സില്‍വര്‍ലൈന്‍ പദ്ധതിയുടെ വിശദമായ പദ്ധതിരേഖ പറഞ്ഞുകേട്ടതിനേക്കാള്‍ വലിയ അബദ്ധമാണെന്നു ചൂണ്ടിക്കാട്ടി ഡിഎംആര്‍സി മുന്‍ മുഖ്യഉപദേഷ്ടാവ് മെട്രോമാന്‍ ഡോ.ഇ.ശ്രീധരന്‍ മുഖ്യമന്ത്രി പിണറായി വിജയനു വീണ്ടും കത്തെഴുതി. ഇതിനിടെ കെ റയില്‍ വിഷയത്തില്‍ ഒരു വിട്ടുവീഴ്ചയും ഇല്ലെന്ന് പറഞ്ഞിരുന്ന സര്‍ക്കാര്‍ ഇപ്പോള്‍ മുട്ടുമടക്കുന്ന സൂചനകള്‍ കൂടി പുറത്ത് വരികയാണ്.

സില്‍വര്‍ലൈനുമായി ബന്ധപ്പെട്ട് നിയമസഭയില്‍ ചര്‍ച്ച നടത്താമെന്ന് മുഖ്യമന്ത്രി പിണറായി വിജയന്‍ പറഞ്ഞു. സില്‍വര്‍ ലൈന്‍ കല്ലിടലുമായി ബന്ധപ്പെട്ട ജനങ്ങളുടെ പ്രതിഷേധം പോലീസിനെ ഉപയോഗിച്ച് അടിച്ചമര്‍ത്തുന്നത് സഭ നിര്‍ത്തിവച്ച് ചര്‍ച്ച ചെയ്യണമെന്നാണ് പ്രതിപക്ഷം അടിയന്തര പ്രമേയ നോട്ടീസില്‍ ആവശ്യപ്പെട്ടത്. സഭ നിര്‍ത്തിവച്ച് ചര്‍ച്ചയ്ക്ക് തയാറാണെന്നാണ് മുഖ്യമന്ത്രി അറിയിച്ചത്. ഇതേതുടര്‍ന്ന് പ്രതിപക്ഷത്തിന്റെ അടിയന്തര പ്രമേയ നോട്ടീസിന് സ്പീക്കര്‍ അനുമതി നല്‍കി. രണ്ടാം പിണറായി സര്‍ക്കാര്‍ അധികാരത്തില്‍ വന്നശേഷം ചര്‍ച്ച ചെയ്യുന്ന ആദ്യത്തെ അടിയന്തരപ്രമേയ നോട്ടീസാണിത്. ഏതായാലും കെ. ശ്രീധരന്‍ ഈ വിഷയത്തില്‍ അതിശക്തമായ നിലപാട് വ്യക്തമാക്കുകയാണ്.

കെ റെയില്‍ എംഡിയോ ഗവണ്മെന്റ് സെക്രട്ടറിമാരില്‍ ആരെങ്കിലുമോ ഭയംകൂടാതെ ഈ പൊള്ളത്തരങ്ങള്‍ തുറന്നു പറയുമെന്നായിരുന്നു പ്രതീക്ഷയെന്നും ആ പ്രതീക്ഷ അസ്തമിച്ചിട്ടില്ലെന്നും ഒരു സാധാരണ പൗരനെന്ന നിലയിലുള്ള ആശങ്ക കൊണ്ടാണു വീണ്ടും ഇക്കാര്യം ചൂണ്ടിക്കാട്ടി താങ്കള്‍ക്കു കത്തയയ്ക്കുന്നതെന്നും മുഖ്യമന്ത്രിയെ അറിയിച്ചുകൊണ്ടാണ് ഇ.ശ്രീധരന്‍ കത്ത് അവസാനിപ്പിക്കുന്നത്. സില്‍വര്‍ ലൈന്‍ പദ്ധതി നേരിട്ടു ബാധിക്കുന്നവരേയോ ജനപ്രതിനിധികളെയോ വിവരങ്ങള്‍ ധരിപ്പിക്കാനോ ചര്‍ച്ച ചെയ്യാനോ സര്‍ക്കാര്‍ തയ്യാറായില്ല എന്ന പ്രതിപക്ഷത്തിന്റെ പ്രധാന ആരോപണം ആളിക്കത്തുന്നതിനിടെയാണ് നിയമസഭയില്‍ നിര്‍ണായകമായ നീക്കങ്ങള്‍. ഇ ശ്രീധരന്റെ കണ്ടെത്തലുകള്‍ ഗൗരവമുള്ളതാണ്. സാങ്കേതികമായി ഒട്ടേറെ പിഴവുകളുള്ള കെ റയില്‍ ഡിപിആര്‍ മറ്റൊരിടത്തും കണ്ടിട്ടില്ല. സില്‍വര്‍ലൈന്‍ കടന്നുപോകുന്ന 80 ശതമാനം പ്രദേശങ്ങളിലും ബലക്ഷയം ബാധിച്ച മണ്ണാണുള്ളത്.

