ഇന്ത്യയിലെ ജനപ്രിയ ബ്രാന്‍ഡായ വിവോയ്ക്ക് ഇഡി കുരുക്കാകുന്നു. ചൈനയെ പേടിപ്പെടുത്തി ഇഡി റെയ്ഡ്. ചൈനീസ് സ്മാര്‍ട് ഫോണ്‍ കമ്പനി 'വിവോ'യുടെയും അനുബന്ധ സ്ഥാപനങ്ങളുടെയും ഓഫിസുകളില്‍ എന്‍ഫോഴ്‌സ്‌മെന്റ് ഡയറക്ടറേറ്റിന്റെ പരിശോധന നടത്തി. കള്ളപ്പണം വെളുപ്പിക്കലുമായി ബന്ധപ്പെട്ട കേസിലാണ് റെയ്ഡ്. കേരളം, ഡല്‍ഹി, യുപി, മേഘാലയ, മഹാരാഷ്ട്ര, തമിഴ്‌നാട്, ഗുജറാത്ത് തുടങ്ങിയ സംസ്ഥാനങ്ങളിലായി 48 കേന്ദ്രങ്ങളിലാണ് പരിശോധന നടന്നത്. 465 കോടി രൂപ നിക്ഷേപമുള്ള 119 ബാങ്ക് അക്കൗണ്ടുകള്‍ മരവിപ്പിച്ചതായും വിവരമുണ്ട്.

റെയ്ഡ് അക്ഷരാര്‍ത്ഥത്തില്‍ ചൈനയേയും വിവോയേയും ഞെട്ടിപ്പിച്ചിട്ടുണ്ട്. റെയ്ഡ് വിവോയെ കാര്യമായി ബാധിക്കും. അതേസമയം റെയ്ഡിന് തൊട്ടുമുമ്പ് വിവോയുടെ ഡയറക്ടര്‍മാര്‍ ഇന്ത്യയില്‍നിന്നു കടന്നെന്ന് വാര്‍ത്താ ഏജന്‍സിയായ എഎന്‍ഐ റിപ്പോര്‍ട്ട് ചെയ്തു. കമ്പനിക്കെതിരെ ഇന്ത്യയുടെ ഇഡി കള്ളപ്പണം വെളുപ്പിക്കല്‍ കേസിലെ അന്വേഷണം കൂടുതല്‍ ഊര്‍ജിതമാക്കിയതിനു പിന്നാലെയാണ് വിവോയുടെ ഇന്ത്യയിലെ ഡയറക്ടര്‍മാരായിരുന്ന സെങ്‌ഷെന്‍ ഓവു, സാങ് ജിയ് എന്നിവര്‍ രാജ്യം വിട്ടത്. കേസുമായി ബന്ധപ്പെട്ട് 44 ഇടങ്ങളില്‍ നിന്ന് കമ്പനിക്കെതിരെ ഇഡി വിവരങ്ങള്‍ ശേഖരിച്ചിരുന്നു. ഉത്തര്‍പ്രദേശിലും മധ്യപ്രദേശിലുംം ചില ദക്ഷിണേന്ത്യന്‍ സംസ്ഥാനങ്ങളിലുമായിരുന്നു അന്വേഷണം.

വിവോ മൊബൈല്‍ കമ്യൂണിക്കേഷന്‍സ്, മറ്റു ചില ചൈനീസ് കമ്പനികളുടെ ഓഫിസുകള്‍ എന്നിവിടങ്ങളിലായിരുന്നു തിരച്ചിലും തെളിവു ശേഖരണവും. ഈ കേസ് സിബിഐയും അന്വേഷിക്കുന്നുണ്ട്. ഐടി ഡിപ്പാര്‍ട്ട്‌മെന്റ്, കോര്‍പറേറ്റ് അഫയേഴ്‌സ് മന്ത്രാലയം തുടങ്ങിയവയും ഈ കേസിന്റെ അന്വേഷണത്തില്‍ സജീവമായി ഇടപെടുന്നുണ്ട്. രാജ്യത്ത് ചൈനീസ് കമ്പനികള്‍ക്കെതിരെ നടക്കുന്ന അന്വേഷണത്തിന്റെ ഭാഗം തന്നെയാണ് വിവോയ്‌ക്കെതിരെ ഇഡിയുടെ തിരച്ചിലും.

