പ്രണയാഭ്യര്‍ത്ഥന നിരസിച്ച യുവതിയെ കൊല്ലാന്‍ ശ്രമിച്ച യുവാവ് അറസ്റ്റില്‍. പത്തനംതിട്ട തിരുവല്ലയിലാണ് നാടിനെ നടുക്കിയ സംഭവം അരങ്ങേറിയത്. സംഭവത്തില്‍ തിരുവല്ല കുമ്പനാട് സ്വദേശി അജിന്‍ റെജി മാത്യു എന്ന യുവാവിനെ പൊലിസ് അറസ്റ്റ് ചെയ്തു. നാട്ടുകാര്‍ ഓടിച്ചിട്ട് പിടികൂടിയ പ്രതിയെ പൊലീസില്‍ ഏല്‍പ്പിക്കുകയായിരുന്നു. ഗുരുതരമായി പൊള്ളലേറ്റ അയിരൂര്‍ സ്വദേശിനിയായ യുവതിയെ പുഷ്പഗിരി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. തിരുവല്ല ചിലങ്ക തീയറ്ററിന് സമീപത്തുവച്ചാണ് സംഭവം. ഇന്ന് രാവിലെ സ്വകാര്യ സ്ഥാപനത്തില്‍ പഠിക്കാനെത്തിയ യുവതിയെ തടഞ്ഞു നിര്‍ത്തിയ ശേഷം ശരീരത്തില്‍ പെട്രോള്‍ ഒഴിച്ച് തീകൊളുത്തുകയായിരുന്നു.

പെണ്‍കുട്ടിക്ക് പതിനെട്ട് വയസ് പ്രായമുണ്ട്. ബിഎസ്സിവിദ്യാര്‍ത്ഥിനിയാണ്. പ്ലസ് ടുവിന് പഠിക്കുമ്പോള്‍ മുതല്‍ അജിന്‍ റെജി മാത്യുവിന് പെണ്‍കുട്ടിയോട് പ്രണയമുണ്ടായിരുന്നെന്ന് വീട്ടുകാര്‍ പറയുന്നു. പെണ്‍കുട്ടിക്ക് പ്രണയമില്ലായിരുന്നു. ഇതേ തുടര്‍ന്ന് അജിന്‍ പലവട്ടം വിവാഹഭ്യര്‍ത്ഥന നടത്തിയെങ്കിലും പെണ്‍കുട്ടി വഴങ്ങിയില്ല. അതിന്റെ വൈരാഗ്യത്തിലാണ് ക്രൂരമായ പ്രതികാരം നടത്തിയത്. തിരുവല്ല റെയില്‍വേ സ്റ്റേഷനടുത്തുള്ള ചിലങ്ക ജംഗ്ഷനില്‍ നിന്ന അജിന്‍ പെണ്‍കുട്ടി ക്ലാസ്സിലേക്ക് പോകുന്ന വഴി തടഞ്ഞു നിര്‍ത്തി ആക്രമിക്കുകയായിരുന്നെന്ന് ദൃക്‌സാക്ഷികള്‍ പറഞ്ഞു. തടഞ്ഞ് നിര്‍ത്തിയപ്പോള്‍ പെണ്‍കുട്ടി കുതറിമാറാന്‍ ശ്രമിച്ചു. ഉടന്‍ കത്തികൊണ്ട് കുത്തി വീഴ്ത്തി. പെട്രോളൊഴിച്ച് തീ കൊളുത്തുകയായിരുന്നു.

പെണ്‍കുട്ടിയുടെ നിലവിളികേട്ട് ഓടിയെത്തിയ നാട്ടുകാര്‍ വെള്ളമൊഴിച്ച് തീയണച്ച ശേഷം പുഷ്പഗിരി മെഡിക്കല്‍ കോളജില്‍ എത്തിച്ചു. ശരീരത്തില്‍ അറുപത് ശതമാനത്തോളം പൊള്ളലേറ്റ പെണ്‍കുട്ടിയുടെ ആരോഗ്യനില അതീവ ഗുരുതരമാണെന്ന് ഡോക്ടര്‍മാര്‍ അറിയിച്ചു. പെണ്‍കുട്ടിയുടെ മാതാപിതാക്കളും ബന്ധുക്കളും സംഭവമറിഞ്ഞ് ആശുപത്രിയില്‍ എത്തിയിട്ടുണ്ട്. മുടിയിലും മുഖത്തും ഭാഗികമായി പൊള്ളലേറ്റു. അജിന്‍ സ്ഥിരമായി ശല്യപ്പെടുത്താറുള്ള കാര്യം പെണ്‍കുട്ടി പറഞ്ഞിരുന്നില്ലെന്ന് ബന്ധുകള്‍ പറഞ്ഞു. കഴിഞ്ഞ നാല് ദിവസമായി പെണ്‍കുട്ടിയുടെ മൊബൈല്‍ ഓഫായിരുന്നു. സംഭവം ഗൗരവത്തോടെയാണ് പൊലീസ് എടുത്തിരിക്കുന്നത്. വിശദമായ അന്വേഷണം നടത്തിയ ശേഷമേ കൂടുതല്‍ കാര്യങ്ങള്‍ വ്യക്തമാക്കാനാകൂ എന്നും പൊലീസ് പറഞ്ഞു.

പ്രതിയെ വിശദമായി ചോദ്യം ചെയ്്ത ശേഷമേ കൂടുതല്‍ വിവരങ്ങള്‍ പറയാനാകൂ. ഇരുവര്‍ക്കുമൊപ്പം പ്ലസ്ടുവിന് പഠിച്ച സഹപാഠികളുടെ വിവരങ്ങള്‍ പൊലീസ് അന്വേഷിക്കുന്നുണ്ട്്. അവരെ ചോദ്യം ചെയ്യാന്‍ വിളിച്ചുവരുത്തും. അതുപോലെ അധ്യാപകരുമായും ആശയവിനിമയം നടത്തും. പെണ്‍കുട്ടി എന്തുകൊണ്ട് വീട്ടുകാരില്‍ നിന്ന് ഇക്കാര്യം മറച്ചുവെച്ചു എന്ന് അവരുടെ മൊഴിയെടുത്ത ശേഷമേ വ്യക്തമാകൂ. മുമ്പ് അജിന്‍ ഭീഷണിപ്പെടുത്തിയിരുന്നോ എന്നതടക്കമുള്ള കാര്യങ്ങള്‍ പെണ്‍കുട്ടിയില്‍ നിന്നേ മനസിലാക്കാനാകൂ. അജിന് മറ്റെന്തെങ്കിലും തരത്തിലുള്ള പ്രശ്‌നങ്ങളുണ്ടോ എന്നും പൊലീസ് അന്വേഷിക്കുന്നുണ്ട്.