കലൂരിലെ ഹോട്ടലില്‍ ഒന്നര വയസുകാരി കൊല്ലപ്പെട്ട സംഭവത്തില്‍ മുത്തശ്ശിക്കും പിതാവിനുമെതിരെ കേസ്... ഇരുവരെയും ഉടന്‍ അറസ്റ്റ് ചെയ്യും, കുട്ടിയുടെ സംരക്ഷണത്തില്‍ വീഴ്ചവരുത്തിയതിനാണ് നടപടി.

ബാലനീതി നിയമപ്രകാരമാണ് കൊല്ലപ്പെട്ട നോറയുടെ പിതാവ് സജീവ്, ഇയാളുടെ മാതാവ് സിപ്‌സി എന്നിവര്‍ക്കെതിരെയാണ് കേസെടുത്തത്. മുത്തശ്ശിയുടെ കാമുകന്‍ ബിനോയ് ഡിക്രൂസ് ആണ് കുട്ടിയെ കൊലപ്പെടുത്തിയത്. ഇയാളെ നേരത്തെ അറസ്റ്റ് ചെയ്തിരുന്നു. കൊലപാതകത്തില്‍ സിപ്‌സിക്ക് പങ്കില്ലെന്ന നിഗമനത്തിലാണ് അന്വേഷണസംഘം. കുഞ്ഞിന്റെ പിതൃത്വത്തെച്ചൊല്ലിയുള്ള തര്‍ക്കത്തെ തുടര്‍ന്നാണ് കൊലപാതകമെന്നാണ് ് പൊലീസിനോട് ബിനോയ് പറഞ്ഞത്.

ആറു വര്‍ഷമായി സിപ്സിയുമായി ബിനോയ് അടുപ്പത്തിലായിരുന്നു. എറണാകുളം നേവല്‍ബേസിലെ താത്കാലിക ജീവനക്കാരനാണ് ഇയാള്‍. ഈ മാസം അഞ്ചാം തീയതി മുതല്‍ സിപ്‌സിയും ജോണ്‍ ബിനോയിയും രണ്ട് പേരക്കുട്ടികളും ലോഡ്ജില്‍ ഒന്നിച്ചായിരുന്നു താമസിച്ചിരുന്നത്.

കുട്ടികളുടെ അമ്മ വിദേശത്ത് ജോലി ചെയ്യുകയാണ്. ടൈല്‍ ജോലിക്കാരനായിരുന്ന സജീവ് അപകടത്തെ തുടര്‍ന്ന് ജോലിക്ക് പോയിരുന്നില്ല. കുടുംബപ്രശ്‌നങ്ങളെ തുടര്‍ന്ന് രണ്ട് കുട്ടികളും മുത്തശ്ശിയുടെ കൂടെയാണ് താമസിച്ചിരുന്നത്.