പാലക്കാടിനടുത്ത് കാര്‍ തട്ടിയെടുത്ത് 20 ലക്ഷം തട്ടിയെടുത്ത സംഭവത്തില്‍ ഒരാള്‍ കൂടി അറസ്റ്റില്‍. ഒലവക്കോട് പുതിയ പാലത്ത് കഴിഞ്ഞ വര്‍ഷം കാര്‍ തട്ടിക്കൊണ്ടുപോയി 20 ലക്ഷം രൂപ കൊള്ളയടിച്ച സംഭവത്തിലാണ് പ്രതി അറസ്റ്റിലായത്. തൃശൂര്‍, വരന്തിരിപ്പളളി , വേലുപ്പാടം , മംഗാട്ടുശ്ശേരി വീട്ടില്‍ സജീവ് എന്ന അടപ്പക്കണ്ണന്‍ (39) നെയാണ് പ്രത്യേക അന്വേഷണ സംഘം തൃശൂരില്‍ നിന്നും കസ്റ്റഡിയിലെടുത്തത്. കഴിഞ്ഞ വര്‍ഷമാണ് കാര്‍ തട്ടിക്കൊട്ടുപോയി പണം തട്ടിയെടുത്തത്.

പെരിന്തല്‍മണ്ണ, സ്വദേശി ഉമ്മറുല്‍ ഫാറൂഖിനെ കാര്‍ തടഞ്ഞു നിര്‍ത്തി മര്‍ദ്ദിച്ച് കൊള്ളസംഘം തട്ടിക്കൊണ്ടുപോയി പണം കവര്‍ച്ച ചെയ്ത ശേഷം റോഡിലിറക്കി വിടുകയായിരുന്നു. പിന്നീട് കാര്‍ കുഴല്‍മന്ദത്തിനടുത്ത് ഉപേക്ഷിച്ചു.

പാലക്കാട് ഡിവൈഎസ്പി . ജി.ഡി . വിജയകുമാറിന്റെ നേതൃത്വത്തിലാണ് കേസ്സന്വേഷണം നടന്നു വരുന്നത്. ഇതോടെ ഈ കേസ്സില്‍ അറസ്റ്റിലായവരുടെ എണ്ണം ആറായി.

നേരത്തെ എറണാകുളം, പറവൂര്‍ സ്വദേശി സ്വരൂപ്, വടക്കഞ്ചേരി സ്വദേശി ഷിജു, വരന്തിരിപ്പള്ളി സ്വദേശികളായ സിജോ, മുകേഷ്, നിതീഷ് എന്നിവരെ അന്വേഷണ സംഘം അറസ്റ്റു ചെയ്തിരുന്നു. സജീവിന് നേരത്തെ വരന്തിരിപ്പളളി പോലീസ് സ്റ്റേഷനില്‍ വാഹനത്തട്ടിപ്പ് കേസ്സ് നിലവിലുണ്ട്. പ്രതി ഇത്രയും നാള്‍ ഒളിവില്‍ കഴിഞ്ഞു വരികയായിരുന്നു.

രഹസ്യവിവരത്തിന്റെ അടിസ്ഥാനത്തിലാണ് പ്രതിയെ പിടികൂടിയത്. ഇനിയും കൂടുതല്‍ പ്രതികള്‍ ഈ കേസ്സില്‍ പിടിയിലാവാനുണ്ട്.

എ എസ് ഐ സതീഷ് കുമാര്‍,എസ് സി പിഓ രാമസ്വാമി, സി പി ഓ ബാബു ,ക്രൈം സ്‌ക്വാഡ് അംഗങ്ങളായ ആര്‍ . കിഷോര്‍, കെ . അഹമ്മദ് കബീര്‍, ആര്‍. വിനീഷ്, ആര്‍. രാജീദ് എന്നിവരടങ്ങിയ സംഘമാണ് കേസ്സന്വേഷണം നടത്തുന്നത്.