ഈ മണ്ണില്‍ രണ്ടുമീറ്റര്‍ ഉയരത്തില്‍പോലും റെയില്‍തിട്ട കെട്ടിയുയര്‍ത്താന്‍ സാധിക്കില്ല. ഭൂമിയേറ്റെടുക്കുന്നതുമായി ബന്ധപ്പെട്ടു വലിയ പ്രക്ഷോഭങ്ങള്‍ നടക്കുകയാണ്. റെയില്‍പാളത്തിനായി ഉണ്ടാക്കുമെന്നു ഡിപിആറില്‍ പറയുന്ന തിട്ടകള്‍ക്കിടയില്‍ ഏകദേശം 3000 ചെറുപാലങ്ങള്‍ ആവശ്യമായി വരും. കൊങ്കണില്‍ ഇത്തരത്തില്‍ 6000 ചെറുപാലങ്ങളുണ്ട്. എന്നാല്‍ ഡിപിആറില്‍ ഇത്തരമുള്ള ചെറുപാലങ്ങളെക്കുറിച്ചോ അതിനായി ആവശ്യമായി വരുന്ന ചെലവിനേക്കുറിച്ചോ ഒരു വരിപോലുമില്ല. ഡിപിആറില്‍ പരാമര്‍ശിക്കുന്ന മട്ടിലാണെങ്കില്‍ ഏകദേശം 3000 ചെറുപാലങ്ങള്‍ക്കു മാത്രം 3000 കോടി രൂപ ചെലവാക്കേണ്ടിവരും. ഇതേക്കുറിച്ചു പരാമര്‍ശമില്ലാത്ത സാഹചര്യത്തില്‍ ഈ ചെലവ് കൂടി കൂട്ടുമ്പോള്‍ പദ്ധതിച്ചെലവ് ഇനിയും വര്‍ധിക്കും.

കേന്ദ്രസര്‍ക്കാരിന്റെ അംഗീകാരമോ അനുമതിയോ ഇല്ലാതെയുള്ള സ്ഥലം ഏറ്റെടുക്കല്‍ വലിയ തെറ്റാണ്. റെയില്‍ ലൈന്‍ പോകേണ്ട ഭൂമിയിലൂടെ ഒരു സെന്‍ട്രല്‍ ലൈന്‍ രേഖപ്പെടുത്തുകയെന്നതുണ്ട്. അതു റെയില്‍വേ ലൈന്‍ സ്ഥാപിക്കുന്നതിലെ അടിസ്ഥാനവും അനിവാര്യവുമായ സംഗതിയാണ്. ഈ സെന്‍ട്രല്‍ മാര്‍ക്കിങ് നടത്തിയാലേ ലൈനിന്റെ ഇടത്തും വലത്തും എത്രമാത്രം വീതിയില്‍ ഭൂമി ആവശ്യമായി വരുമെന്ന് അളന്നുതിട്ടപ്പെടുത്താനാകൂ. ഇതൊന്നും നിശ്ചയിക്കുകയോ അതേക്കുറിച്ച് ആലോചിക്കുകയോ പോലും ചെയ്യാതെ നാട്ടിലാകെ കെ റെയില്‍ എന്ന പേരില്‍ ഭൂമിയേറ്റെടുക്കല്‍ നടത്തുന്നത് ഗൗരവമേറിയ വിഷയമാണ്.