പോക്‌സോ കേസില്‍ അറസ്റ്റിലായ നമ്പര്‍18 ഹോട്ടല്‍ ഉടമ റോയ് വയലാറ്റും കൂട്ടുപ്രതി സൈജു തങ്കച്ചനും കുടുങ്ങിയിരിക്കുകയാണ്. ഇരുവരെയും കോടതി റിമാന്‍ഡ് ചെയ്തു. കോടതിയില്‍ ഹാജരാക്കുന്നതിനു മുന്‍പ് റോയ് വയലാറ്റിന് ആരോഗ്യ പരിശോധന നടത്തിയപ്പോള്‍, രക്തസമ്മര്‍ദം ഉയര്‍ന്നിരുന്നതിനാല്‍ നിരീക്ഷണത്തിലാക്കി. പോക്‌സോ കേസുകള്‍ പരിഗണിക്കുന്ന സെഷന്‍സ് കോടതി ജഡ്ജി ആശുപത്രിയിലെത്തിയാണ് റോയ് വയലാറ്റിനെ റിമാന്‍ഡ് ചെയ്തത്.

അതേസമയം ഗുരുതര ആരോപണവുമായി പരാതിക്കാരി രംഗത്തെത്തി. പോക്‌സോ കേസില്‍ മൊഴി മാറ്റിപ്പറയാന്‍ നമ്പര്‍18 ഹോട്ടല്‍ ഉടമ റോയ് വയലാറ്റ് 50 ലക്ഷം രൂപ വാഗ്ദാനം ചെയ്‌തെന്നാണ് പരാതിക്കാരി പറയുന്നത്. അഞ്ജലിയെ കുടുക്കിത്തരാമെന്ന ഉറപ്പു നല്‍കിയെന്നും റോയിയുടെ പ്രതിനിധി എന്നു പറഞ്ഞ് എത്തിയ അഭിഭാഷകന്‍ പറഞ്ഞതായി ഇവര്‍ പറയുന്നു. കേസിലെ മൂന്നാം പ്രതി കോഴിക്കോട് സ്വദേശിനി അഞ്ജലി റീമദേവ് തനിക്കു നല്‍കാനുള്ള പണം റോയ് തിരികെ നല്‍കുമെന്നാണ് അറിയിച്ചത്.

ലഭിക്കാനുള്ള 15 ലക്ഷം രൂപ എന്നു പറഞ്ഞത് 50 ലക്ഷം എന്നു കേട്ടപ്പോള്‍, ഇത്ര വലിയ തുക റോയ് തരുമെന്ന് അറിയിക്കുകയായിരുന്നത്രെ. പരാതി നല്‍കിയ ശേഷം കോഴിക്കോട് എത്തിയപ്പോഴായിരുന്നു, കോഴിക്കോട് സ്വദേശിയായ ഒരു സാമൂഹിക പ്രവര്‍ത്തകനൊപ്പം എത്തി പണം വാഗ്ദാനം ചെയ്തതെന്ന് ഇവര്‍ പറയുന്നു.

നിനക്ക് എത്രയാണോ തരാനുള്ളത് അത് തരാന്‍ റോയ് തയാറാണ്. ഇപ്പോള്‍ നിനക്ക് ഒന്നും ചെയ്യാന്‍ സാധിക്കില്ല, അറസ്റ്റിലായാല്‍ ഒരു 35 ദിവസം അകത്തു കിടക്കും. അതു കഴിഞ്ഞു പുറത്തിറങ്ങും. അതു കഴിയുമ്പോള്‍ വിചാരണ സമയത്ത് നിങ്ങള്‍ക്കു താല്‍പര്യമില്ലാത്തതു പോലെ ഒന്ന് അയഞ്ഞാല്‍ മതി.

