സൂര്യനില്‍നിന്ന് ഊര്‍ജം സ്വീകരിച്ചുകൊണ്ടുള്ള ഉപാസനായജ്ഞത്തിന്റെ പ്രചാരകനും ഗുജറാത്തി വ്യവസായിയുമായ ചക്കോരത്തുകുളം വികാസ് നഗര്‍ 131-ഹാപ്പി ഹോം ഫ്‌ളാറ്റില്‍ ഹീരാ രത്തന്‍ മനേഖ് (85) അന്തരിച്ചു. സ്വകാര്യ ആശുപത്രിയില്‍ ചികിത്സയിലിരിക്കെ ശനിയാഴ്ച വൈകുന്നേരമായിരുന്നു അന്ത്യം.

സൗരോര്‍ജം സ്വീകരിച്ച്, ആഹാരമുപേക്ഷിക്കുന്ന 'ഹീരാ രത്തന്‍ മനേക് പ്രതിഭാസ'ത്തിന്റെ ഉപജ്ഞാതാവാണ് എന്നാണ് റിപ്പോർട്ട്. 2001-ല്‍ 411 ദിവസം തുടര്‍ച്ചയായി ഭക്ഷണമുപേക്ഷിച്ച് ഗിന്നസ് ബുക്കില്‍ ഇടംനേടിയിട്ടുണ്ട്. 20 വര്‍ഷത്തോളം ഖരരൂപത്തിലുള്ള ഭക്ഷണം കഴിക്കാതിരുന്നിട്ടുണ്ട്. അമേരിക്കന്‍ ബഹിരാകാശ ഏജന്‍സിയായ 'നാസ' ഇദ്ദേഹത്തെ ക്ഷണിച്ച് പഠനം നടത്തുകയും ബഹിരാകാശയാത്രികര്‍ക്ക് പ്രയോജനകരമാവുംവിധം ക്ലാസെടുപ്പിക്കുകയും ചെയ്തിട്ടുണ്ട് എന്നാണ് ഇന്നത്തെ മുഖ്യധാരാ പത്രങ്ങളും റിപ്പോർട്ട് ചെയ്തിരിക്കുന്നത്. ഇപ്പോഴിതാ ഇതിനെ മുൻനിർത്തി കുറെ സംശയങ്ങൾ ഉന്നയിക്കുകയാണ് ഡോ. നെൽസൺ ജോസഫ്.

ഫേസ്ബുക്ക് കുറിപ്പ് ഇങ്ങനെ;

" സൗരോർജം സ്വീകരിച്ച് ആഹാരമുപേക്ഷിച്ച താപസൻ അന്തരിച്ചു "
" സൂര്യനെ ഭക്ഷണമാക്കിയ ആൾ അന്തരിച്ചു "
" നാസ വരെ പരീക്ഷണത്തിനുപയോഗിച്ച സൂര്യോപാസകൻ "

ഇത് മാത്രമല്ല, വാർത്തകൾ ഇനിയുമുണ്ട്. വായിച്ചുകൊണ്ടിരുന്നപ്പൊ ഒരു ലോഡ് സംശയങ്ങളാണ് തോന്നിയത്. നാസ ശരിക്കും പഠനം നടത്തിയിരുന്നുവോ? എങ്കിൽ അതിൻ്റെ റിസൾട്ട് എവിടെ? സൗരോർജം സ്വീകരിച്ച് മനുഷ്യർക്ക് ജീവിക്കാൻ പറ്റുമെങ്കിൽ ലോകത്ത് നേരിടുന്ന ഏറ്റവും വലിയ പ്രശ്നങ്ങളിലൊന്നായ പട്ടിണിക്കും പോഷകാഹാരക്കുറവിനും എന്നെന്നേയ്ക്കുമായ പരിഹാരമല്ലേ?

അത്ര വലിയ നേട്ടം നാസ ഒളിച്ചുവയ്ക്കില്ലല്ലോ? ഇനി ഒളിച്ചു വച്ചതാണെന്ന് വാദിക്കുന്നവര് നാസ പഠനം നടത്തിയത് മാത്രം എങ്ങനെ അറിയുന്നു?

സസ്യങ്ങൾക്ക് ഹരിതകം ഉപയോഗിച്ചാണ് സൂര്യപ്രകാശം ഉപയോഗിച്ച് ഭക്ഷണം നിർമിക്കാൻ പറ്റുന്നത്. അതും വെള്ളവും വളവുമില്ലാതെ സൂര്യപ്രകാശം മാത്രമേ ഉള്ളെങ്കിൽ നടക്കുന്ന കാര്യമാണെന്നും തോന്നുന്നില്ല. ഇവിടെ ഏത് മെക്കാനിസം ഉപയോഗിച്ചാണ് സൗരോർജം സ്വീകരിക്കപ്പെടുന്നുവെന്ന് അവകാശപ്പെടുന്നത്? നഗ്നനേത്രം കൊണ്ട് സൂര്യനെ നോക്കുകയാണ് സൂര്യോപാസനയെന്ന് ഒരെണ്ണത്തിൽ വായിച്ചു, ഗ്രഹണസമയത്തെക്കുറിച്ച് ആദ്യം ഓർമവരുന്ന കാര്യങ്ങളിലൊന്നാണ് നഗ്നനേത്രങ്ങൾ കൊണ്ട് സൂര്യനെ നോക്കരുത് എന്ന നിർദേശം.

അതിനർഥം ബാക്കിയുള്ള സമയത്ത് നോക്കാമെന്നല്ല, ബാക്കിയുള്ള സമയത്ത് ഏറെനേരം നോക്കിനിൽക്കാൻ പറ്റില്ലാത്തതുകൊണ്ട് പ്രത്യേകം പറയേണ്ടതില്ലെന്നതുകൊണ്ടാണ്. ഈ പറഞ്ഞതൊക്കെ എട്ടാം ക്ലാസ് സയൻസ് ക്ലാസിൽ ഇരുന്നിട്ടുണ്ടെങ്കിൽ തോന്നേണ്ട സംശയങ്ങളാണ്. അവകാശവാദങ്ങളൊക്കെ നൂറുകണക്കിനുണ്ടായിരിക്കാം. പക്ഷേ അത് പത്രത്തിൽ നൽകുന്നതിന് മുൻപ് അടിസ്ഥാനപരമായ ഒരു ഫാക്റ്റ് ചെക്ക് എങ്കിലും നടത്തി വിശദീകരണം കൂടി ഉൾപ്പെടുത്തിയാൽ നന്നായിരുന്നു. മരണപ്പെട്ടയാൾക്ക് അനുശോചനങ്ങൾ.