എ.കെ.ജി സെന്ററിനു നേര്‍ക്ക് ബോംബാക്രമണമുണ്ടായതിന്റെ തൊട്ടടുത്ത നിമിഷം, എല്‍.ഡി.എഫ് കണ്‍വീനര്‍ ഇ.പി.ജയരാജന്‍ പ്രതിക്കൂട്ടിലാക്കിയത് കോണ്‍ഗ്രസിനെ. പിന്നാലെ, ആക്രമണത്തിനെതിരെ പാര്‍ട്ടി നേതാക്കള്‍ ആവേശത്തോടെ പ്രതികരിച്ചെങ്കിലും, തുടര്‍ന്നുള്ള കേസന്വേഷണത്തിലും പ്രതിയെ പിടികൂടുന്നതിലും ആ ഉത്സാഹം കാണാത്തത് ചര്‍ച്ചയായി. സംഭവം നടന്ന് മൂന്നു ദിവസം കഴിഞ്ഞിട്ടും, എ.കെ.ജി സെന്ററിനു കല്ലെറിയുമെന്ന ഫേസ്ബുക്ക് പോസ്റ്റിട്ട റിജു എന്നൊരാളെ അറസ്റ്റ് ചെയ്ത് ജാമ്യത്തില്‍ വിട്ടതു മാത്രമാണ് കേസിലെ പുരോഗതി.ബോംബാക്രമണം ഇ.പി.ജയരാജന്റെ തന്നെ നാടകമാണെന്ന കെ.പി.സി.സി പ്രസിഡന്റ് കെ.സുധാകരന്റെയും മുഖ്യമന്ത്രിക്കെതിരായ സ്വപ്നയുടെ ആരോപണങ്ങളില്‍ നിന്ന് ജനശ്രദ്ധ തിരിക്കാനുള്ള തന്ത്രമാണെന്ന പ്രതിപക്ഷ നേതാവ് വി.ഡി.സതീശന്റെയും ആരോപണങ്ങളെ ശക്തമായി പ്രതിരോധിക്കാന്‍ പോലുമാവാത്ത സ്ഥിതി.

മുഖ്യമന്ത്രിക്കെതിരായ സ്വപ്നയുടെ ആരോപണങ്ങളുമായി ബന്ധപ്പെട്ട ഗൂഢാലോചനക്കേസില്‍ ചോദ്യം ചെയ്യാന്‍ പൊലീസ് വിളിച്ചുവരുത്തിയ പി.സി.ജോര്‍ജിനെ സോളാര്‍ കേസ് പ്രതിയുടെ പീഡന പരാതിയില്‍ അറസ്റ്റ് ചെയ്തതിനു പിന്നിലെ നാടകീയതകളും, ജോര്‍ജിന് ജാമ്യം ലഭിച്ചതും

സര്‍ക്കാരിന് ക്ഷീണമായി. പ്രതിപക്ഷത്തിന്റെ കടന്നാക്രമണങ്ങളെ നേരിടാന്‍ മറുതന്ത്രങ്ങളുമായി ഭരണപക്ഷവും കളം നിറയുന്നതോടെ, സഭാന്തരീക്ഷം ഇന്നു കൂടുതല്‍ പ്രക്ഷുബ്ധമാകും.

