നീണ്ട ഒരു ഇടവേളയ്ക്ക് ശേഷമാണ് മലയാള സിനിമയില്‍ നവ്യാനായര്‍ തിരിച്ചു വരവിനൊരുങ്ങുന്നത്. അതേസമയം നടി ആക്രമിക്കപ്പെട്ട സംഭവത്തില്‍ നടിയ്ക്കൊപ്പമാണെന്ന് താരം ആദ്യം മുതലേ നിലപാട് എടുത്തുപറഞ്ഞിരുന്നു. ഒന്നിച്ച് ഒരുപാട് സിനിമകളില്‍ അഭിനയിച്ചിട്ടുണ്ടെങ്കിലും ഇപ്പോള്‍ ദിലീപിനെ പറ്റിയുള്ള ചോദ്യങ്ങള്‍ ബുദ്ധിമുട്ടുണ്ടാക്കുമെന്ന് തുറന്നു പറഞ്ഞിരിക്കുകയാണ് നവ്യ. ഒരു പ്രമുഖ മാദ്ധ്യമത്തിന് നല്‍കിയ അഭിമുഖത്തിലായിരുന്നു താരം തന്റെ മനസ് തുറന്നത്. 'ദിലീപിനെ പറ്റിയുള്ള ചോദ്യങ്ങള്‍ ബുദ്ധിമുട്ടുണ്ടാക്കും. കാരണം ഇക്കാര്യത്തെ പറ്റി ഞാന്‍ നേരത്തെ പറഞ്ഞിരുന്നു.

പലതും റിലേറ്റീവായി പോവുന്നുണ്ട്. കോടതിയുടെ പരിഗണനയിലിരിക്കുന്ന കേസായതുകൊണ്ട് തന്നെ അതിനെ പറ്റി ആധികാരികമായി പറഞ്ഞ് വഷളാക്കാന്‍ ഞാന്‍ ഉദ്ദേശിക്കുന്നില്ല. എന്റെ സഹപ്രവര്‍ത്തക വളരെയധികം ബുദ്ധിമുട്ട് അനുഭവിച്ചു. എന്നും അവളുടെ കൂടെ തന്നെയാണ് എന്നതില്‍ മാറ്റമില്ല. ഡബ്ല്യുസിസിയില്‍ സജീവമല്ലാത്തതിനെ കുറിച്ചും നവ്യ സംസാരിച്ചു. ' സ്ത്രീകള്‍ക്ക് വേണ്ടി സംസാരിക്കാനായി ഒരിടം എന്ന ഒരു ആശയം നല്ലത് തന്നെയാണ്. മുംബയില്‍ ആയിരുന്നതുകൊണ്ട് എല്ലാ മീറ്റിംഗുകളിലും സ്ഥിരമായി പങ്കെടുക്കാന്‍ കഴിയില്ല.

കുറേക്കാലമായി ഞാന്‍ ഒരു വീട്ടമ്മയായിട്ട് ഇരിക്കുകയാണ്. എല്ലാവരും കൂടി ഇരിക്കുന്ന സ്ഥലത്ത് സ്ത്രീകള്‍ക്ക് ഒരു ബുദ്ധിമുട്ടുണ്ടെങ്കില്‍ അത് പറയാന്‍ നമുക്ക് വിമുഖത വരും. എന്നോട് ഒരാള്‍ മിസ്ബിഹേവ് ചെയ്താല്‍ പോലും അത് എങ്ങനെയാണ് പറയേണ്ടത് എന്ന സങ്കോചം ഇപ്പോഴുമുള്ള ആളാണ് ഞാന്‍. അങ്ങനെ പറയുന്ന ലെവലിലേക്ക് ഞാന്‍ എത്തിയിട്ടില്ല. അത് നല്ലതാണെന്നല്ല പറയുന്നത്. എപ്പോഴും തുറന്ന് പറയുന്നതാണ് നല്ലത്. അങ്ങനെ പറയാന്‍ കഴിയണം.ഒരുപക്ഷേ അത് വളര്‍ന്നു വന്ന സാഹചര്യത്തിന്റേതാകാം.

ആ സ്റ്റിഗ്മ മാറണം.' എന്നും അവർ പറഞ്ഞിരുന്നു. അതോടൊപ്പം തന്നെ ഒരേ കാലഘട്ടത്തില്‍ മലയാള സിനിമയില്‍ തിളങ്ങിയ താരങ്ങളാണെങ്കിലും താനും കാവ്യാമാധവനും തമ്മില്‍ വ്യക്തിപരമായി സുഹൃത്തുക്കളല്ലെന്നും നവ്യ ചൂണ്ടിക്കാണിച്ചു. നീണ്ട ഒരിടവേളയ്ക്ക് ശേഷം മലയാളത്തിൽ ഒരുത്തീ എന്ന സിനിമയിലൂടെയാണ് താരം എത്തുന്നത്.