സംസ്ഥാനത്ത് കാലവര്‍ഷം കനത്തു, ഇടുക്കിയില്‍ മരം വീണ് മൂന്ന് മരണം. അടിമാലിയില്‍ ഒഴുക്കില്‍പ്പെട്ട് കാണാതായ ഒരാള്‍ക്കായി തിരച്ചില്‍ തുടരുന്നു. കനത്തമഴയില്‍ ഉടുമ്പന്‍ചോല താലൂക്കിലെ മൂന്നിടത്ത് മരംവീണ് രണ്ട് തോട്ടംതൊഴിലാളി സ്ത്രീകളും ഒരു അതിഥിത്തൊഴിലാളിയുമാണ് മരിച്ചത്.

ചൊവ്വാഴ്ച പൂപ്പാറയ്ക്കു സമീപത്തായി തോണ്ടിമലയില്‍ തൊഴിലാളിയായ ലക്ഷ്മി പാണ്ഡ്യന്‍ (63), ശാന്തന്‍പാറയ്ക്ക് സമീപം മൈലാടുംപാറയില്‍ നാഗരാജിന്റെ ഭാര്യ മുത്തുലക്ഷ്മി (50), പൊന്നാങ്കാണി പച്ചക്കാനം എസ്റ്റേറ്റില്‍ അതിഥിത്തൊഴിലാളി ജാര്‍ഖണ്ഡ് സ്വദേശി സോമു ലക്ര(60) എന്നിവരാണ് മരിച്ചത്.


അടിമാലി ദേവിയാര്‍പ്പുഴയില്‍ മീന്‍പിടിത്തത്തിനിടെ ഞായറാഴ്ച ഒഴുക്കില്‍പ്പെട്ടയാളെ കണ്ടെത്താനായില്ല. ഒഴുവാത്തടം കളത്തിപ്പറമ്പില്‍ തങ്കന്റെ മകന്‍ അഖിലി (22)നെയാണ് കാണാതായത്.

തോണ്ടിമലയില്‍ 10 തൊഴിലാളികള്‍ പണി ചെയ്യുന്നതിനിടെയാണ് പകല്‍ പതിനൊന്നോടെ മരം ഒടിഞ്ഞുവീണത്. മൂന്നു പേര്‍ക്ക് പരിക്കേറ്റു. പരേതനായ പാണ്ഡ്യനാണ് ലക്ഷ്മിയുടെ ഭര്‍ത്താവ്. മക്കള്‍: ഉമ, കണ്ണന്‍. മൈലാടുംപാറ സെന്റ് മേരീസ് എസ്റ്റേറ്റിലാണ് മുത്തുലക്ഷ്മി ജോലി ചെയ്തിരുന്നത്. മക്കള്‍: നദിയ, റാംജി. അതിഥിത്തൊഴിലാളി സോമുചക്രയുടെ മൃതദേഹം അടിമാലി താലൂക്ക് ആശുപത്രിയില്‍.


കണ്ണൂര്‍ ജില്ലയില്‍ കനത്ത മഴ തുടരുന്നു. പ്രൊഫഷണല്‍ കോളേജുകളും അങ്കണവാടികളും ഉള്‍പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്‍ക്കും ബുധനാഴ്ച അവധിയാണ്. കാസര്‍കോട് കോളേജുകള്‍ ഒഴികെയുള്ള വിദ്യാഭ്യാസ സ്ഥാപനങ്ങള്‍ക്കും അവധി. കോഴിക്കോട് ജില്ലയില്‍ മഴ ശക്തമായി തുടരുന്നു. രണ്ടു വീട് തകര്‍ന്നു. കക്കയം ഡാമില്‍ ജലനിരപ്പ് ഉയര്‍ന്നതിനാല്‍ ബ്ലൂ അലര്‍ട്ട് പ്രഖ്യാപിച്ചു. കുറ്റ്യാടിപ്പുഴയുടെ തീരത്ത് ജാഗ്രത പ്രഖ്യാപിച്ചിട്ടുണ്ട്. മലപ്പുറം നിലമ്പൂര്‍ കാഞ്ഞിരപ്പുഴയില്‍ ഒഴുക്കില്‍പ്പെട്ട ബാബു എന്ന ആദിവാസി യുവാവ് തിങ്കള്‍ രാത്രി മുഴുവന്‍ ആഢ്യന്‍പാറയിലെ കൊടുംവനത്തില്‍ കുടുങ്ങി. ഇയാളെ ചൊവ്വ രാവിലെ നാട്ടുകാരും വിവിധ സേനാവിഭാഗങ്ങളും ചേര്‍ന്ന് രക്ഷിച്ചു.

തൃശൂര്‍ ജില്ലയില്‍ എറിയാട്, ഏങ്ങണ്ടിയൂര്‍, കടപ്പുറം, പുന്നയൂര്‍ക്കുളം മേഖലകളില്‍ കടലാക്രമണം രൂക്ഷമായി. എറിയാട്ട് നിരവധി വീട്ടില്‍ വെള്ളംകയറി. തീരദേശ റോഡ് തകര്‍ന്നു. മറ്റത്തൂര്‍ പഞ്ചായത്തിലെ നാലായിരത്തോളം നേന്ത്രവാഴകള്‍ വെള്ളത്തില്‍ മുങ്ങി. വടക്കാഞ്ചേരി എയ്യാലില്‍ വീടിനു മുകളിലേക്ക് മരംവീണു.

ബുധനാഴ്ച എറണാകുളം, ഇടുക്കി, തൃശൂര്‍, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ മഞ്ഞ അലര്‍ട്ട് (ശക്തമായ മഴ) പ്രഖ്യാപിച്ചു. മലയോര മേഖലകളില്‍ ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാല്‍ ഓറഞ്ച് അലര്‍ട്ടിന് സമാന ജാഗ്രത പാലിക്കേണ്ടതാണ്.