പ്രളയത്തില്പ്പെട്ട മലയാളികളെ സഹായിക്കാന് ഇളയ ദളപതി വിജയ്; ഫാൻസ് അസ്സോസിയേഷന് നിർദേശം നൽകി
പ്രളയത്തില്പ്പെട്ട മലയാളികളെ സഹായിക്കാന് തന്റെ ആരാധകര്ക്ക് നിര്ദ്ദേശം നല്കിയിരിക്കുകയാണ് തമിഴ് സൂപ്പര് താരം വിജയ്. കേരളത്തിലെ തന്റെ ഫാന്സ് അസോസിയേഷന് വഴിയാണ് വിജയ് സഹായങ്ങള് എത്തിക്കുന്നത്. ജീവകാരുണ്യ പ്രവര്ത്തനങ്ങളില് ഇന്ന് രാജ്യത്ത് തന്നെ മുന് നിരയില് നിന്നു പ്രവര്ത്തിക്കുന്ന സംഘടനയാണ് വിജയ് ഫാന്സ് അസോസിയേഷന്. പതിനായിരക്കണക്കിന് പേര്ക്കാണ് ഇതിനകം തന്നെ സഹായം നൽകിയിരിക്കുന്നത്. സ്വന്തമായി കൊടിയുള്ള രാജ്യത്തെ ഏക ഫാന്സ് അസോസിയേഷൻ വിജയ് ഫാന്സ് അസോസിയേഷനാണ്. കഴിഞ്ഞ പ്രളയകാലത്ത് കോടിക്കണക്കിന് രൂപയുടെ സാധനങ്ങൾ വിജയ് ഫാന്സ് ദുരിത ബാധിതര്ക്കായി നല്കിയിരുന്നു. സഹായം പണമായല്ല, സാധനങ്ങളായി നേരിട്ട് നല്കിയ ആ നടപടി ഏറെ ശ്രദ്ധ പിടിച്ചു പറ്റിയിരുന്നു. 15 ലോറികളിലായി പതിനായിരം കിലോ അരി ഉള്പ്പെടെയുള്ള സാധനങ്ങളുമായി പുറപ്പെട്ട വാഹനങ്ങളെ കേരളം ഇരുകയ്യും നീട്ടിയാണ് സ്വീകരിച്ചിരുന്നത്.
ഇതുപോലെ പരമാവധി സഹായങ്ങള് രണ്ടാം പ്രളയത്തിലും ചെയ്യാനാണ് വിജയ് ഫാന്സിന്റെ തീരുമാനം. വിജയ് തന്നെ നേരിട്ടാണ് ഇക്കാര്യത്തില് ഇടപെട്ട് നിര്ദ്ദേശം നല്കിയത്. പ്രളയബാധിത മേഖലയിലേക്ക് കൊല്ലത്തെ വിജയ് ഫാന്സുകാരാണ് ആദ്യമായി സഹായഹസ്തവുമായി രംഗത്തു വന്നിരിക്കുന്നത്. വിജയ്യുടെ മരണപ്പെട്ട സഹോദരി വിദ്യയുടെ പേരില് തുടങ്ങിയ വിദ്യാ അസോസിയേഷന് പ്രവര്ത്തകരാണ് ദുരിതമനുഭവിക്കുന്നവരെ സഹായിക്കാന് ഭക്ഷ്യസാധനങ്ങളും ബോട്ടുമായി പ്രളയബാധിത പ്രദേശത്ത് വോളന്റിയര്മാരായി പ്രവർത്തിക്കുന്നത്.
https://www.facebook.com/Malayalivartha
