സോളാര് നായികയും ഞെട്ടി... ശരവേഗത്തില് സോളാര് നായികയുടെ പരാതിയില് നടപടിയെടുത്ത പോലീസിനെ പോലും ഞെട്ടിപ്പിച്ച് പിസി ജോര്ജ് പുറത്തിറങ്ങി; പീഡന കേസില് പിസിയെ പൂട്ടിയെന്ന് കരുതിയവര്ക്ക് തെറ്റി; പുറത്തിറങ്ങിയ പിസി ജോര്ജ് ദൈവത്തിന് നന്ദി പറഞ്ഞു
വല്ലാത്തൊരു ട്വിസ്റ്റായിരുന്നു ഇന്നലെ. എല്ലാം ആഴ്ചകള്ക്ക് മുമ്പ് പിസിയെ ഈരാട്ടുപേട്ടയില് പോയി പൊക്കിയത് പോലെയായി കാര്യങ്ങള്. പിസി ജോര്ജിനെ പൊക്കാന് പോലീസുകാര് മാസ്റ്റര് ബ്രെയിനും പ്ലാന് ബിയും പുറത്തെടുത്തപ്പോള് പുറത്തിറങ്ങാന് പിസിയ്ക്ക് സാദാ വക്കീല് മാത്രമേ വേണ്ടി വന്നുള്ളൂ.
അങ്ങനെ പിസി ജോര്ജിന് ജാമ്യം ലഭിച്ചു. പീഡന പരാതിയില് ജാമ്യം ലഭിച്ചതിന് പിന്നാലെ ദൈവത്തിന് നന്ദി പറഞ്ഞ് പിസി ജോര്ജ് പുറത്തിറങ്ങി. ഒന്നാം ക്ലാസ് മജിസ്ട്രേറ്റ് മൂന്നാണ് പി സി ജോര്ജിന് ജാമ്യം അനുവദിച്ചത്. മുഖ്യമന്ത്രി പിണറായി വിജയനെ വിമര്ശിച്ചു കൊണ്ടായിരുന്നു പി സി ജോര്ജിന്റെ ആദ്യ പ്രതികരണം.
സ്വര്ണക്കടത്ത് കേസില് മുഖ്യമന്ത്രിക്കും മകള്ക്കുമെതിരെ പുതിയ ആരോപണങ്ങളും ജോര്ജ് ഉന്നയിച്ചു. നേരത്തെ സിപിഎം വിഭാഗീയതയുടെ കാലത്ത് പിണറായിയുമായി ചേര്ത്ത് ഉയര്ന്ന വ്യവസായി ഫാരിസ് അബൂബക്കറിറെ പേരും ജോര്ജ് പറഞ്ഞതോടെ വിവാദം കൂടുതല് മുറുകുകയാണ്. ഇപ്പോഴത്തെ കേസിന് പിന്നില് പിണറായി വിജയനും ഫാരിസ് അബൂബക്കറുമാണെന്ന് പി സി ജോര്ജ് ആരോപിക്കുന്നത്.
ഹാരിസിന്റെ നിക്ഷേപങ്ങളില് പിണറായി വിജയന് പങ്കുണ്ടെന്നും ആരോപിച്ച പി സി ജോര്ജ്, മുഖ്യമന്ത്രിയുടെ അമേരിക്കന് ബന്ധം വിശദമായി അന്വേഷിക്കണമെന്നും ആവശ്യപ്പെട്ടു. പിണറായി വിജയനെതിരെ അന്വേഷണ ഏജന്സികള്ക്ക് പരാതി നല്കുമെന്ന് പറഞ്ഞ പി സി ജോര്ജ്, വീണയുടെ കമ്പനിയുടെ സാമ്പത്തിക സ്രോതസും എക്സാലോജിക്കിന്റെ ഇടപാടുകള് അന്വേഷിക്കണമെന്നും അവശ്യപ്പെട്ടു.
അതേസമയം മാധ്യമപ്രവര്ത്തകയോട് മോശമായി സംസാരിച്ചതിന്പി സി ജോര്ജ് ക്ഷമ ചോദിച്ചു. അറസ്റ്റിന് ശേഷം മാധ്യമങ്ങളെ കണ്ടപ്പോള് നിയമവിരുദ്ധമായി പി സി ജോര്ജ്ജ് പരാതിക്കാരിയുടെ പേര് പറഞ്ഞിരുന്നു. ഇക്കാര്യം ചൂണ്ടിക്കാട്ടിയ മാധ്യമപ്രവര്ത്തകയോട് പിന്നെ നിങ്ങളുടെ പേര് പറയണോ എന്ന് പിസി ജോര്ജ്ജ് ക്ഷുഭിതനായി ചോദിച്ചു. ഇതിനാണ് മാധ്യമപ്രവര്ത്തകയോട് ക്ഷമ ചോദിച്ചത്.
