കേരള പബ്ളിക് സർവീസ് കമ്മീഷൻ പ്രസിദ്ധികരിച്ച പോലീസ് കോൺസ്റ്റബിൾ റാങ്ക് പട്ടികയിൽ ഉൾപ്പെട്ട 10940 ഓളം വരുന്ന ഉദ്യോഗാർത്ഥികൾ പി എസ് സിക്ക് കത്തയച്ചു. പട്ടികയിൽ ഉൾപ്പെട്ട ഉദ്യോഗാർത്ഥികളുടെ ആശങ്ക ദുരീക്കരിക്കണമെന്ന് അറിയിച്ചാണ് കത്തെഴുതിയിരിക്കുന്നത്. നിയമനം വൈകിക്കുന്നത് ഉദ്യോഗാർത്ഥികളോടും അവരുടെ കുടുംബത്തോടും ഉള്ള നീതി നിഷേധം ആണ് എന്ന്  കത്തിൽ പറയുന്നു. കത്തിന്റെ പൂർണ രൂപം വായിക്കാം.

സർ

ഞങ്ങൾ കേരള പബ്ളിക് സർവീസ് കമ്മീഷൻ 01-07-2019 ൽ പ്രസിദ്ധികരിച്ച പോലീസ് കോൺസ്റ്റബിൾ റാങ്ക് പട്ടികയിൽ ഉൾപ്പെട്ട 10940 ഓളം വരുന്ന ഉദ്യോഗാർത്ഥികളാണ്.

കേരളത്തിലെ ലക്ഷ കണക്കിന് യുവാക്കളുടെ സർക്കാർ സർവീസിലേയ്ക്കുള്ള തൊഴിൽ ദാതാവായ കേരള പബ്ളിക് സർവീസ് കമ്മീഷൻ 30-12-2017 ലെ ഗസ്റ്റ്, കാറ്റഗറി നമ്പർ 657/ 2017 നോട്ടിഫിക്കേഷൻ പ്രകാരം കേരളം പോലീസിലെ 7 ബറ്റാലിയനിലെ പോലീസ് കോൺസ്റ്റബിൾ തസ്തികയിലെ പ്രകാരം ഒഴിവുകൾ നികത്തുന്നതിലേക്കായി അപേക്ഷ ക്ഷണിക്കുകയും നിശ്ചിത ദിവസത്തിനുള്ളിൽ രണ്ടര ലക്ഷത്തിൽ അധികം യുവാക്കൾ അപേക്ഷിക്കുകയും ആയതിന്റെ അടിസ്ഥാനത്തിൽ 2018 ജൂലൈ 22-ആം തീയതി ഒ.എം.ആർ പരീക്ഷ നടത്തി 2019 ഏപ്രിൽ 1,2 തീയതികളിലായി 30,000 ത്തോളം ഉദ്യോഗാർത്ഥികലെ ഉൾപ്പെടുത്തി ഷോർട്ട് ലിസ്റ്റ് പ്രസിദ്ധീക്കരിക്കുകയും തുടർന്ന് ബറ്റാലിയൻ അടിസ്ഥാനത്തിൽ വിവിധങ്ങളായ ഗ്രൗണ്ടുകളുടെ ലഭ്യതയുടെ അടിസ്ഥാനത്തിൽ വൺ സ്റ്റാർ നിലവാരത്തിലുള്ള ശാരീരിക അളവെടുപ്പും കായിക ക്ഷമതാ പരീക്ഷയും നടത്തി,സർട്ടിഫിക്കറ്റ് പരിശോധനയും പൂർത്തിയാക്കി 01-07-2019ന് 10940 ഉദ്യോഗാർത്ഥികൾ ഉൾപ്പെടുന്ന റാങ്ക് പട്ടികയും പ്രസിദ്ധീക്കരിച്ച്‌, റിപ്പോർട്ട് ചെയ്ത ഒഴിവുകളിൽ നിയമന ശുപാർശ അയക്കുന്ന നടപടികൾ കേരള പബ്ളിക് സർവീസ് കമ്മീഷനിൽ പുരോഗമിച്ചു കൊണ്ടിരിക്കുന്ന സാഹചര്യത്തിൽ ഈ ലിസ്റ്റിൽ വിരലിൽ എണ്ണാവുന്ന ചിലർ പരീക്ഷ ക്രമക്കേടിലൂടെയാണ് ലിസ്റ്റിൽ ഉൾപ്പെട്ടത് എന്ന് കേരള പബ്ളിക് സർവീസ് കമ്മീഷൻ വിജിലൻസ് വിഭാഗം കണ്ടെത്തുകയും അവരെ ലിസ്റ്റിൽ നിന്നും പുറത്താക്കുകയും ആജീവനാന്ത വിലക്ക് ഏർപ്പെടുത്തുകയും ചെയ്തിരിക്കുകയാണ്. ഈ സാഹചര്യത്തിൽ തുടരന്വേഷണം നടക്കുന്നതിനാൽ സത്യസന്ധമായി പരീക്ഷയും ഫിസിക്കൽ ടെസ്റ്റും പാസ്സായി നിയമന ശുപാർശയും കാത്തിരുന്ന പതിനായിരത്തോളം ഉദ്യോഗാർത്ഥികളുടെ നിയമനം ആശങ്കാജനകം ആയ ഒരു സാഹചര്യത്തിലാണ്. ഇത് ഞങ്ങളോടും ഞങ്ങളുടെ കുടുംബത്തോടും ഉള്ള നീതി നിഷേധം ആണ്. തുടരന്വേഷണത്തിനോ ക്രമക്കേട് നടത്തിയവർക്കെതിരെയുള്ള ശിക്ഷണ നടപടികൾ സ്വീകരിക്കുന്നതിനോ ഞങ്ങൾ എതിരല്ല. എന്നാൽ അന്വേഷണവുമായി ബന്ധപ്പെട്ട് ഉണ്ടാകുന്ന കാലതാമസം ഞങ്ങളെയും ഞങ്ങളുടെ കുടുംബത്തെയും സാരമായി ബാധിക്കുന്ന ഒന്നാണ്. ആയതിനാൽ സമയബന്ധിതമായി അന്വേഷണം പൂർത്തിയാക്കി ഞങ്ങളുടെ നിയമന നടപടികൾ എത്രയും വേഗത്തിൽ ആക്കുകയും ഞങ്ങളുടെ ആശങ്ക ദൂരീകരിച്ചു നൽകുകയും ചെയ്യണമെന്ന് താഴ്മയായി അപേക്ഷിക്കുന്നു.

വിശ്വസ്തതയോടെ