കോട്ടയം ചന്തക്കടവിൽ വടശേരി ലോഡ്ജിൽ യുവാക്കൾക്ക് വെട്ടേറ്റ സംഭവത്തിനു പിന്നിൽ പെൺവാണിഭ സംഘങ്ങൾ തമ്മിലുള്ള തർക്കമെന്നു സൂചന. സംഭവത്തിൽ വെട്ടേറ്റ യുവാക്കൾ പൊലീസ് അന്വേഷണവുമായി സഹകരിക്കുന്നതേയില്ല. വെട്ടിയത് ആരാണെന്നറിയില്ലെന്നും, പ്രശ്‌നങ്ങളൊന്നും തങ്ങൾക്കില്ലെന്നും യുവാക്കൾ പറയുന്നു.

എന്നാൽ, വീട് കേന്ദ്രീകരിച്ച് പെൺവാണിഭവും അശ്ലീല വീഡിയോ നിർമ്മാണവും ഹണിട്രാപ്പും നടന്നിരുന്നതായാണ് പൊലീസ് സംശയം. ഈ സാഹചര്യത്തിൽ പ്രതികൾക്കായി അന്വേഷണം ഊർജിതമാക്കിയിട്ടുണ്ട്.

കഴിഞ്ഞ ദിവസം രാത്രി ഒൻപത് മണിയോടെയാണ് ഏറ്റുമാനൂർ സ്വദേശികളായ സാൻ ജോസഫ്, അമീർഖാൻ എന്നിവരെ പതിനാലംഗ സംഘം വെട്ടിപ്പരിക്കേൽപ്പിച്ചത്. ഇവർക്കൊപ്പമുണ്ടായിരുന്ന തിരുവനന്തപുരം സ്വദേശി ഷിനുവും പൊൻകുന്നം സ്വദേശിയായ യുവതിയും അക്രമത്തിൽ നിന്നും കഷ്ടിച്ച് രക്ഷപെട്ടു.

വീടിന്റെ വാതിൽ ചവിട്ടിപ്പൊളിച്ചെത്തിയ പ്രതികൾ മുറിയ്ക്കുള്ളിൽ കയറി വെട്ടുകയായിരുന്നുവെന്നാണ് ആക്രമണത്തിന് ഇരയായവർ നൽകുന്ന മൊഴി.

തങ്ങൾക്ക് ആരുമായും പ്രശ്നനങ്ങളില്ലെന്നും, പ്ലമ്പിങ് ഇലക്ട്രിക്കൽ വയറിംങ് ജോലികൾ ചെയ്തു ജീവിക്കുകയാണ് തങ്ങളെന്നുമാണ് പ്രതികൾ പൊലീസിനു നൽകിയ മൊഴി. തങ്ങൾക്കൊപ്പം ഉണ്ടായിരുന്ന പൊൻകുന്നം സ്വദേശി ജ്യോതി വീട്ടിൽ ഭക്ഷണം വയ്ക്കുന്നതിനായി എത്തിയതാണെന്നും ഇവർ പൊലീസിനു മൊഴി നൽകിയിരുന്നു.

എന്നാൽ, ഇവരുടെ നീക്കങ്ങളെല്ലാം ദുരൂഹമാണെന്നും മൊഴികൾ തെറ്റാണെന്നും പൊലീസ് പറയുന്നു. ജ്യോതി നിരവധി സിനിമകളിൽ ജൂനിയർ ആർട്ടിസ്റ്റായി ജോലി ചെയ്തിട്ടുണ്ട്.

ഇവരുടെ ഫോണിൽ നിന്നും ജൂനിയർ ആർട്ടിസ്റ്റുമാരും എക്‌സ്ട്രാ നടിമാരും അടക്കം നിരവധി പെൺകുട്ടികളുടെ ചിത്രങ്ങൾ കണ്ടെത്തിയിട്ടുണ്ട്. നഗരം കേന്ദ്രീകരിച്ചുള്ള പെൺവാണിഭ റാക്കറ്റിലെ കണ്ണികളാണ് ആക്രമണത്തിന് ഇരയായവരെന്നാണ് സംശയം.

വടശേരി ലോഡ്ജിൽ യുവാക്കൾക്ക് വെട്ടേറ്റത് ഹണിട്രാപ്പിന്റെ പ്രതികാരമെന്നു സൂചന. വടശേരി ലോഡ്ജിൽ പെൺവാണിഭ കേന്ദ്രം നടന്നിരുന്നതായി പൊലീസ് കണ്ടെത്തിയിട്ടുണ്ട്. ഇവിടെ മുറിയ്ക്കു പുറകിൽ നിന്നും ചാക്ക് കണക്കിന് ഗർഭനിരോധന ഉറകൾ കണ്ടെടുത്തിരുന്നു. ഇതു കൂടാതെ വീടിനുള്ളിലെ ഒരു മുറിയിൽ കാമറയും ട്രൈപ്പോഡും കണ്ടെത്തിയിരുന്നു.

ഇത്തരത്തിൽ ക്യാമറയും ട്രൈപ്പോഡും ഉപയോഗിച്ച് ഇവിടെ എത്തുന്ന സമ്പന്നരായ ഇടപാടുകാരെ ഹണിട്രാപ്പിൽ കുടുക്കിയിരുന്നതായാണ് കണക്കു കൂട്ടൽ. ഇത്തരത്തിൽ ഹണിട്രാപ്പിൽ കുടുങ്ങിയ ആരെങ്കിലും ക്വട്ടേഷൻ സംഘത്തെ ഉപയോഗിച്ച് തിരിച്ചടിച്ചതാവാമെന്നാണ് സംശയിക്കുന്നത്.

തലയോലപ്പറമ്പ് സ്വദേശിയുടെ പേരിലാണ് വടശേരിൽ ലോഡ്ജിനു പിന്നിലെ കെട്ടിടം വാടകയ്ക്ക് എടുത്തിരുന്നത്. ഈ കെട്ടിടം കേന്ദ്രീകരിച്ചാണ് വാണിഭം നടന്നിരുന്നത്. ജില്ലയിൽ കൂടുതൽ സ്ഥലങ്ങളിൽ ഈ വാണിഭ സംഘം മുറികളും വീടുകളും വാടകയ്ക്ക് എടുത്തിരുന്നതായി കണ്ടെത്തിയിട്ടുണ്ട്.

ഈ വീടുകളിൽ രണ്ടു മാസം കൂടുമ്പോൾ മാറിമാറിയാണ് വാണിഭ കേന്ദ്രം പ്രവർത്തിച്ചിരുന്നത്. ഈ സ്ഥലത്തേയ്ക്ക് എത്തുന്ന ഇടപാടുകാരെ കെണിയിൽ കുടുക്കിയിരുന്നതായും സൂചന ലഭിച്ചിട്ടുണ്ട്.