ശബരിമല വിമാനത്താവളത്തിന് പച്ചക്കൊടി; വിമാനത്താവളം തീര്‍ത്ഥാടക ടൂറിസത്തിന് വളര്‍ച്ചയുണ്ടാക്കുമെന്ന് പാര്‍ലമെന്ററി സമിതിയുടെ വിലയിരുത്തല്‍; പദ്ധതിയുമായി ബന്ധപ്പെട്ട പ്രതിസന്ധികള്‍ പരിഹരിക്കുന്നതിന് വ്യോമ, പ്രതിരോധ മന്ത്രാലയങ്ങള്‍ കെഎസ്‌ഐഡിസിയുമായി ചര്‍ച്ച നടത്തണമെന്ന് നിർദേശം
ശബരിമല വിമാനത്താവളത്തിന് പച്ചക്കൊടി. പദ്ധതി യാഥാര്‍ഥ്യമാകേണ്ടതാണെന്ന് പാര്‍ലമെന്റിന്റെ ഗതാഗത, ടൂറിസം സമിതിയുടെ റിപ്പോര്‍ട്ടില്‍ പറയുന്നു.ബിജെപി എംപി ടിജി വെങ്കിടേഷാണ് സമിതിയുടെ അധ്യക്ഷന്‍. വിമാനത്താവളം തീര്‍ത്ഥാടക ടൂറിസത്തിന് വളര്‍ച്ചയുണ്ടാക്കുമെന്നാണ് സമിതിയുടെ വിലയിരുത്തല്‍.
തിരുവനന്തപുരം, കൊച്ചി ടൂറിസം സര്‍ക്യൂട്ടുമായി ശബരിമലയെ ബന്ധിപ്പിക്കാന്‍ ടൂറിസം മന്ത്രാലയം മുന്നോട്ടുവരണമെന്നും പദ്ധതിയുമായി ബന്ധപ്പെട്ട പ്രതിസന്ധികള്‍ പരിഹരിക്കുന്നതിന് വ്യോമ, പ്രതിരോധ മന്ത്രാലയങ്ങള്‍ കെഎസ്‌ഐഡിസിയുമായി ചര്‍ച്ച നടത്തണമെന്നും സമിതി നിര്‍ദ്ദേശിച്ചു. പദ്ധതിക്കായി വ്യോമസേനയുടെ 'സൈറ്റ് ക്ലിയറന്‍സ്' ലഭിച്ചിട്ടുണ്ടെങ്കിലും മറ്റ് നടപടികള്‍ പൂര്‍ത്തിയായിട്ടില്ലെന്ന് റിപ്പോര്‍ട്ടില്‍ പറയുന്നു.
എരുമേലി ചെറുവള്ളി എസ്റ്റേറ്റില്‍ വിമാനത്താവളത്തിന് അനുമതി തേടി കെഎസ്‌ഐഡിസി 2020 ജൂണില്‍ വ്യോമയാന മന്ത്രാലയത്തെ സമീപിച്ചിട്ടുണ്ട്. പദ്ധതിയുടെ സാമ്ബത്തിക, സാങ്കേതിക സാധ്യതാ പഠന റിപ്പോര്‍ട്ട് ഡിസംബറില്‍ നല്‍കാമെന്ന് കെഎസ്‌ഐഡിസി അറിയിച്ചിട്ടുണ്ടെങ്കിലും, ഇതുവരെ ലഭിച്ചിട്ടില്ലെന്നും റിപ്പോര്‍ട്ടില്‍ വ്യക്തമാക്കുന്നു.
https://www.facebook.com/Malayalivartha
