മീടൂ ആരോപണ കേസിൽ പോലീസിന്റെ കണ്ണുവെട്ടിച്ച് നടക്കുകയാണ് പ്രമുഖ മേക്കപ്പ് ആര്‍ട്ടിസ്റ്റ് അനീസ് അന്‍സാരി. സിനിമാ താരങ്ങളുടെ മേക്കപ്പ് ജോലികള്‍ ചെയ്ത് പ്രസിദ്ധനായ ഇയാള്‍ മുന്‍പ് പ്രമുഖ മാധ്യമ സ്ഥാപനത്തിന്റെ മേക്കപ്പ് മാനായിരുന്നു. ചാനല്‍ ബന്ധം ഉപയോഗിച്ച്‌ താരങ്ങളുടെ മേക്കപ്പ് ചെയ്ത് സോഷ്യല്‍ മീഡിയയില്‍ പ്രസിദ്ധി നേടുകയും പിന്നീട് സ്വന്തം സ്ഥാപനം തുടങ്ങുകയുമായിരുന്നു.

ഇന്‍സ്റ്റാഗ്രാം അക്കൗണ്ടില്‍ മുന്‍നിര നടിമാരുടെ മേക്കപ്പ് ആര്‍ട്ടിസ്റ്റാണെന്ന് മനസ്സിലാക്കി നിരവധി പേരാണ് അനീസിനെ സമീപിച്ചത്. ഉന്നത കുടുംബങ്ങളില്‍ നിന്നുള്ളവരാണ് ഏറെയും എത്തിയത്. തുടക്ക കാലത്ത് തന്നെ, അതായത് 2015 മുതല്‍ ഇയാള്‍ ഒരു വിവാഹ മേക്കപ്പിന് മുപ്പതിനായിരം രൂപ മുതലായിരുന്നു വാങ്ങിയത്.

വൈറ്റിലയ്ക്ക് സമീപം ചക്കരപറമ്പിലാണ് അനീസ് അന്‍സാ മേക്കപ്പ് സ്റ്റുഡിയോ പ്രവർത്തിക്കുന്നത്. സുന്ദരികളായ പെണ്‍കുട്ടികൾ എത്തുമ്പോൾ മാത്രമാണ് അനീസ് മേക്കപ്പ് ചെയ്തിരുന്നത്. മറ്റുള്ളവരെ മറ്റ് ജോലിക്കാരുമാണ് മേക്കപ്പ് ചെയ്തിരുന്നത്. മേക്കപ്പ് ചെയ്യുമ്പോള്‍ അനീസ് മാത്രമായിരിക്കും പെണ്‍കുട്ടികള്‍ക്കൊപ്പം ഉണ്ടാവുക. ആ റൂമിലേക്ക് കൂടെയുള്ളവരെയോ മറ്റ് ജോലിക്കാരെയോ കയറ്റിയിരുന്നില്ല.

ഈ അവസരം മുതലാക്കിയാണ് ഇയാള്‍ സ്ത്രീകളുടെ ശരീരത്തില്‍ ലൈംഗികാതിക്രമം കാട്ടിയിരുന്നത്. പലരും വിവാഹ തലേന്ന് മേക്കപ്പ് ചെയ്യാന്‍ വരുന്നതു കൊണ്ട് വലിയ ഒച്ചപ്പാട് ഉണ്ടാക്കിയിരുന്നില്ല.ഈ അവസരം ഇയാൾ ശരിക്കും മുതലാക്കുകയായിരുന്നു എന്നുവേണം കരുതുവാൻ.

എന്തെങ്കിലും പ്രശ്നമുണ്ടാക്കി മറ്റുള്ളവര്‍ അറിഞ്ഞാല്‍ വിവാഹം മുടങ്ങുമോ എന്ന് പെൺകുട്ടികൾ ഭയന്നിരുന്നു. അതിനാല്‍ ആരും തന്നെ ഇക്കാര്യം പുറത്ത് പറഞ്ഞിരുന്നില്ല.ഇന്‍സ്റ്റാഗ്രാം വഴി ഇപ്പോള്‍ പലരും മീടു ആരോപണം ഉന്നയിച്ച് എത്തിയതോടെയാണ് ഇയാളുടെ അതിക്രമത്തിന് ഇരയായ പലരും പരാതിയുമായി രംഗത്തേക്ക് വന്നത്.

പരാതിയുടെ പുറത്ത് അനാസാരിക്കെതിരെ പൊലീസ് കേസെടുത്തതോടെ മുന്‍കൂറായി വിവാഹത്തിന് മേക്കപ്പിന് പണം കൊടുത്തവര്‍ ചക്കരപറമ്പിലെ ഇയാളുടെ സ്റ്റുഡിയോയിലെത്തി പണം തിരികെ വാങ്ങാന്‍ കൂട്ടമായി എത്തുകയാണ്. ഇത് വലിയ സംഘര്‍ഷമായതോടെ പൊലീസ് സ്ഥലത്തെത്തി പണം കൃത്യമായി തിരികെ ലഭിക്കാനുള്ള സംവിധാനം ഒരുക്കാമെന്ന് അറിയിച്ചു. എങ്കിലും ഇപ്പോഴും പലരും ഇവിടേക്ക് കൂട്ടമായെത്തുകയാണ്.

രണ്ട് ദിവസമായി സ്റ്റുഡിയോ അടച്ചിട്ട നിലയിലാണ്. പല സ്റ്റാഫുകളും ഇവിടേക്ക് ഇപ്പോള്‍ എത്തുന്നുമില്ല. പൊലീസ് കേസ് ഭയന്നാണ് എത്താത്തത് എന്നാണ് ലഭിക്കുന്ന വിവരം. ദുബായില്‍ ഒരു മേക്കപ്പിന്റെ ആവശ്യത്തിനായി സുഹൃത്തിനൊപ്പം പോയി മടങ്ങിവന്ന അന്‍സാരി ഇപ്പോള്‍ കൊച്ചിയില്‍ തന്നെ ഒളിവില്‍ കഴിയുകയാണ്.

അന്‍സാരിയെ തേടി പൊലീസ് അന്വേഷണം ഊര്‍ജ്ജിതമാക്കിയിട്ടുണ്ട്. ഉടന്‍ തന്നെ ഇയാളെ പൊലീസ് പിടകൂടുമെന്നും സിറ്റി പൊലീസ് കമ്മീഷ്ണര്‍ വ്യക്തമാക്കിയിട്ടുണ്ട്. അതേസമയം അനീസ് കൊച്ചിയില്‍ എത്തിയെന്ന നിഗമനത്തില്‍ രാജ്യം വിടാതിരിക്കാന്‍ ലുക്ക് ഔട്ട് നോട്ടീസും പുറപ്പെടുവിച്ചിട്ടുണ്ട്. ഓസ്ട്രേലിയന്‍ യുവതിയുടെ പരാതിയിലും പൊലീസ് കേസെടുക്കും.