രണ്ടാം പിണറായി സര്‍ക്കാരിന്റെ ആദ്യ ബഡ്ജറ്റ് അവതരണം പുരോഗമിക്കുകയാണ്. ധനമന്ത്രി കെ എന്‍ ബാലഗോപാലാണ് പൂര്‍ണ ബഡ്ജറ്റ് നിയമസഭയില്‍ അവതരിപ്പിക്കുന്നത്. കാര്‍ഷിക രംഗത്തെ പ്രധാന പ്രഖ്യാപനങ്ങളിങ്ങനെ....

സുസ്ഥിര നെല്‍കൃഷി വികസനത്തിന് ഉത്പാദനോപാധികള്‍ക്കുള്ള സഹായം ഹെക്ടറിന് 5500 രൂപ നിരക്കില്‍ നല്‍കുന്നതിനും നെല്‍വയല്‍ ഉടമകള്‍ക്ക് ഹെക്ടറിന് 3000 രൂപ നിരക്കില്‍ റോയല്‍റ്റി നല്‍കുന്നതിനുമായി 60 കോടി രൂപ വകയിരുത്തും. ഇതുള്‍പ്പടെ നെല്‍കൃഷി വികസനത്തിനായി 76 കോടി രൂപ നീക്കിവയ്ക്കും.

നെല്ലിന്റെ താങ്ങുവില 28 രൂപ 20 പൈസയായി ഉയര്‍ത്തും. ഇതിനായി 50 കോടി രൂപ മാറ്റിവയ്ക്കും. കോള്‍ നിലങ്ങളില്‍ വെള്ളപ്പൊക്കത്തില്‍ നിന്ന് കോള്‍ മേഖലയെ സംരക്ഷിക്കുന്നതിനും നെല്ലുത്പാദനം വര്‍ദ്ധിപ്പിക്കുന്നതിനുമായി പത്ത് കോടി രൂപ വകയിരുത്തും.

പച്ചക്കറി കൃഷി പ്രോത്സാഹിപ്പിക്കുന്നതിനായി വി എഫ് പി സി കെയ്ക്കുള്ള അടങ്കല്‍ തുക 14 കോടിയില്‍ നിന്ന് 25 കോടി രൂപയായി ഉയര്‍ത്തും.

ബഹുവിള കൃഷി സമ്പ്രദായത്തിന് പ്രാധാന്യം നല്‍കുന്ന ഫാം പ്‌ളാന്റ് എന്ന പദ്ധതി രൂപീകരിക്കും. ഇതിനായി 29 കോടി രൂപ വകയിരുത്തും.


വിദ്യാര്‍ത്ഥികളെ ഉള്‍പ്പടെ കൃഷിയിലേക്ക് ആകര്‍ഷിക്കുന്നതിനായി 'ഞങ്ങളും കൃഷിയിലേക്ക്' എന്ന ക്യാമ്പയിന്‍ വിജയിപ്പിക്കുന്നതിനായി നടപടികള്‍ സ്വീകരിക്കും.
കര്‍ഷകരുടെ ഉത്പന്നങ്ങള്‍ വില്‍ക്കാന്‍ ഇക്കോ ഷോപ്പുകളുടെ ശൃംഖല സ്ഥാപിക്കും.

മലയോര മേഖലയില്‍ ഉത്പാദിപ്പിക്കുന്ന പഴങ്ങളും പച്ചക്കറികളും കേടുകൂടാതെ ഉപഭോക്താക്കളില്‍ എത്തിക്കുന്നതിനായി കോള്‍ഡ് ചെയിന്‍ സൗകര്യം മെച്ചപ്പെടുത്തുന്നതിനായി പത്ത് കോടി രൂപ മാറ്റിവയ്ക്കും.
തോട്ടം ഭൂനിയമം കാലോചിതമായി പരിഷ്‌കരിക്കും.

മൂല്യവര്‍ദ്ധിത കാര്‍ഷിക മിഷന്‍ സ്ഥാപിക്കും.

ഇന്ത്യയിലും മറ്റ് രാജ്യങ്ങളിലും ഉപയോഗിച്ചു വരുന്ന പുതിയ സാങ്കേതിക വിദ്യകള്‍ മനസിലാക്കുന്നതിനും ബെസ്റ്റ് പ്രാക്ടീസസ് ഇന്‍ അഗ്രികള്‍ച്ചര്‍ മനസിലാക്കുന്നതിനും സംസ്ഥാനത്തെ കര്‍ഷകര്‍ക്ക് അവസരം നല്‍കുന്ന പദ്ധതിക്കായി രണ്ട് കോടി രൂപ അനുവദിക്കും.


.കാര്‍ഷിക മേഖലയിലെ നിരവധി ഉപകരണങ്ങള്‍ നിര്‍മിക്കുന്ന സ്ഥാപനമായ കേരള അഗ്രോ മിഷനറി കോര്‍പ്പറേഷന്‍ എന്ന സ്ഥാപനത്തിനായി മൂലധന നിക്ഷേപമായി അഞ്ച് കോടി രൂപ നീക്കി വയ്ക്കും.

പ്‌ളാന്റേഷന്‍ മേഖലയില്‍ പ്രതിസന്ധി പരിഹരിക്കും. പ്‌ളാന്റേഷന്‍ നിര്‍വചനത്തിന്റെ പരിധിയില്‍ റബര്‍, കാപ്പി, തേയില എന്നിവക്കൊപ്പം പുതിയ വിളകള്‍ കൂടി ഉള്‍പ്പെടുത്തും. റബര്‍ സബ്സിഡിക്കായി 500 കോടി രൂപ വകയിരുത്തും. റബറിന്റെ വിലയും ഉത്പാദനവും വില്‍പ്പനയും വര്‍ദ്ധിപ്പിക്കും. റബറൈസ്ഡ് റോഡുകള്‍ കൂടുതല്‍ നിര്‍മിക്കുന്നതിനായി പൊതുമരാമത്ത് വകുപ്പും കിഫ്ബിയും ഏറ്റെടുക്കുന്ന റോഡ് നിര്‍മാണങ്ങളില്‍ ടാറിനൊപ്പം റബര്‍ മിശ്രിതങ്ങളും കൂടി ചേര്‍ക്കുന്ന പദ്ധതിക്കായി ഈ വര്‍ഷം 50 കോടി രൂപ മാറ്റിവയ്ക്കും.


.കാര്‍ഷിക ഉപകരണങ്ങളും യന്ത്രങ്ങളും വാങ്ങുന്നതിനായി സ്വയം തൊഴില്‍ കാര്‍ഷിക ഗ്രൂപ്പുകള്‍ക്ക് 50 ലക്ഷം രൂപ വരെ വായ്പ നല്‍കും. ഇതില്‍ 25 ശതമാനമോ പത്ത് ലക്ഷം രൂപയോ ഏതാണോ കുറവ് അത് സബ്സിഡിയായി നല്‍കാന്‍ കഴിയുന്ന പദ്ധതി രൂപീകരിക്കും. ഇതിനായി 20 കോടി രൂപ അനുവദിക്കും.