പ്രളയത്തില് വെള്ളംകയറിയ വീട് വൃത്തിയാക്കാനെത്തിയ ഗൃഹനാഥന് ഷോക്കേറ്റു മരിച്ചു
അത്താണിയില് വെള്ളംകയറിയ വീട് വൃത്തിയാക്കാനെത്തിയ ഗൃഹനാഥന് ഷോക്കേറ്റു മരിച്ചതായി റിപ്പോര്ട്ട്. എംഐടി സ്കൂളിനു സമീപം പുല്ലാര്ക്കാട്ട് ആനന്ദന് (55) ആണ് മരിച്ചത്. പ്രളയം കഴിഞ്ഞ് വെള്ളമിറങ്ങിയ വീട്ടിലേക്ക് ഒറ്റയ്ക്ക് പോകരുതെന്ന് അധികൃതര് മുന്നറിയിപ്പ് നല്കുന്നു. ദുരിതാശ്വാസ പ്രവര്ത്തകരേയോ മറ്റ് ആളുകളേയോ കൂട്ടി മാത്രമേ പോകാവൂ. ഒരിക്കലും രാത്രിയില് വീട്ടിലേക്ക് പോകരുത്.
വീടിനുള്ളില് കയറുമ്പോള് നിര്ബന്ധമായും എല്ലാ വൈദ്യുതി ബന്ധങ്ങളും വിഛേദിക്കണം. മെയിന് സ്വിച്ച് ഓഫാക്കിയാലും ഇന്വെര്ട്ടറുള്ള വീടുകളില് നിര്ബന്ധമായും ഈ കണക്ഷനും ഓഫാണെന്ന് ഉറപ്പായ ശേഷം മാത്രം ചുമരിലും മറ്റും തൊടുക. അല്ലാത്തപക്ഷം ഷോക്കേല്ക്കാന് സാധ്യതയുണ്ട്. കട്ടിയുള്ള ഷൂസ് ധരിക്കാന് ശ്രദ്ധിക്കുക: മഴവെള്ളത്തില് ഒലിച്ച് വന്ന മാലിന്യങ്ങളും, പാമ്പുകള്, കുപ്പിച്ചില്ലുകള്, മൂര്ച്ചയേറിയ കല്ലുകള് തുടങ്ങിയവ ഉണ്ടാകാം. മുറിവ് ഏല്ക്കാനും പാമ്പുകടിയേല്ക്കാനും സാധ്യതകള് ഏറെയാണ്.
വാതിലുകള്ക്കിടയില് ചെളി അടിഞ്ഞുകിടക്കുന്നതിനാല് തുറക്കാന് ബുദ്ധിമുട്ട് അനുഭവപ്പെട്ടാല് ഒരിക്കലും ശക്തിയായി തള്ളി തുറക്കരുത്. തള്ളി തുറക്കുമ്പോള് ചുമരുകള്ക്ക് ബലക്ഷയം വരാനും ഇടിയാനും കൂടുതല് അപകടങ്ങള് ഉണ്ടാവാനും സാധ്യതയുണ്ട്.
https://www.facebook.com/Malayalivartha
