ഗുരുവായൂര് ദേവസ്വത്തിലെ ആനകളുടെ സുഖചികിത്സ തുടങ്ങി.... ആനകളെ കുളിപ്പിച്ച് കോട്ടയുടെ വടക്കേ മുറ്റത്ത് അണിനിരത്തിയാണ് ഭക്ഷണം നല്കുന്നത്, ഔഷധക്കൂട്ടുകളോടെയുള്ള ആഹാരം നല്കുന്ന സുഖചികിത്സ, ഒരു മാസം നീളും
ഗുരുവായൂര് ദേവസ്വത്തിലെ ആനകളുടെ സുഖചികിത്സ തുടങ്ങി. ആനത്താവളത്തില് നടന്ന ചടങ്ങില് എന്.കെ. അക്ബര് എം.എല്.എ കൊമ്ബന് ഗോപീകൃഷ്ണന് ആദ്യ ഔഷധ ഉരുള നല്കി ഉദ്ഘാടനം നിര്വഹിച്ചു.
ദേവസ്വം ചെയര്മാന് അഡ്വ. കെ.ബി. മോഹന്ദാസ്, ഭരണസമിതി അംഗങ്ങളായ എ.വി പ്രശാന്ത്, കെ.വി. ഷാജി, കെ. അജിത്, അഡ്വ: കെ.വി. മോഹനകൃഷ്ണന്, ഇ.പി.ആര് വേശാല മാസ്റ്റര്, ദേവസ്വം അഡ്മിനിസ്ട്രേറ്റര് ടി. ബ്രീജകുമാരി, ദേവസ്വം ആന ഡോക്ടര് ശാരുജിത്, ആന വിദഗ്ദ്ധ സമിതി അംഗങ്ങളായ ഡോ: പി.ബി. ഗിരിദാസ്, ഡോ: കെ. വിവേക്, ഡോ: ദേവന് നമ്ബൂതിരി തുടങ്ങിയവര് പങ്കെടുത്തു.
ആനകളെ കുളിപ്പിച്ച് കോട്ടയുടെ വടക്കേ മുറ്റത്ത് അണിനിരത്തിയാണ് ഭക്ഷണം നല്കുന്നത്. ഔഷധക്കൂട്ടുകളോടെയുള്ള ആഹാരം നല്കുന്ന സുഖചികിത്സ, ഒരു മാസം നീളും.
ആരോഗ്യ സംരക്ഷണത്തിനും, ശരീരപുഷ്ടിക്കുമായ സമീകൃത ആഹാരം ആനകള്ക്ക് നല്കും. നീരിലുള്ളവയ്ക്ക് നീരില് നിന്നും മാറിയ ശേഷവും, അപകട സാധ്യത ഉണ്ടാക്കാന് സാധ്യതയുള്ളവയ്ക്കും മുറപോലെ സുഖചികിത്സ നടത്തും. പല കൊമ്പന്മാരും ഇപ്പോള് മദപ്പാടിലാണ്.
1986-ലാണ് ആനകള്ക്ക് ശാസ്ത്രീയമായ ആയുര്വേദ-അലോപ്പതി മരുന്നുകള് സംയോജിപ്പിച്ച സുഖചികിത്സക്ക് ഗുരുവായൂരില് തുടക്കം കുറിച്ചത്. മണ്ണുത്തി കാര്ഷിക സര്വകലാശാലയിലെ ഏഴ് അംഗ ഡോക്ടര്മാരുടെ സംഘം നടത്തിയ പരിശോധനയുടെ റിപ്പോര്ട്ടാണ് സുഖചികിത്സ തുടങ്ങാന് നിമിത്തമായത്. അതിനുമുമ്പ് ചില ആനകള്ക്ക് ആയൂര്വേദ മരുന്നുകള് മാത്രം അടങ്ങിയ ചികിത്സാവിധികള് നടത്തിയിരുന്നു.
ആയൂര്വേദ, അലോപ്പതി മരുന്നുകള് ഉള്പ്പെടുത്തിയ സമീകൃതാഹാരമാണ് സുഖചികിത്സാക്കാലത്ത് ആനകള്ക്ക് നല്കുന്നത്. ആനകളുടെ ശരീരഭാരമനുസരിച്ചാണ് നല്കുന്ന ഭക്ഷണത്തിന്റെ അളവ് നിശ്ചയിച്ചിട്ടുള്ളത്. 3 കിലോ അരിയുടെ ചോറ്, ഓരോ കിലോവീതം ചെറുപയറും മുതിരയും, 200 ഗ്രാം ച്യവനപ്രാശം, 100 ഗ്രാം അഷ്ടചൂര്ണം, 25 ഗ്രാം മിനറല് മിക്സ്ചര്, 50 ഗ്രാം മഞ്ഞള്പൊടി തുടങ്ങിയവയും, വൈറ്റമിന് ടോണിക്കുകളുമാണ് ഓരോ ദിവസവും സുഖചികിത്സാക്കാലത്ത് ആനകളുടെ ദൈനംദിന മെനു. ഇതിന് പുറമെ പനമ്ബട്ടയും, പുല്ലുമുണ്ട്. ആനകളുടെ ശരീര പുഷ്ടിക്കും, ഓജസ്സിനും, അഴകിനും, ആരോഗ്യത്തിനുമായി വിദഗ്ധര് നിശ്ചയിച്ച ഔഷധക്കൂട്ടുകളും, ആരോഗ്യ വര്ധക വിഭവങ്ങളുമാണ് ആനകള്ക്ക് കൊടുക്കുന്നത്.
ദിവസവും വിശദമായ തേച്ചുകുളിയും സുഖചികിത്സയുടെ ഭാഗമായുണ്ട്. ഇന്നലെ നടന്ന സുഖചികിത്സാ ചടങ്ങിനുശേഷം, വനം വകുപ്പിന്റെ നിര്ദ്ദേശപ്രകാരം ആനത്താവളത്തില് നിന്നും ഗുരുവായൂര് ക്ഷേത്രാങ്കണം വരെയും, അവിടെനിന്ന് ആനക്കോട്ടയിലേക്കും അഞ്ചാനകള് സവാരി നടത്തി.
ഒരു വര്ഷത്തിലേറെയായി ആനകള് കെട്ടുംതറയില് കഴിഞ്ഞുകൂടുന്നത് ആരോഗ്യത്തെ ബാധിക്കുമെന്ന വനംവകുപ്പിന്റെ നിര്ദ്ദേശത്തിന്റെ അടിസ്ഥാനത്തിലാണ് ദിവസവും കുറഞ്ഞത് 5 കിലോമീറ്ററെങ്കിലും നടത്തണമെന്ന് വനം വകുപ്പ് നിര്ദ്ദേശിച്ചത്.
അതിന്റെ ഭാഗമായി ഇന്നലെ വൈകീട്ട് നടന്ന സവാരിയില് കൊമ്ബന്മാരായ ജൂനിയര് മാധവന്, ഗോപീകൃഷ്ണന്, വിനായകന്, ബാലകൃഷ്ണന്, ജൂനിയര് വിഷ്ണു, പിടിയാന ദേവി തുടങ്ങിയവര് പങ്കെടുത്തു. ഇന്ന് മുതല് രാവിലെ അഞ്ചാനകള് സമാനമായ രീതിയില് സവാരി നടത്തും
" fhttps://www.facebook.com/Malayalivartha
