പ്രസവത്തെ തുടര്‍ന്ന് അമ്മയും കുഞ്ഞും മരിച്ച സംഭവത്തില്‍ ചികിത്സ പിഴവില്ലെന്ന് ഐഎംഎ. ഐഎംഎ പാലക്കാട് ഘടകമാണ് ആശുപത്രി അധികൃതര്‍ക്ക് പിഴവുണ്ടായിട്ടില്ലെന്ന് അറിയിച്ചത്.

ശാസ്ത്രീയമായി ചെയ്യേണ്ട കാര്യങ്ങളെല്ലാം ഡോക്ടര്‍മാര്‍ ചെയ്തിട്ടുണ്ടെന്ന് തങ്ങളുടെ അന്വേഷണത്തില്‍ മനസിലായിട്ടുണ്ടെന്നും അതിനാലാണ് ചികിത്സ പിഴവില്ലെന്ന് തങ്ങള്‍ പറയുന്നതെന്നുമാണ് ഇവര്‍ വാദിച്ചത്. അമിത രക്തസ്രാവമാണ് ഐശ്വര്യയുടെ മരണകാരണമെന്ന് ഐഎംഎ അധികൃതര്‍ .

വെസ്റ്റ് യാക്കരയിലെ തങ്കം ആശുപത്രിയിലാണ് തത്തമംഗലം ചെന്പകശേരി സ്വദേശിനിയായ ഐശ്വര്യ (25) പ്രസവത്തെ തുടര്‍ന്ന് മരിച്ചത്. ഞായറാഴ്ച രാത്രി ഐശ്വര്യയുടെ കുഞ്ഞ് മരിച്ചിരുന്നു. വിശദമായ റിപ്പോര്‍ട്ട് ലഭിച്ചാലേ വ്യക്തത വരൂവെന്ന് പാലക്കാട് ഡിവൈഎസ്പി പറഞ്ഞു. ചികിത്സാപിഴവിനെ തുടര്‍ന്നാണ് ഐശ്വര്യ പ്രസവത്തോടെ മരിച്ചതെന്നാണ് ബന്ധുക്കളുടെ ആരോപണം.

മൃതദേഹം ജില്ലാ ആശുപത്രിയില്‍ ഇന്‍ക്വസ്റ്റ് നടത്തിയ ശേഷം പോസ്റ്റ്‌മോര്‍ട്ടത്തിനായി തൃശൂര്‍ മെഡിക്കല്‍ കോളേജിലേക്ക് മാറ്റി. തത്തമംഗലം ചെന്പകശ്ശേരി മോഹനന്‍-വത്സല ദന്പതികളുടെ മകന്‍ രഞ്ജിത്താണ് ഐശ്വര്യയുടെ ഭര്‍ത്താവ്. കൊഴിഞ്ഞാമ്പാറ അത്തിക്കോട് പണിക്കര്‍കളം സ്വദേശി മോഹനന്‍-ഓമന ദന്പതികളുടെ മകളാണ് ഐശ്വര്യ.

സംഭവത്തില്‍ ബന്ധുക്കളുടെ പരാതിയെ തുടര്‍ന്ന് ചികിത്സാ പിഴവിന് മൂന്ന് ഡോക്ടര്‍മാര്‍ക്കെതിരെ പോലീസ് കേസെടുത്തു. സംഭവത്തില്‍ യുവജന കമ്മീഷന്‍ സ്വമേധയാ കേസെടുക്കുകയും ചെയ്തു. അന്വേഷണം നടത്തി ഒരാഴ്ചയ്ക്കകം റിപ്പോര്‍ട്ട് സമര്‍പ്പിക്കാന്‍ യുവജന കമ്മീഷന്‍ അംഗം ടി. മഹേഷ് പാലക്കാട് ജില്ലാ പോലീസ് മേധാവിക്ക് നിര്‍ദേശം നല്‍കുകയും ചെയ്തു.