പാലക്കാട് നിന്ന് തിരുനല്‍വേലി വരെ പോകുന്ന പാലരുവി എക്‌സ്പ്രസിന് ചാലക്കുടിയില്‍ സ്റ്റോപ്പ് അനുവദിക്കണമെന്ന ആവശ്യം ശക്തമാകുന്നു. നേരത്തെ ശബരിമല സീസണില്‍ പാലരുവിക്ക് ചാലക്കുടിയില്‍ സ്റ്റോപ്പ് അനുവദിച്ചിരുന്നുവെങ്കിലും ജനുവരി 20-നു ശേഷം പാലരുവിക്ക് ചാലക്കുടിയില്‍ സ്റ്റോപ്പില്ല.

2018 ഡിസംബര്‍ 22 മുതലാണ് സ്റ്റോപ്പുണ്ടായിരുന്നത്. ചാലക്കുടിയില്‍ നിന്ന് ആലുവ, എറണാകുളം ഭാഗത്തേക്ക് പോകുന്ന വിദ്യാര്‍ത്ഥികള്‍ക്കും വീട്ടമ്മമാര്‍ക്കുമെല്ലാം നേരം ഇരുട്ടും മുമ്പ് ആലുവയിലും എറണാകുളത്തുമെത്താന്‍ ഈ ട്രെയിന്‍ ഏറെ സഹായകമായിരുന്നു.

പാലക്കാട് നിന്ന് വൈകീട്ട് നാലിന് യാത്ര പുറപ്പെടുന്ന പാലരുവി തൃശൂരില്‍ വൈകീട്ട് 5.22-നാണ് എത്തുന്നത്. തൃശൂര്‍ വിട്ടാല്‍ പിന്നെ ഇപ്പോള്‍ ഈ ട്രെയിനിന് സ്റ്റോപ്പ് ആലുവയിലാണുള്ളത്. തൃശൂര്‍ ഭാഗത്ത് നിന്ന് മൂന്നുമണി കഴിഞ്ഞാല്‍ വൈകീട്ട് ആറിന് ശേഷമാണ് ചാലക്കുടിയില്‍ സ്റ്റോപ്പുള്ള ട്രെയിനുള്ളതെന്ന് ചാലക്കുടി റെയില്‍വേ പാസഞ്ചേഴ്‌സ് അസോസിയേഷന്‍ സെക്രട്ടറി മാത്യു തോട്ടത്തില്‍ പറഞ്ഞു.

ചാലക്കുടിയില്‍ വൈകീട്ട് 6.40-ന് എത്തേണ്ട പാസഞ്ചര്‍ ട്രെയിന്‍ മിക്കദിവസവും 25 മിനിറ്റില്‍ കൂടുതല്‍ വൈകാറുണ്ടെന്നും ഇവര്‍ പരാതിപ്പെടുന്നു. പാലരുവിക്ക് ശബരിമല സീസണില്‍ താല്‍ക്കാലികമായി അനുവദിച്ച സ്റ്റോപ്പുകള്‍ എല്ലാം തന്നെ പുന:സ്ഥാപിക്കുകയാണെങ്കില്‍ യാത്രക്കാര്‍ക്ക് അതേറെ സഹായകമാകുമെന്നും തൃശൂര്‍-എറണാകുളം റൂട്ടിലെ സ്ഥിരം യാത്രക്കാര്‍ പറയുന്നു.

തൃശൂരില്‍ നിന്ന് വൈകീട്ട് 5.25-ന് പുറപ്പെട്ട് ചാലക്കുടിയില്‍ 5.55-നാണ് പാലരുവി എത്തുന്നത്. പാലരുവി എക്‌സ്പ്രസിന്റെ സ്റ്റോപ്പ് പുന:സ്ഥാപിക്കണമെന്നാവശ്യപ്പെട്ട് ചാലക്കുടി പാസഞ്ചേഴ്‌സ് അസോസിയേഷന്‍ റെയില്‍വേ മന്ത്രി പിയൂഷ് ഗോയലിന് നിവേദനം നല്‍കിയിട്ടുണ്ട്.