തിരുവനന്തപുരത്തിന്റെ സ്വന്തം ശശീ തരൂര്‍ വലിയ ഉയര്‍ന്ന സ്ഥാനത്ത് എത്തുമെന്ന് സൂചന. അങ്ങനെ കേരള നേതാക്കള്‍ എഴുതി തള്ളിയ ശശി തരൂരിന് അപ്രതീക്ഷിത സ്ഥാനക്കയറ്റമാണ് വരുന്നത്. ലോക്‌സഭാ കക്ഷി നേതാവ് സ്ഥാനത്തു നിന്നും ആദിര്‍ രഞ്ജന്‍ ചൗദ്ധരിയെ മാറ്റാന്‍ ആലോചിക്കുന്നതായി റിപ്പോര്‍ട്ട് വന്നതോടെയാണ് ശശീ തരൂരിന് ശുക്രന്‍ തെളിഞ്ഞത്.

സഭയ്ക്ക് അകത്തും പുറത്തും പ്രതിപക്ഷ തന്ത്രത്തെ ഉത്തേജിപ്പിക്കുന്നതിനും പാര്‍ലമെന്റില്‍ ഭരണ പക്ഷത്തിനെതിരെ കൂടുതല്‍ ശക്തമായി നിലകൊളളുന്നതിനുമാണ് പുതിയ നിയമനം. രഞ്ജന് പകരക്കാരനായി ശശി തരൂരോ മനീഷ് തിവാരിയോ വരാനാണ് കൂടുതല്‍ സാദ്ധ്യതയെന്നും ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്തു.

രഞ്ജന്റേത് മികച്ചപ്രകടനം അല്ലെന്ന വിലയിരുത്തലിന്റെ അടിസ്ഥാനത്തിലാണ് പുതിയ പേരുകള്‍ പരിഗണിക്കുന്നത്. ബം?ഗാള്‍ നിയമസഭാ തിരഞ്ഞെടുപ്പില്‍ കോണ്‍ഗ്രസ് ഒരു സീറ്റ് പോലും നേടാനാകാതെ തകര്‍ന്നടിഞ്ഞതും മാറ്റത്തെക്കുറിച്ചുളള ചര്‍ച്ചകള്‍ക്ക് കാരണമായിട്ടുണ്ട്. ബംഗാളില്‍ നിന്നുളള നേതാവായ രഞ!്ജനെ മാറ്റി മമത ബാനര്‍ജിയുടെ തൃണമൂലുമായി അടുപ്പമുളളയാളെ ലോക്‌സഭാ കക്ഷി നേതാവാക്കാനുളള സാദ്ധ്യത ഏറെയാണ്. തൃണമൂലുമായി കോണ്‍ഗ്രസ് വീണ്ടും സഖ്യമുണ്ടാക്കാന്‍ ശ്രമിക്കുന്നതായ റിപ്പോര്‍ട്ടുകള്‍ നേരത്തെ പുറത്ത് വന്നിരുന്നു.

പകരക്കാരനായി ഏറെ സാദ്ധ്യത കല്‍പിക്കുന്ന മനീഷ് തിവാരി പഞ്ചാബിലെ ആനന്ദ്പൂര്‍ സാഹിബില്‍ നിന്നുളള എം.പിയാണ്. യു.പിയില്‍ വേരുകളുളള അദ്ദേഹത്തിന് മമതയുമായി നല്ല ബന്ധവുമുണ്ട്. ഒപ്പം അദ്ദേഹം ബ്രാഹ്മണനുമാണ്. അതേസമയം, കേരളത്തില്‍ നിന്നുളള എം.പിയായ ശശി തരൂര്‍ എല്ലാത്തരത്തിനും രാജ്യത്തിനാകെ അഭിമാനമാണ്. അന്താരാഷ്ട്ര വേദിയിലും പാര്‍ലമെന്റിലും അടക്കം ഏറെ ശ്രദ്ധിക്കപ്പെടുന്ന വ്യക്തിയാണ് അദ്ദേഹം. പാര്‍ട്ടിയില്‍ ഒരു വിഭാഗം രാഹുല്‍ ഗാന്ധിക്ക് വേണ്ടി നിലകൊളളുന്നുണ്ടെങ്കിലും അദ്ദേഹം താല്‍പര്യം പ്രകടിപ്പിച്ചിട്ടില്ലെന്നാണ് പുറത്ത് വരുന്ന റിപ്പാര്‍ട്ടുകള്‍ പറയുന്നത്.

