കല്ലുവാതുക്കല്‍ കരിയിലക്കൂട്ടത്തില്‍ ഉപേക്ഷിച്ച നവജാതശിശു മരിച്ച സംഭവത്തില്‍ നിര്‍ണായക വഴിത്തിരിവ്. കേസില്‍ അറസ്റ്റിലായ കുട്ടിയുടെ അമ്മ രേഷ്മയുടെ ഫേസ്ബുക്ക് സുഹൃത്തിനെ പൊലീസ് കണ്ടെത്തിയതായി സൂചന.

ഭര്‍ത്താവ് വിദേശത്തേക്ക് മടങ്ങുമ്പോൾ ഇയാളുടെ കൂടെ ഒളിച്ചോടാനുള്ള തയ്യാറെടുപ്പിലായിരുന്നു രേഷ്മ. കാമുകന്‍റെ നിര്‍ദേശപ്രകാരമാണ് കുഞ്ഞിനെ ഉപേക്ഷിച്ചതെന്ന് രേഷ്മ നേരത്തെ പൊലീസിനോട് പറഞ്ഞിരുന്നു.

അതേസമയം രേഷ്മയുടെ ഭര്‍ത്താവ് വിഷ്ണുവിനെയും അദ്ദേഹത്തിന്റെ സഹോദരന്‍ രഞ്ജിത്തിനെയും ചാത്തന്നൂര്‍ അസി. പൊലീസ് കമ്മിഷണര്‍ വൈ.നിസാമുദ്ദീന്റെ നേതൃത്വത്തില്‍ ആറു മണിക്കൂറോളം ചോദ്യം ചെയ്തു.