മോഹന്‍ ലാല്‍ അവതാരകനായി എത്തിയ ബിഗ് ബോസ് സീസണ്‍ നാലിന്റെ വിജയിയായ ദില്‍ഷ പ്രസന്നന്‍ ആദ്യമായി സമൂഹമാധ്യമങ്ങളിലൂടെ പ്രതികരിച്ചിരിക്കുകയാണ്. 20 മത്സരാര്‍ത്ഥികള്‍ പങ്കെടുത്ത ഈ സീസണില്‍ തീര്‍ത്തും അപ്രതീക്ഷിതമായിട്ടായിരുന്നു ദില്‍ഷയുടെ വിജയം. ബിഗ് ബോസ് മലയാളം ചരിത്രത്തില്‍ ആദ്യമായാണ് ഒരു പെണ്‍കുട്ടി ടൈറ്റില്‍ വിജയിയാവുന്നത്.

അതേസമയം, ദില്‍ഷ ഒന്നാം സ്ഥാനം അര്‍ഹിക്കുന്നില്ലയെന്ന രീതിയിലുള്ള വിമര്‍ശനങ്ങളും സമൂഹമാധ്യമങ്ങളില്‍ സജീവമാണ്. ഈ വിമര്‍ശനങ്ങളോടും ഇന്‍സ്റ്റഗ്രാമില്‍ പങ്കുവച്ച വീഡിയോയില്‍ ദില്‍ഷ പ്രതികരിക്കുന്നു. എന്നെ സപ്പോര്‍ട്ട് ചെയ്തവര്‍ക്ക് നന്ദി. എന്നെ സ്‌നേഹിക്കുന്ന ഒരുപാട് പേരുണ്ടെന്ന് എനിക്ക് മനസ്സിലായി. നിങ്ങളുടെ കമന്റുകള്‍ എന്നെ ഒരുപാട് സന്തോഷിപ്പിച്ചു.

ചില ചീത്ത കമന്റ്‌സും ഞാന്‍ കണ്ടിട്ടുണ്ട്. ഈ ഡ്രിഗ്രേഡിംഗും കാര്യങ്ങളുമൊക്കെയുണ്ടാവും, ഇത്രയും വലിയ ഷോയല്ലേ. രണ്ടും അഭിമുഖീകരിക്കേണ്ടി വരുമെന്ന് എനിക്കറിയാം, ഞാന്‍ അതിന്റേതായ രീതിയില്‍ മാത്രമേ എടുത്തിട്ടുള്ളൂ. കുറച്ച് വിഷമമൊക്കെ ഉണ്ടായിരുന്നെങ്കിലും ഞാനിപ്പോള്‍ ഓകെയാണ്.

ഞാന്‍ ഇത് അര്‍ഹിക്കുന്നില്ല എന്നു ചിലര്‍ പറയുന്നു. പക്ഷേ, ഞനിപ്പോഴും വിശ്വസിക്കുന്നു ഈ വിജയം നേടാന്‍ അര്‍ഹതയുള്ളവളാണ് ഞാനെന്ന്. 100 ദിവസവും ഞാനെന്റെ 100 ശതമാനം കൊടുത്തിട്ടാണ് അവിടെ നിന്നത് ദില്‍ഷ പറയുന്നു.