പെണ്കുട്ടിയെ അര്ധരാത്രി നടുറോഡില് ഇറക്കിവിട്ട ബസ് ജീവനക്കാരോട് വിജിലന്സ് എക്സിക്യൂട്ടീവ് ഡയറക്ടര് വിശദീകരണം തേടും
ജോലി കഴിഞ്ഞ് താമസസ്ഥലത്തേക്കു മടങ്ങുകയായിരുന്ന യുവതിയെ അര്ധരാത്രി നടുറോഡില് ഇറക്കിവിട്ട സൂപ്പര് ഫാസ്റ്റ് ബസിലെ ജീവനക്കാര്ക്കെതിരേ കെഎസ്ആര്ടിസി വിജിലന്സ് വിഭാഗം അന്വേഷണം തുടങ്ങി.പെണ്കുട്ടിയുടെ പരാതിയെത്തുടര്ന്നാണ് അന്വേഷണം പ്രഖ്യാപിച്ചത്.
പെരുമ്പാവൂര് വിജിലന്സ് സ്ക്വാഡിലെ ഇന്സ്പെക്ടര് പി. രാജീവിന്റെ നേതൃത്വത്തില് ഇന്നലെ പെണ്കുട്ടിയുടെ മൊഴിയെടുത്തു. ഇന്സ്പെക്ടറുടെ റിപ്പോര്ട്ടിന്റെ അടിസ്ഥാനത്തില് ബസ് കണ്ടക്ടറോടും ബസ് ഡ്രൈവറോടും വിജിലന്സ് എക്സിക്യൂട്ടീവ് ഡയറക്ടര് വിശദീകരണം തേടും. അതിനുശേഷമാണ് നടപടിയുണ്ടാവുക.
വിമാനത്താവളത്തിനടുത്ത് അത്താണിയിലെ ഹോട്ടല് ജീവനക്കാരിയായ പെണ്കുട്ടിക്കാണ് ദുരനുഭവമുണ്ടായത്. അത്താണിയില്നിന്ന് ആലുവയ്ക്കുള്ള സൂപ്പര്ഫാസ്റ്റ് ബസില് രാത്രി 10-ഓടെയാണ് യുവതി കയറിയത്. രാത്രിയായാല്, ബൈപാസിലൂടെ പോകുന്ന ബസുകള് ബസ് സ്റ്റാന്ഡില് കയറിപ്പോകണമെന്ന് നിയമമുണ്ട്.ഇതനുസരിച്ച് നഗരത്തിലേക്കു കയറുമ്പോള് ആലുവ ബാങ്ക് കവലയില് ഇറക്കണമെന്ന് ആവശ്യപ്പെട്ടിരുന്നു.
എന്നാല് ബാങ്ക് കവല എത്തിയിട്ടും ബസ് നിര്ത്തിയില്ല. തുടര്ന്ന് പെണ്കുട്ടി ബെല്ലടിച്ചു. കുപിതനായി കണ്ടക്ടര് ഡബിള് ബെല്ലടിക്കുകയും ബസ് സ്റ്റാന്ഡിനടുത്ത് വൈദ്യുതിയില്ലാത്ത ഭാഗത്ത്, റോഡില് പെണ്കുട്ടിയെ ഇറക്കിവിടുകയുമായിരുന്നു.
https://www.facebook.com/Malayalivartha
