ഗാന്ധിജിയുടെ ചിത്രം എസ്എഫ്‌ഐക്കാര്‍ നിലത്തിട്ട് പൊട്ടിച്ചു എന്ന് പറഞ്ഞ് പരത്തി ദേശീയ തലത്തില്‍ സഖാക്കളെ കരിവാരിത്തേക്കാമെന്നാണ് കോണ്‍ഗ്രസുകാര്‍ കരുതിയത്. എന്നാല്‍ മാതൃഭൂമി ചാനലും പോലീസ് ഫോട്ടോഗ്രാഫറും പണി പറ്റിച്ചു. കോണ്‍ഗ്രസുകാര്‍ തന്നെ ചിത്രം നിലത്തിട്ടതെന്ന് വ്യക്തമായിരിക്കുകയാണ്. ദേശീയ തലത്തില്‍ രാഹുല്‍ ഗാന്ധി മറുപടി പറയേണ്ട സാഹചര്യം വന്നു.

ഗാന്ധിയുടെ ചിത്രം നിലത്തിട്ടതിന് പിന്നല്‍ ഗൂഢാലോചനയുണ്ട്. അത് ആരുടെ ബുദ്ധിയെന്ന് വഴിയേയറിയാം. വയനാട്ടില്‍ രാഹുല്‍ ഗാന്ധിയുടെ ഓഫീസിലെ ഗാന്ധി ചിത്രം തകര്‍ത്ത സംഭവത്തില്‍ കോണ്‍ഗ്രസിനെ വെട്ടിലാക്കിയാണ് പൊലീസ് റിപ്പോര്‍ട്ട് വന്നത്. ഓഫീസ് അക്രമിച്ച എസ്എഫ്‌ഐക്കാര്‍ അല്ല ചിത്രം താഴെയിട്ടതെന്ന എസ്പിയുടെ റിപ്പോര്‍ട്ട് മുഖ്യമന്ത്രി നിയമസഭയില്‍ വായിച്ചു. അതേസമയം മുഖ്യമന്ത്രിയുടെ കഥയ്ക്ക് പൊലീസ് തയ്യാറാക്കിയ തിരക്കഥയാണ് റിപ്പോര്‍ട്ടെന്നാണ് കോണ്‍ഗ്രസ് വിമര്‍ശനം.

ഇതിനിടെ അക്രമം നടത്തിയ എസ്എഫ്‌ഐക്കാരെ പൊലീസ് തോളില്‍തട്ടുന്ന ദൃശ്യങ്ങള്‍ കോണ്‍ഗ്രസ് പുറത്തുവിട്ടു. എന്നാല്‍ ഇതിനെതിരെ സൈബര്‍ സഖാക്കള്‍ രംഗത്തെത്തി. ഈ ചിത്രത്തില്‍ കാണുന്നയാള്‍ രാഹുല്‍ ഗാന്ധി കെട്ടിപ്പിടിച്ച് നില്‍ക്കുന്ന വേറൊരു ചിത്രം പ്രചരിപ്പിച്ചാണ് കോണ്‍ഗ്രസുകാരനാണെന്ന് തെളിയിക്കുന്നത്.

രാഹുല്‍ ഗാന്ധിയുടെ ഓഫീസ് ആക്രമണത്തിനിടെ ആരാണ് ഗാന്ധിജിയുടെ ചിത്രം തകര്‍ത്തതെന്ന വാദം മുറുകുന്നതിനിടെയാണ് കോണ്‍ഗ്രസിനെ കുരുക്കിയുള്ള പൊലീസ് റിപ്പോര്‍ട്ട് പുറത്തുവന്നത്. എസ്എഫ്‌ഐക്കാര്‍ ഓഫീസ് ആക്രമിച്ചപ്പോള്‍ സ്ഥലത്തുണ്ടായിരുന്ന പൊലീസ് ഫോട്ടോഗ്രാഫര്‍ പകര്‍ത്തിയ ചിത്രങ്ങളുടെ അടിസ്ഥാനത്തിലായിരുന്നു റിപ്പോര്‍ട്ട്.

