ചികിത്സക്കെത്തിയ രോഗിയെ ഡോക്ടര്‍ മാനഭംഗപ്പെടുത്തിയെന്ന കേസ്... ഓര്‍ത്തോ പീഡിക് ഡോക്ടറുടെ അറസ്റ്റ് കോടതി വിലക്കി, പരാതിക്കാരിക്ക് നോട്ടീസ്, രോഗിയും മാതാവും ഒരുമിച്ചിരിക്കെ താന്‍ മാനഭംഗപ്പെടുത്തിയെന്നത് അവിശ്വസനീയമെന്ന് സിസിടിവി ദൃശ്യങ്ങള്‍ കോടതിയില്‍ ഹാജരാക്കി ഡോക്ടര്‍ , കൈ റൊട്ടേറ്റ് ചെയ്യിച്ചപ്പോള്‍ മുതുകില്‍ കണ്ട ചതവ് ഭര്‍ത്താവ് ഇടിച്ചതാണോയെന്ന് ചോദിച്ചതാണ് കള്ളക്കേസ് നല്‍കാന്‍ രോഗിക്ക് പ്രകോപനമായതെന്ന് ഡോക്ടര്‍
ചികിത്സക്കെത്തിയ രോഗിയെ മെഡി. കോളേജ് ഡോക്ടര്‍ മാനഭംഗപ്പെടുത്താന്‍ ബലപ്രയോഗം നടത്തിയെന്നും ലൈംഗിക പീഡനം നടത്തിയെന്നുമുള്ള കേസില്‍ ഓര്‍ത്തോ പീഡിക് ഡോക്ടറുടെ അറസ്റ്റ് തലസ്ഥാനത്തെ കോടതി വിലക്കി. തിരുവനന്തപുരം ആറാം അഡീ. ജില്ലാ സെഷന്‍സ് കോടതിയാണ് ഡോക്ടര്‍ സമര്‍പ്പിച്ച മുന്‍കൂര്‍ ജാമ്യഹര്‍ജിയിലെ അന്തിമ തീരുമാനം വരെ ഡോക്ടറുടെ അറസ്റ്റ് തടഞ്ഞത്.
ജാമ്യം നല്‍കുന്നതില്‍ ആക്ഷേപമുണ്ടെങ്കില്‍ ബോധിപ്പിക്കാന്‍ ഇന്നലെ കോടതിയില്‍ നേരിട്ടു ഹാജരാകാന്‍ പരാതിക്കാരിക്ക് നോട്ടീസ് അയക്കാനും ജഡ്ജി കെ. വിഷ്ണു ഉത്തരവിട്ടു. തിരുവനന്തപുരം മെഡിക്കല്‍ കോളേജിലെ പ്രമുഖ ഓര്‍ത്തോ പീഡിക് സര്‍ജനും പ്രൊഫസറുമായ ( ഇ. കെ. ഷാനവാസ്) ഡോക്ടറാണ് മുന്‍കൂര്‍ ജാമ്യം തേടി ജില്ലാ കോടതിയെ സമീപിച്ചത്.
യുവതി രണ്ടു കുട്ടികളും മാതാവുമൊത്താണ് തന്റെ തോളെല്ല് വേദനക്ക് ഡോക്ടറുടെ സ്വകാര്യ റൂമില്‍ ചികിത്സക്കെത്തിയത്. കുട്ടികളെ പുറത്തിരുത്തി ചികിത്സാ റൂമില്‍ യുവതിയായ രോഗിയും മാതാവും ഒരുമിച്ചിരിക്കെ മേശക്ക് അപ്പുറമിരുന്ന യുവതിയുടെ കൈയ്യെടുത്ത് 5 പ്രാവശ്യം ഡോക്ടര്‍ തന്റെ സ്വകാര്യ ഭാഗത്ത് പിടിപ്പിച്ച് സ്ത്രീയെ മാനഭംഗപ്പെടുത്തണമെന്ന ഉദ്ദേശ്യത്തോടെ കൈയ്യേറ്റവും ബലപ്രയോഗവും നടത്തുകയും ലൈംഗിക നേട്ടങ്ങള്‍ക്ക് വേണ്ടി ശാരീരിക സ്പര്‍ശവും മുന്നേറ്റങ്ങളും നടത്തുകയും ആയതിലേക്ക് ഡോക്ടര്‍ നിര്‍ബന്ധിക്കുകയും ആവശ്യപ്പെടുകയും ചെയ്തുവെന്ന പരാതിയിലാണ് സിറ്റി മെഡിക്കല്‍ കോളേജ് പോലീസ് കേസ് എടുത്തത്.
അതേ സമയം രോഗിയും മാതാവും മേശക്ക് അപ്പുറം ഒരുമിച്ചിരിക്കെ താന്‍ മാനഭംഗപ്പെടുത്തിയെന്നത് അവിശ്വസനീയമെന്ന് സിസിടിവി ദൃശ്യങ്ങളുടെ ഫോട്ടോകള്‍ കോടതിയില്‍ ഹാജരാക്കി ഡോക്ടര്‍ ബോധിപ്പിച്ചു. തല്‍സമയം ഇപ്രകാരമൊരു കേസ് വരാന്‍ എന്താണ് കാരണമെന്ന് ജഡ്ജി കെ.വിഷ്ണു ഡോക്ടറോട് ചോദിച്ചു. രോഗിയുടെ കൈ താന്‍ റൊട്ടേറ്റ് ചെയ്യിച്ചപ്പോള്‍ മുതുകില്‍ കണ്ട ചതവ് ഭര്‍ത്താവ് ഇടിച്ചതാണോയെന്ന് ചോദിച്ചതാണ് ഇപ്രകാരമൊരു കള്ളക്കേസ് ഫയല്‍ ചെയ്യാന്‍ രോഗിക്ക് പ്രകോപനമായതെന്ന് ഡോക്ടര്‍ ഉത്തരമായി ബോധിപ്പിച്ചു.
ഏതു നിമിഷവും അറസ്റ്റ് ചെയ്യുമെന്ന ഭയത്താല്‍ തന്നെ കാണാന്‍ നേരത്തേ ബുക്ക് ചെയ്ത അനവധി രോഗികളെ ചികിത്സിക്കാനാവുന്നില്ലെന്നും മെഡിക്കല്‍ കോളേജില്‍ എംബിബിഎസ് വിദ്യാര്‍ത്ഥികളെ പഠിപ്പിക്കാന്‍ പോകാന്‍ പറ്റുന്നില്ലെന്നും തന്റെ കരിയര്‍ തകര്‍ക്കാനുള്ള ഉദ്ദേശ്യത്തോടെയുള്ള കള്ളക്കേസാണിത്. നടന്‍ വിജയ് ബാബു മോഡല്‍ ജാമ്യം ലഭിക്കാന്‍ തനിക്കും അര്‍ഹതയുണ്ട്. വിജയ് ബാബു കേസില്‍ ലൈംഗിക ബന്ധം നടന്നിട്ടുണ്ടെന്നും ഇവിടെ അപ്രകാരം ഒന്നും നടന്നിട്ടില്ലെന്നും ഡോക്ടര്‍ ബോധിപ്പിച്ചു.
"
https://www.facebook.com/Malayalivartha