അതേസമയം പീഡന പരാതിയിലെടുത്ത കേസില് ഉപാധികളോടെയാണ് കോടതി പി സി ജോര്ജിന് ജാമ്യം അനുവദിച്ചിരിക്കുന്നത്. വാദം പൂര്ത്തിയാക്കി രണ്ട് മണിക്കൂറിന് ശേഷമാണ് ഉത്തരവുണ്ടായത്. ഒന്നാം ക്ലാസ് മജിസ്ട്രേറ്റ് മൂന്നാണ് ജാമ്യം അനുവദിച്ചത്. കേസില് കുറ്റപത്രം സമര്പ്പിക്കുന്നതുവരെയോ മൂന്നു മാസം വരെയോ എല്ലാ ശനിയാഴ്ചയും രാവിലെ 10 മണിക്കും ഒരു മണിക്കും ഇടയില് അന്വേഷണ ഉദ്യോഗസ്ഥന് മുന്നില് ഹാജരാകണം, പരാതിക്കാരിയോ സാക്ഷികളെയോ സ്വാധീനിക്കരുത് തുടങ്ങിയവയാണ് ഉപാധികള്.
ജാമ്യം നല്കരുതെന്ന് പ്രോസിക്യൂഷന് ശക്തമായി വാദിച്ചിരുന്നു. മത വിദ്വേഷ പ്രസംഗമടക്കം മറ്റ് കേസുകളിലും പ്രതിയാണ്. ജാമ്യം ലഭിച്ചാല് സാക്ഷികളെ സ്വാധീനിക്കും. കോടതി നല്കിയ ജാമ്യ വ്യവസ്ഥ ലംഘിച്ച പ്രതിയാണെന്നും പ്രോസിക്യൂഷന് വാദിച്ചു. പി.സി.ജോര്ജ് നിലവില് ഒമ്പത് കേസുകളില് പ്രതിയാണ്.
പരാതിക്കാരിക്ക് വിശ്വാസ്യതയില്ലന്ന് പ്രതിഭാഗം വാദിച്ചു. അവര് മുന് മുഖ്യമന്ത്രിക്കെതിരെ അടക്കം ബലാത്സംഗ പരാതി നല്കിയിട്ടുണ്ട്. രാഷ്ട്രീയമായി കെട്ടിച്ചമച്ച കേസാണ് ഇത്. പി സി ജോര്ജ് ഹൃദ്രോഗിയാണ്, രക്തസമ്മര്ദ്ദമുണ്ട്. ജയിലിലടയ്ക്കരുതെന്നും പ്രതിഭാഗം വാദിച്ചു. കേസ് രാഷ്ട്രീയ പ്രേരിതമാണ്. കര്ട്ടന് പിന്നില് മറ്റ് പലരുമാണ്. പരാതിക്കാരിയെ കൊണ്ട് കള്ള പരാതി നല്കി. പി.സി. ജോര്ജിന് ആരോഗ്യ പ്രശ്നങ്ങളുണ്ടെന്നും ജോര്ജിന്റെ അഭിഭാഷകന് വാദിച്ചു.
പരാതിയുണ്ടോയെന്ന് കോടതി ജോര്ജിനോട് ചോദിച്ചു. തന്നെ ക്രൈം ബ്രാഞ്ച് കേസുമായി ബന്ധപ്പെട്ടാണ് വിളിച്ചു വരുത്തിയത്. ഇത്തരം ഒരു പരാതി ഉള്ള കാര്യം താന് അറിയുകയോ അറിയിക്കുകയോ ചെയ്തില്ല. തനിക്ക് നിയമ നടപടികള്ക്കുള്ള സമയം ലഭിച്ചില്ല. നിരവധി ആരോഗ്യ പ്രശ്നങ്ങളുണ്ടെന്നും കോടതിയോട് ജോര്ജ് പറഞ്ഞിരുന്നു. ഇതോടെയാണ് പ്ലാന് ബി പൊളിഞ്ഞ് ജാമ്യം കിട്ടിയത്.
https://www.facebook.com/Malayalivartha