കടിച്ചാല്‍ പൊട്ടാത്ത ഇംഗ്ലീഷ് വാക്കുകള്‍ സന്ദര്‍ഭോചിതമായി ഉപയോഗിച്ച് ഫോളോവേഴ്‌സിനെ ഒരേസമയം ഞെട്ടിപ്പിക്കുകയും ചിന്തിപ്പിക്കുകയും ചെയ്യുന്ന വ്യക്തി കൂടിയാണ് ശശി തരൂര്‍. തരൂരിന്റെ ഈ വാക്ചാതുരിക്ക് രാജ്യം മുഴുവന്‍ ആരാധകരുണ്ട്. വാക്കുകളുടെ അര്‍ഥം തിരഞ്ഞ്, അതില്‍ ഹാസ്യം കണ്ടെത്തി ആസ്വദിക്കുന്നവര്‍.

എന്നാല്‍, സമീപകാലത്ത് പുതിയ ഇംഗ്ലീഷ് വാക്കുകളൊന്നും തരൂര്‍ ട്വീറ്റ് ചെയ്തിട്ടില്ല. ഇക്കാര്യം ചൂണ്ടിക്കാട്ടിയാണ് ഡോ. പ്രിയ ആനന്ദ് തരൂരിന്റെ ട്വീറ്റിന് കമന്റ് ഇട്ടത്. സര്‍ താങ്കളുടെ പ്രസംഗത്തിന് പുറമേ പുതിയ വാക്കുകള്‍ പഠിക്കാന്‍ കാത്തിരിക്കുകയാണ് ഞാന്‍. ഇതുവരെ കേള്‍ക്കാത്ത പദപ്രയോഗത്തിലൂടെ മനസ്സിനെ പ്രീതിപ്പെടുത്തുന്നത് മഹത്തരമാണ്. എന്നായിരുന്നു പ്രിയയുടെ ട്വീറ്റ്.

ട്വീറ്റിന് ഉടന്‍ പുത്തന്‍ വാക്കുമായി തരൂരിന്റെ മറുപടിയുമെത്തി. 'പൊഗൊണോട്രോഫി'(pogontorophy) എന്ന വാക്കാണ് തരൂര്‍ ഇത്തവണ പരിചയപ്പെടുത്തിയത്. സുഹൃത്തായ രത്തിന്‍ റോയിയാണ് തനിക്ക് ഈ വാക്ക് പരിചയപ്പെടുത്തി തന്നതെന്ന് തരൂര്‍ പറയുന്നു.

എന്റെ സുഹൃത്തും എക്‌ണോമിസ്റ്റുമായ രത്തിന്‍ റോയ് എന്നെ ഇന്ന് ഒരു പുതിയ വാക്ക് പഠിപ്പിച്ചു. പൊഗൊണോട്രോഫി. പൊഗൊണോട്രോഫി എന്നാല്‍ താടി വളര്‍ത്തല്‍. പ്രധാനമന്ത്രിയെ സംബന്ധിച്ചിടത്തോളം പൊഗൊണോട്രോഫി എന്നത് മഹാമാരിയെ നേരിടാനുള്ള ഏകാഗ്രമായ മുഴുകലാണ്.'

തരൂരിന്റെ ട്വീറ്റ് പതിവുപോലെ വൈറലായി. നിരവധി ആളുകളാണ് ശശി തരൂരിന്റെ വാക്‌സാമര്‍ഥ്യത്തെ അഭിനന്ദിച്ച് രംഗത്തെത്തിയത്. ഇതിന് പിന്നാലെയാണ് ശശി തരൂരിന് മറ്റൊരു നിയോഗം വന്നെത്തുന്നത്.