സ്‌നേഹം കൊണ്ട് കൊല്ലുന്നവരും കൊല്ലപ്പെടുന്നവരുടേയും എണ്ണം കൂടി വരികയാണ്. കേരളത്തില്‍ ഓരോ വര്‍ഷവും സ്‌നേഹവും ആയി ബന്ധപ്പെട്ട കൊലപാതകങ്ങള്‍ നടക്കുന്നു. നമ്മെ നടുക്കുന്ന സംഭവങ്ങള്‍ എല്ലാ വര്‍ഷവും ഉണ്ടാകുന്നു എന്നത് ഗൗരവമുളളതാണ്. സ്‌നേഹിച്ച പെണ്‍കുട്ടിയെ കല്യാണം കഴിച്ചതുകൊണ്ട് കൊല്ലപ്പെട്ട കെവിനും സ്‌നേഹിച്ചിരുന്ന പെണ്‍കുട്ടിയെ പെട്രോളൊഴിച്ചു കൊലപ്പെടുത്തിയ ആദര്‍ശും നമ്മുടെ നാട്ടില്‍ തന്നെ. 

എറണാകുളത്ത് മുന്‍ കാമുകിയെ കാണാന്‍ രാത്രിയില്‍ എത്തിയ ആളെ പെണ്‍കുട്ടിയുടെ ഭര്‍ത്താവും ബന്ധുക്കളും കൂടി കൊലപ്പെടുത്തിയത് മറ്റൊരു ഉദാഹരണം. സ്‌നേഹിച്ചിരുന്ന പെണ്‍കുട്ടിയെ കുത്തി വീഴ്ത്തി പെട്രോളൊഴിച്ചു കത്തിക്കാന്‍ ശ്രമിച്ചത് അടുത്തത്. നോ പറയേണ്ടിടത്ത് നോ ആണെന്ന് പറയാനും മനസിലാക്കാനും നമ്മുടെ കുട്ടികളെ ശീലിപ്പിക്കണം. പഠിപ്പിക്കണം. അതില്ലാത്തത് കൊണ്ടാണ് നോ യുടെ പുറകെ പെട്രോളും ആയി പലരും പോകുന്നത്. ഇത് അവസാനിപ്പിച്ചേ തീരു. ഇഷ്ടം എന്നത് ആളുകളെ സ്വകാര്യമാണ്. ആര്‍ക്ക് ആരോട് എപ്പോള്‍ ഇഷ്ടം തോന്നുമെന്ന് പറയാന്‍ പറ്റില്ല. അങ്ങനെ രണ്ടു പേര്‍ തമ്മില്‍ ഇഷ്ടം ആന്നെന്ന് കണ്ടാല്‍ അതിന്റെ നടുക്ക് കയറി നില്‍ക്കാന്‍ മറ്റാര്‍ക്കും, മാതാപിതാക്കള്‍ക്കെന്നല്ല ഭര്‍ത്താവിന് പോലും, നിയമപരമായി ഒരു അവകാശവും ഇല്ല എന്നിപ്പോള്‍ സുപ്രീം കോടതി തന്നെ പറഞ്ഞിട്ടുണ്ട്. അങ്ങനെ കയറി നില്‍ക്കുന്നത് അപകടത്തിലേക്കേ പോകൂ എന്നതാണ് ഉദാഹരണങ്ങള്‍ നമ്മെ പഠിപ്പിക്കുന്നതും പഠിപ്പിക്കേണ്ടതുമെന്നാണ് ഈ വിഷയങ്ങളില്‍ പലരുടേയും പ്രതികരണം. അതായാത് സ്‌നേഹത്തെ പകയുമായി കൂട്ടിക്കുഴച്ചാല്‍ അതിന്റെ ഭവിഷ്യത്ത് വളരെ വലുതാണെന്ന് അടുത്ത കാലത്ത് നടന്ന സംഭവങ്ങള്‍ തെളിയിക്കുന്നു. സ്‌നേഹത്തിന്റെ പേരില്‍ ചോര വീഴുന്നത് ഒട്ടും ശരിയല്ല.