്ന സര്‍വേ ഫലങ്ങള്‍ തകിടം മറിയുമോ എന്ന് ഭയന്നിരിക്കുകയാണ് കോണ്‍ഗ്രസ്. സ്ഥാനാര്‍ത്ഥികളെ പോലും തീരുമാനിക്കാനാകാതെ കിതയ്ക്കുകയാണ് കോണ്‍ഗ്രസ്. ഈ സാഹചര്യം മുതലെടുത്ത് പാര്‍ട്ടി സ്ഥാനാര്‍ത്ഥികളെ കൂട്ടത്തോടെ തോല്‍ക്കാമെന്ന കണക്കുകൂട്ടലിലാണ് സി പി എം.

കോണ്‍ഗ്രസിനുള്ളിലെ ഗ്രൂപ്പാണ് പ്രധാന വെല്ലുവിളിയായി തീര്‍ന്നിരിക്കുന്നത്. ചെന്നിത്തലയെ ഉമ്മന്‍ചാണ്ടിയും ഉമ്മന്‍ ചാണ്ടിയെ ചെന്നിത്തലയും പാരവയ്ക്കുന്നു. പരസ്പരം പാരവച്ചും പോരടിച്ചും നീങ്ങുന്ന നേതാക്കള്‍ പരസ്പരം തോല്‍പ്പിക്കുമോ എന്ന ഭയവും കോണ്‍ഗ്രസിലുണ്ട്

മുതിര്‍ന്ന നേതാക്കള്‍ മത്സരിക്കാനിറങ്ങാത്തത് വലിയ പ്രത്യാഘാതമാണ് സൃഷ്ടിച്ചിരിക്കുന്നത്. അത് സി പി എം സ്ഥാനാര്‍ത്ഥികളെ ഭയന്നിട്ടാണെന്ന പ്രചരണം ശക്തമാണ്. സിപിഎം പട്ടിക പുറത്തു വന്നതോടെ കോണ്‍ഗ്രസില്‍ ആത്മവിശ്വാസം കുറഞ്ഞു എന്ന പ്രതീതിയും വന്നു ചേര്‍ന്നു. അതിന് മറുപടി നല്‍കേണ്ടത് മുതിര്‍ന്ന നേതാക്കളെ രംഗത്തിറക്കിയാണ്. എന്നാല്‍ അതിനും കോണ്‍ഗ്രസ് തയ്യാറാകുന്നില്ല.

രാഹുല്‍ ഗാന്ധിയുടെ കാര്യങ്ങള്‍ കൈകാര്യം ചെയ്യാനുള്ള സാമര്‍ത്ഥ്യകുറവാണ് പ്രധാന കാരണം. രാഹുല്‍ പറഞ്ഞാല്‍ കെ.സി, വേണുഗോപാല്‍ പോലും കേള്‍ക്കില്ലെന്ന അവസ്ഥ നിലവിലുണ്ട്. ആലപ്പുഴയില്‍ ആരിഫിനെ നേരിടാന്‍ വേണു ഇറങ്ങണമെന്ന സംസ്ഥാന നേത്യത്വത്തിന്റെ ആവശ്യത്തെ തീര്‍ത്തും നിരാകരിച്ചിരിക്കുകയാണ് വേണുഗോപാല്‍. യുപിഎ മന്ത്രിസഭ അധികാരത്തിലെത്തിയാല്‍ രാജ്യസഭ വഴി മന്ത്രിയാകാമെന്ന് വേണുഗോപാല്‍ കരുതുന്നു. ഇല്ലെങ്കില്‍ കേരളത്തില്‍ മത്സരിച്ച് മുഖ്യമന്ത്രിയാവും.

ശബരിമല വിഷയം തണുത്തതോടെ കേരളത്തില്‍ രാഷ്ട്രീയ ട്രെന്റുകള്‍ മാറി മറിഞ്ഞു. ബിജെപിക്ക് പോലും ശബരിമലയെ ഉപയോഗിച്ച് ഗുണം നേടാമെന്ന പ്രതീക്ഷ കുറഞ്ഞിരിക്കുന്നു. അതിനിടെ ശബരിമല രാഷ്ട്രീയ വിഷയമാക്കരുതെന്ന തെരഞ്ഞടുപ്പ് കമ്മീഷന്റെ ഉത്തരവും രാഷീട്ടീയ പാര്‍ട്ടികള്‍ക്ക് തിരിച്ചടിയായി മാറിയിരിക്കുന്നു. കേരളത്തിലെ 14 മണ്ഡലങ്ങളിലും സി പി എം പ്രചരണം ആരംഭിച്ചു കഴിഞ്ഞു. കോണ്‍ഗ്രസാകട്ടെ സ്ഥാനാര്‍ത്ഥികളെ തീരുമാനിച്ചിട്ട് പോലുമില്ല.

കോണ്‍ഗ്രസിന്റെ കാര്യത്തില്‍ ലോക്‌സഭാ തെരഞ്ഞടുപ്പ് വാട്ടര്‍ലൂ ആകുമെന്നും റിപ്പോര്‍ട്ടുണ്ട്. അത് സംഭവിക്കാതിരിക്കണമെങ്കില്‍ നന്നേ വിയര്‍ക്കേണ്ടി വരും.