മുഖ്യമന്ത്രിയുടെയും കുടുംബത്തിന്റെയും മുന്‍മന്ത്രി കെ.ടി. ജലീലിന്റെയും പേരിലുള്ള വിവാദം അവസാനിപ്പിച്ചില്ലെങ്കില്‍ വകവരുത്തുമെന്ന് സ്വര്‍ണക്കടത്ത് കേസ് പ്രതി സ്വപ്‌ന സുരേഷിന് ഭീഷണി ഫോണ്‍കാള്‍. കെ.ടി.ജലീല്‍ പറഞ്ഞിട്ട് വിളിക്കുകയാണെന്ന് അറിയിച്ച് മലപ്പുറം പെരിന്തല്‍മണ്ണ അങ്ങാടിപ്പുറം സ്വദേശി നൗഫലാണ് ആറുതവണ ഭീഷണിപ്പെടുത്തിയത്.സ്വപ്നയുടെ പരാതിയില്‍ നൗഫലിനെ മങ്കട പൊലീസ് കസ്റ്റഡിയിലെടുത്തു.ഇയാള്‍ക്ക് മാനസിക പ്രശ്‌നങ്ങളുണ്ടെന്നാണ് പൊലീസ് പറയുന്നത്.
ശനിയാഴ്ച രാവിലെയാണ് കാളുകള്‍ എത്തിയതെന്നും അന്നു രാത്രിതന്നെ ശബ്ദരേഖയും സ്‌ക്രീന്‍ ഷോട്ടുമുള്‍പ്പെടെ പൊലീസ് മേധാവിക്ക് പരാതി നല്‍കിയെന്നും സ്വപ്‌ന കൊച്ചിയില്‍ പറഞ്ഞു. 1.40, 3.22 മിനിട്ട് വീതം ദൈര്‍ഘ്യമുള്ള ശബ്ദരേഖകളും സ്വപ്ന പുറത്തുവിട്ടു. തനിക്കും കുടുംബത്തിനും ജീവന് ഭീഷണിയുണ്ടെന്ന ആശങ്കയും പങ്കുവച്ചു.സ്വപ്ന പാലക്കാട്ടുനിന്ന് കൊച്ചി കൂനമ്മാവിലെ വാടക വീട്ടിലേക്ക് താമസം മാറ്റി.

ഭതട്ടുമെന്ന് പറഞ്ഞാല്‍
അവിടെവന്ന് തട്ടും'

(സ്വപ്ന സുരേഷിന് ലഭിച്ച ഫോണ്‍ കോളിലെ കൊലവിളി)

നൗഫല്‍: ഞാന്‍ നൗഫലാണ്, രാവിലെ വിളിച്ചിരുന്നില്ലേ.
സ്വപ്‌ന: ആരാണ്, പറയൂ, എന്താണ്
നൗഫല്‍: ഞാനിപ്പോള്‍ വിളിച്ചത്, നമ്പര്‍ തന്നത് എറണാകുളം മരട് അനീഷ്
സ്വപ്‌ന: ഇതൊക്കെ ആരാണ്
നൗഫല്‍: എന്താന്ന് അറിയില്ലേ, അവര്‍ തന്നു. ഈ നമ്പറില്‍ വിളിക്കുക. ഓരോട് പറയുക. മുഖ്യമന്ത്രിക്കും ജലീലിനും പിന്നാലെ നടത്തം നിര്‍ത്തുകയെന്ന് പറഞ്ഞു. ഞാന്‍ പറഞ്ഞതുപോലെ നടന്നോട്ടേ.
സ്വപ്‌ന: നിങ്ങള്‍ എന്തിനാണ് എന്നെ വിളിച്ച് ഭീഷണിപ്പെടുത്തിയത്
നൗഫല്‍: ഞാന്‍ ഭീഷണിപ്പെടുത്തിയോ, ഭീഷണിയുടെ സ്വരത്തിലല്ലല്ലോ പറഞ്ഞത്. ഞമ്മളിപ്പോ തട്ടുമെന്ന് പറഞ്ഞാ വന്ന് തട്ടും. അവിടെ വന്ന് തട്ടും

സ്വപ്‌ന: മേലാല്‍ വിളിച്ച് ശല്യം ചെയ്യരുത്.
നൗഫല്‍: നീയൊന്നും ചെയ്യില്ല. നീ കംപ്ലയിന്റ് ആയിട്ട് എവിടേക്കാണ്. മുഖ്യമന്ത്രി സാദാ വ്യക്തിയാണെന്ന് വിചാരിച്ചോ നീ. കേന്ദ്രത്തെ കൊണ്ടുവന്ന് കേരളത്തില്‍ വാഴിക്കാന്‍ അനുവദിക്കില്ല. നൗഫലാണ് പറയുന്നത്.