കൂറു മാറുക എന്നു പറയുന്ന കുറെ സംഭവങ്ങളുണ്ട്, അതാക്കിയാല്‍ റോയ് രക്ഷപ്പെടും. അല്ലെങ്കില്‍ റോയിക്ക് 20 വര്‍ഷം കിട്ടും. അഞ്ജലിയെ വേണമെങ്കില്‍ നമുക്കു കുരുക്കാം, അഞ്ജലിക്കെതിരെ കുറെ സംഭവങ്ങള്‍ എന്റെ കയ്യിലുണ്ട്. അവര്‍ക്കെതിരെ സമീപിച്ചവരുടെ ലിസ്റ്റുണ്ട്. അവരെ കുടുക്കിത്തരാം, അഞ്ജലിയല്ലേ നിങ്ങളുടെ ടാര്‍ജറ്റ് എന്ന് ചോദിച്ചു. എന്റെ ഓഫിസിലെത്തിയാണ് സംസാരിച്ചത്.

അഞ്ജലി എനിക്കു 15 തരാനുണ്ട് എന്നു പറഞ്ഞത് അവര്‍ കേട്ടത് 50 എന്നാണ് തോന്നിയത്. റോയ് എന്തിനാണ് തരുന്നതെന്ന് അപ്പോള്‍തന്നെ ചോദിക്കുകയും ചെയ്തു. അവരൊക്കെ ഒറ്റക്കെട്ടാണെന്നായിരുന്നു അയാളുടെ മറുപടി. ഇക്കാര്യം പൊലീസിനോടു പറഞ്ഞിട്ടുണ്ടെന്നും പരാതിക്കാരി വെളിപ്പെടുത്തി.

കഴിഞ്ഞ ദിവസം രാവിലെ 10ന് കളമശേരി മെട്രോ പൊലീസ് സ്‌റ്റേഷനില്‍ കീഴടങ്ങിയ സൈജുവിനെ അപ്പോള്‍തന്നെ ചോദ്യം ചെയ്തിരുന്നു. ഞായറാഴ്ച കീഴടങ്ങിയ റോയ് വയലാറ്റിനൊപ്പവും ചോദ്യം ചെയ്തു. തുടര്‍ന്ന് സൈജുവിനെ അന്വേഷണസംഘം കൊച്ചിയിലെ സ്വകാര്യ ഹോട്ടലിലെത്തിച്ച് തെളിവെടുത്തശേഷമാണ് അറസ്റ്റ് രേഖപ്പെടുത്തിയത്.

റോയ് വയലാറ്റിനെയും സൈജു തങ്കച്ചനെയും ഉച്ചയ്ക്കു 2നാണ് കൊച്ചി കമ്മിഷണര്‍ ഓഫിസില്‍നിന്ന് കോടതിയിലേക്കു കൊണ്ടുപോയത്. കോടതിയിലേക്കുള്ള യാത്രയ്ക്കിടെ ഇരുവരെയും ആരോഗ്യ പരിശോധനയ്ക്കു വിധേയമാക്കി. കോടതിയില്‍ ഹാജരാക്കിയപ്പോള്‍ സൈജുവിനെ പൊലീസ് കസ്റ്റഡിയില്‍ വിട്ടുനല്‍കി. മാര്‍ച്ച് 16 വരെയാണ് സൈജുവിനെ പൊലീസ് കസ്റ്റഡിയില്‍ വിട്ടത്.

പരാതിക്കാരിയെയും മറ്റു പെണ്‍കുട്ടികളെയും കൊച്ചിയിലെത്തിച്ച വാഹനം കണ്ടെത്തണമെന്നും പ്രതികള്‍ക്കെതിരെ മറ്റു കേസുകളുണ്ടോ എന്നു പരിശോധിക്കണമെന്നും പൊലീസിന്റെ റിമാന്‍ഡ് റിപ്പോര്‍ട്ടില്‍ പറയുന്നു. കേസില്‍ മുന്‍കൂര്‍ ജാമ്യം ലഭിച്ച മൂന്നാം പ്രതി അഞ്ജലി റിമാദേവിന് ചോദ്യം ചെയ്യലിനു ഹാജരാവാന്‍ നോട്ടിസ് നല്‍കി. ബുധനാഴ്ച ഹാജരാകാനാണ് നിര്‍ദേശം.