പ്രചരിപ്പിക്കപ്പെടുന്നതു പോലെ മതം മാറിയതിനല്ല രാജ്യദ്രോഹകുറ്റത്തിനാണ് ദേവസഹായംപിള്ള ശിക്ഷിക്കപ്പെട്ടത്; തെളിവു സഹിതം ചൂണ്ടിക്കാട്ടി മാര്പ്പാപ്പയ്ക്ക് തിരുവിതാംകൂര് രാജകുടംബം കത്തയച്ചു
ഇപ്പോള് പ്രചരിപ്പിക്കപ്പെടുന്നതു പോലെ മതം മാറിയതിനല്ല രാജ്യദ്രോഹകുറ്റത്തിനാണ് ദേവസഹായംപിള്ള ശിക്ഷിക്കപ്പെട്ടതെന്നു തെളിവു സഹിതം ചൂണ്ടിക്കാട്ടി മാര്പ്പാപ്പയ്ക്ക് തിരുവിതാംകൂര് രാജകുടംബം കത്തയച്ചു. രാജ്യത്തിന്റെ ശത്രുക്കളോടൊപ്പം ചേര്ന്നതിനും രാജാവിനോട് കൂറുപുലര്ത്താത്തിതിനുമാണ് ശിക്ഷിച്ചതെന്ന് കത്തില് വിശദീകരിക്കുന്നു.
കൊട്ടാരത്തിലെ പൂയംതിരുനാള് ഗൗരിപാര്വതീബായിയും അശ്വതിതിരുനാള് ഗൗരിലക്ഷ്മീബായിയും ചേര്ന്നാണ് കത്തയച്ചിട്ടുള്ളത്. കത്തിന്റെ പകര്പ്പ് വിദേശകാര്യമന്ത്രാലയത്തിനും നല്കിയിട്ടുണ്ട്. ദേവസഹായം പിള്ളയെ വിശുദ്ധനായി പ്രഖ്യാപിച്ചതിന്റെ പിന്നാലെ തങ്ങളുടെ പൂര്വികനായ അനിഴം തിരുനാള് മാര്ത്താണ്ഡവര്മ മഹാരാജാവിനെ മതവിദ്വേഷിയായി ചിലര് ചിത്രീകരിക്കാന് ആരംഭിച്ചിരുന്നു. കൊട്ടരത്തിനിതില് വിഷമമുണ്ടെന്നും കത്തില് പറയുന്നു.
കുളച്ചല് യുദ്ധത്തില് പരാജയപ്പെട്ടശേഷം തിരുവിതാങ്കൂര് മഹാരാജാവിന്റെ വിശ്വസ്ഥനും സൈന്യാധിപനുമായി മാറിയ ഡിലനോയിയുടെ പ്രേരണയിലാണ് ദേവസഹായം പിള്ള മതം മാറിയത്. മഹാരാജാവിനുമേല് വലിയ സ്വാധീനം ഉണ്ടായിരുന്ന ഡിലനോയി ഇക്കാരണത്താല് തന്നെ ദേവസഹായം പിള്ളയെ കൈവെടിയില്ലായിരുന്നു എന്ന് ട്രാവന്കൂര് സ്റ്റേറ്റ് മാനുവലില് നാഗം അയ്യ പറയുന്നുണ്ട്.
രാജാവുമായി യുദ്ധം തുടര്ന്ന ഡച്ചുകാര് ഉള്പ്പെടെയുള്ള തിരുവിതാങ്കൂറിന്റെ ശത്രുക്കളുമായി സഹകരിച്ചതുകൊണ്ടാണ് ദേവസഹായം പിള്ള ശിക്ഷിക്കപ്പെട്ടത്. വേറേയും തെറ്റുകള് അദ്ദേഹം രാജ്യത്തോട് ചെയ്തിട്ടുണ്ട്. അവ സൂചിപ്പിക്കുന്നില്ലന്നും കത്തില് പറയുന്നു. തന്റെ പ്രവചനങ്ങളില്പ്പെട്ട മറ്റു വിശ്വാസികളോട് മഹാരാജാവ് ഒരുവിവേചനവും കാണിച്ചിരുന്നില്ല.
രാജവംശത്തിന്റെ മതനിരപേക്ഷ നിലപാടിലൂടെ ഏറ്റവും കൂടുതല് സഹായം ലഭിച്ചിട്ടുള്ളത് കത്തോലിക്കക്കാര്ക്കാണെന്നും കത്തില് പറയുന്നു. വരാപ്പുഴയിലെ ക്രൈസ്തവ ദേവാലയത്തിന് മാര്ത്താണ്ഡവര്മ കരമൊഴിവാക്കി സ്ഥലം നല്കിയതും ഉദയഗിരിയില് പള്ളിപണിയാനുള്ള പണം ഡിലനോയിയുടെ ആവശ്യപ്രകാരം നല്കിയതും കാര്ത്തിക തിരുനാള് മഹാരാജാവാണ്. പള്ളിവികാരിക്ക് 100 പണം വേതനമായി നല്കിയതും ചരിത്രരേഖകളെ ഉദ്ധരിച്ച് കത്തില് വിവരിക്കുന്നുണ്ട്.
കത്തോലിക്കരോട് തിരുവിതാംക്കൂര് മഹാരാജാക്കന്മാര് കാണിച്ചരുന്ന ഉദാരമനസ്കതയ്ക്ക് നന്ദി അറിയിച്ചുകൊണ്ട് 1774-ല് കാര്ത്തിക തിരുനാള് മഹാരാജാവിന് ക്ലെമന്റ് പതിന്നാലാമന് മാര്പ്പാപ്പയും അറുപതാം പിറന്നാള് ആഘോഷിക്കുന്ന വേളയില് ശ്രീമൂലം തിരുനാള് മഹാരാജാവിന് ബെനഡിക്ട് പതനഞ്ചാമന് മാര്പ്പാപ്പയും എഴുതിയകത്തുകളും ഉദ്ധരിക്കുന്നുണ്ട്. സഭയുടെ ആഗ്രഹങ്ങള്ക്കും തീരുമാനങ്ങള്ക്കും തങ്ങള് തടസം സൃഷ്ടിക്കുകയല്ലെന്നും മഹാരാജാക്കന്മാരെ തെറ്റായി ചിത്രീകരിക്കുന്നതിനെതിരെ നടപടിയെടുക്കണമെന്നും കവടിയാര് കൊട്ടാരം മാര്പ്പോപ്പയോട് ആവശ്യപ്പെട്ടിട്ടുണ്ട്.
https://www.facebook.com/Malayalivartha