കള്ളപ്പണം വെളുപ്പിക്കല്‍നിരോധന നിയമത്തിന്റെ (പിഎംഎല്‍എ) ലംഘനം നടന്നിട്ടുണ്ടോ എന്നാണ് ഇഡിയും മറ്റ് ഏജന്‍സികളും അന്വേഷിക്കുന്നത്. മറ്റ് ചൈനാ കേന്ദ്രീകൃത കമ്പനികള്‍ക്കെതിരെയും അന്വേഷണം നടക്കുന്നു. വിവോ മൊബൈല്‍ കമ്യൂണിക്കേഷന്‍സിന് എതിരെയുള്ള അന്വേഷണത്തില്‍ എന്തെങ്കിലും കണ്ടെത്തിയോ എന്നു വ്യക്തമല്ല. നിയമ ലംഘനവും തട്ടിപ്പുകളും നടന്നോ എന്ന അന്വേഷണത്തില്‍ കോര്‍പറേറ്റ് അഫയേഴ്‌സ് മന്ത്രാലയം അതീവ താത്പര്യത്തോടെയാണ് ഇടപെടുന്നത് എന്ന് റിപ്പോര്‍ട്ടില്‍ പറയുന്നു. വിവോയ്‌ക്കെതിരെ അന്വേഷണം വേണമെന്ന ആവശ്യം ഏപ്രിലിലാണ് ഉണ്ടായത്.

ഇന്ത്യയില്‍ ഏറ്റവുമധികം സ്മാര്‍ട് ഫോണ്‍ വില്‍ക്കുന്ന കമ്പനിയായ ഷഓമിക്കെതിരെ ഇഡി അടക്കമുള്ള ഏജന്‍സികള്‍ നേരത്തേ അന്വേഷണം നടത്തിയിരുന്നു. ഷഓമിയുടെ വിവിധ അക്കൗണ്ടുകളില്‍ നിന്നായി 72.5 കോടി ഡോളര്‍ പിടിച്ചെടുക്കുകയും ചെയ്തു. ഷഓമിയിലെ ജോലിക്കാര്‍ക്കും കുടുംബാംഗങ്ങള്‍ക്കുമെതിരെ ഇഡി ഉദ്യോഗസ്ഥര്‍ ഭീഷണി മുഴക്കിയിരുന്നു എന്നും ആന്‍ഡ്രോയിഡ് പൊലിസ് ഡോട്ട് കോമിന്റെ പുതിയ റിപ്പോര്‍ട്ടില്‍ പറയുന്നു. ഇന്ത്യന്‍ സ്മാര്‍ട് ഫോണ്‍ വിപണിയെ അടക്കി വാഴുന്നത് ചൈനീസ് സ്മാര്‍ട് ഫോണ്‍ കമ്പനികളും അവയുടെ സബ് ബ്രാന്‍ഡുകളുമാണ്. ഇവരെ കൂടാതെ ഇന്ത്യന്‍ വിപണിയില്‍ കാര്യമായ സ്വാധീനമുള്ളത് ദക്ഷിണ കൊറിയന്‍ കമ്പനിയായ സാംസങ്ങിനു മാത്രമാണ്.

അതേസമയം മേയ് ഒടുവില്‍ ബ്ലൂംബര്‍ഗ് പ്രസിദ്ധീകരിച്ച റിപ്പോര്‍ട്ടില്‍ പറയുന്നത് വിവോ, സെഡ്ടിഇ കമ്പനികള്‍ നടത്തിയേക്കാവുന്ന തട്ടിപ്പുകളെക്കുറിച്ച് പേരുവിവരങ്ങള്‍ വെളിപ്പെടുത്താന്‍ താത്പര്യമില്ലാത്ത ആരോ കോര്‍പറേറ്റ് അഫയേഴ്‌സ് മന്ത്രാലയത്തിനു പരാതി നല്‍കിയിരുന്നു എന്നാണ്. കമ്പനികളുടെ ഉടമസ്ഥാവകാശം, സാമ്പത്തിക റിപ്പോര്‍ട്ടിങ് എന്നിവയിലാണ് പ്രശ്‌നമെന്നും സെഡ്ടിഇയുടെ സാമ്പത്തിക രേഖകള്‍ അടിയന്തരമായി പരിശോധിക്കാന്‍ ഉത്തവുണ്ടായെന്നും റിപ്പോര്‍ട്ടില്‍ പറയുന്നു. അതേസമയം, കേന്ദ്ര സര്‍ക്കാര്‍ അഞ്ഞൂറിലേറെ ചൈനീസ് കമ്പനികളുടെ അക്കൗണ്ടുകള്‍ പരിശോധിക്കുകയാണെന്നും റിപ്പോര്‍ട്ടുകളുണ്ട്. ഷഓമി, ഒപ്പോ, വാവെയ്, ആലിബാബ തുടങ്ങിയ കമ്പനികള്‍ക്കെതിരെയാണ് അന്വേഷണം.