തിരയിലൂടെ കാർ ഓടിക്കാൻ ശ്രമിക്കുന്നതിനിടെ കാർ മണലിൽ താഴ്ന്നു. കഴിഞ്ഞ ദിവസം നീലേശ്വരം തൈക്കടപ്പുറം ആശുപത്രി റോഡ് ബീച്ചിലായിരുന്നു സംഭവം. ഡ്രൈവ് ഇൻ ബീച്ചുകളിൽ ചെയ്യുന്നതു പോലെ കടലോരത്തേക്കിറക്കി തിരയിലൂടെ ഓടിക്കുകയായിരുന്നു. തിരയടിക്കുന്ന പൂഴിയിലേക്ക് ഇറക്കിയ കാറിന്റെ മുൻ ടയറുകൾ പൂഴിയിൽ താഴ്ന്നതോടെ യുവാവ് കാറിൽ നിന്നിറങ്ങി.

ഓടിക്കൂടിയ നാട്ടുകാർ വേലിയേറ്റം വരുന്നതോടെ കാർ കടലെടുക്കുമെന്നു മുന്നറിയിപ്പു നൽകി. പിന്നീട് ക്രെയിൻ ഉപയോഗിച്ച് കാർ എടുക്കാമെന്ന ഉദ്ദേശത്തിലായി യുവാവ്. ക്രെയിൻ കാത്തു നിന്നാൽ കൈവിട്ട് പോകും എന്ന് ഉറപ്പായതോടെ പൂഴിയിൽ താഴ്ന്നു തുടങ്ങിയ കാർ നാട്ടുകാർ ചേർന്ന് ഒത്തുപിടിച്ച് കടലോരത്ത് നിന്ന് നീക്കി.