എസ്എഫ്‌ഐക്കാരെ അറസ്റ്റ് ചെയ്ത് നീക്കിയ ശേഷം 4.04ന് എടുത്ത ഫോട്ടോയില്‍ ചിത്രം ചുമരിലുണ്ടെന്നും, 4.29ന് വീണ്ടും എടുത്ത ഫോട്ടോയില്‍ ഗാന്ധി ചിത്രം നിലത്ത് കിടന്നുവെന്നുമാണ് പൊലീസ് റിപ്പോ!ര്‍ട്ട്. ഈ സമയം യൂത്ത് കോണ്‍ഗ്രസുകാര്‍ മാത്രമാണ് ഉണ്ടായിരുന്നതെന്നും റിപ്പോര്‍ട്ടില്‍ പറയുന്നു.

പ്രശ്‌നം ഭരണപക്ഷ എംഎല്‍എ, വി.ജോയി നിയസഭയില്‍ സബ്മിഷനായി ഉന്നയിച്ചപ്പോള്‍ പൊലീസ് റിപ്പോര്‍ട്ട് മുഖ്യമന്ത്രി സഭയില്‍ വായിച്ചു. പൊലീസ് റിപ്പോര്‍ട്ടിനെതിരെ സഭയ്ക്കകത്തും പുറത്തും രൂക്ഷമായ പ്രതികരണവുമായി കോണ്‍ഗ്രസ് രംഗത്തെത്തി. രാഹുല്‍ ഗാന്ധിയുടെ ഓഫീസ് ആക്രമിച്ചവരുടെ തോളില്‍ പൊലീസ് തട്ടുന്ന ദൃശ്യങ്ങള്‍ എഐസിസി ജനറല്‍ സെക്രട്ടറി കെ.സി.വേണുഗോപാല്‍ പുറത്തുവിട്ടു. ഇതിനേയാണ് വീണ്ടും സഖാക്കള്‍ പ്രതിരോധിച്ചത്.

അന്വേഷണത്തിനായി എഡിജിപി വയനാട്ടിലേക്ക് പുറപ്പെടുന്നതിന് മുമ്പ് ചിത്രം നശിപ്പിച്ചത് കോണ്‍ഗ്രസാണെന്ന് മുഖ്യമന്ത്രി പറഞ്ഞാല്‍ പിന്നെ റിപ്പോര്‍ട്ട് എന്തായിരിക്കുമെന്ന് ഊഹിക്കാമല്ലോ എന്നായിരുന്നു പ്രതിപക്ഷ നേതാവിന്റെ മറുപടി. പൊലീസ് റിപ്പോര്‍ട്ട് കോണ്‍ഗ്രസിനെതിരെ ആയുധമാക്കുകയാണ് സിപിഎം. അതേസമയം രാഹുല്‍ ഗാന്ധിയുടെ ഓഫീസ് ആക്രമണം തടയുന്നതില്‍ പൊലീസിന് ഗുരുതര വീഴ്ച സംഭവിച്ചുവെന്നാണ് എഡിജിപി മനോജ് എബ്രാഹം നല്‍കിയ റിപ്പോര്‍ട്ട്.

രാഹുല്‍ ഗാന്ധിയുടെ ഓഫീസ് ആക്രമിച്ചതില്‍ പോലീസ് റിപ്പോര്‍ട്ട് മുഖ്യമന്ത്രിയുടെ തിരക്കഥയാണെന്ന് കെ.സി വേണുഗോപാല്‍ പറഞ്ഞു. എസ്എഫ്‌ഐക്കാര്‍ രാഹുല്‍ ഗാന്ധിയുടെ ഓഫീസ് ആക്രമിക്കുമ്പോള്‍ തോളത്ത് തട്ടി അഭിനന്ദിച്ച പൊലീസാണ് റിപ്പോര്‍ട്ട് തയ്യാറാക്കിയതെന്നും കെസി വേണുഗോപാല്‍ കുറ്റപ്പെടുത്തി.