ഇന്നലത്തെ മാതൃഭൂമി പത്രം കണ്ട് സകലരും ഞെട്ടിപ്പോയി. സജി ചെറിയാന്റെ നെഞ്ചിലൂടെ ശൂലം കയറിയ ചിത്രമാണ് ആദ്യ പേജില്‍ കൊടുത്തത്. ഇടതുപക്ഷത്തുള്ള ശ്രേയാംസ് കുമാറിന്റെ പത്രം എന്തിനിങ്ങനെ കൊടുത്തു എന്ന വ്യാപക പ്രതിഷേധമാണ് ഉയരുന്നത്. പല നേതാക്കളും പരസ്യമായി രംഗത്തെത്തി.

ഇതിലേറ്റവും രൂക്ഷമായിരുന്നു കെടി ജലീലിന്റേത്. സജി ചെറിയാന്റെ നെഞ്ചിലൂടെ ശൂലം കുത്തിയിറക്കുന്ന കാര്‍ട്ടൂണിലൂടെ മാതൃഭൂമി അര്‍ത്ഥമാക്കുന്നതെന്താണെന്ന് ശ്രേയംസ്‌കുമാറിനോട് കെടി ജലീല്‍ ചോദിച്ചു. താങ്കള്‍ക്ക് വോട്ട് ചെയ്തതില്‍ ഖേദിക്കുന്നുയെന്നും ജലീല്‍ പറഞ്ഞു.കെടി ജലീല്‍ പറഞ്ഞത്: 'മിസ്റ്റര്‍ ശ്രേയംസ്‌കുമാര്‍, താങ്കള്‍ക്കൊരു വോട്ടു ചെയ്തതില്‍ ഞാന്‍ ഖേദിക്കുന്നു. താങ്കളുടെ പത്രം സജി ചെറിയാന്റെ മാറ് പിളര്‍ത്തി ശൂലം കുത്തിയിറക്കിയത് അര്‍ത്ഥമാക്കുന്നതെന്താണ്?'

മാതൃഭൂമി കാര്‍ട്ടൂണിനെതിരെ സിപിഐഎം കേന്ദ്രങ്ങളില്‍ നിന്നും രൂക്ഷവിമര്‍ശനങ്ങളാണ് ഉയരുന്നത്. നെഞ്ചിലൂടെ ശൂലം കുത്തിയിറക്കുന്ന കാര്‍ട്ടൂണിലൂടെ മാതൃഭൂമി എന്ത് സന്ദേശമാണ് പൊതുസമൂഹത്തിന് നല്‍കാന്‍ ഉദ്ദേശിക്കുന്നതെന്നാണ് ഉയര്‍ത്തുന്ന ചോദ്യങ്ങള്‍.

ആനാവൂര്‍ നാഗപ്പന്‍ പറഞ്ഞത് ''മാതൃഭൂമി ദിനപത്രം ഇന്ന് മുന്‍പേജില്‍ പ്രസിദ്ധീകരിച്ച കാര്‍ട്ടൂണ്‍ അങ്ങേയറ്റം അനുചിതവും അപഹാസ്യവുമായി പോയി. പരിണിതപ്രജ്ഞനായ ഒരു രാഷ്ട്രീയ നേതാവിന്റെ നെഞ്ചിലൂടെ ശൂലം കുത്തിയിറക്കുന്ന കാര്‍ട്ടൂണിലൂടെ മാതൃഭൂമി എന്ത് സന്ദേശമാണ് പൊതുസമൂഹത്തിന് നല്‍കാന്‍ ഉദ്ദേശിക്കുന്നത്. എന്നിട്ടും അരിശം തീരാതെ ഏഴാം പേജില്‍ സ: സജി ചെറിയാനെ കെട്ടിത്തൂക്കികൊണ്ടാണ് മാതൃഭൂമി അരിശം തീര്‍ക്കുന്നത്. ഏത് രാഷ്ട്രീയ നേതാവിനെയായാലും ഇത്തരത്തില്‍ ചിത്രീകരിക്കുന്നത് ശുദ്ധ ഭോഷ്‌ക്കാണ്. വളരെ നാളായി മാതൃഭൂമി സ്വീകരിച്ച പുതിയ രാഷ്ടീയ നയത്തിന്റെ ഭാഗമാണ് ഇത്തരത്തില്‍ മനുഷ്യത്വവിരുദ്ധവും സാമൂഹ്യവിരുദ്ധവുമായ സമീപനം സ്വീകരിക്കാന്‍ അവരെ പ്രേരിപ്പിക്കുന്നത് എന്ന് വ്യക്തം. ആ രാഷ്ട്രീയവും അതാണല്ലോ പിന്തുടരുന്നത്. ആര്‍എസ്എസ് കുനിയാന്‍ പറയുമ്പോള്‍ മുട്ടിലിഴയുന്ന അടിമത്തം മാതൃഭൂമിയ്ക്ക് ഭൂഷണമാകില്ല, മഹത്തായ ഒരു പാരമ്പര്യമുള്ള മാധ്യമസ്ഥാപനം ഇത്രയ്ക്ക് അധഃപതിച്ചതില്‍ ഖേദമുണ്ട്.''

അതേസമയം എംഎം മണി പറഞ്ഞത് ഈ (ശൂല)കാര്‍ട്ടൂണിനെ ഒറ്റവാക്കില്‍ Non ഡാഡി സിന്‍ഡ്രോം എന്നല്ല Multiple ഡാഡി സിന്‍ഡ്രോം ന്നാ പറയേണ്ടത്. ഹാ കഷ്ടം മാതൃഭൂമി എന്നാണ്.

ജമ്മുകശ്മിരിനെ ഒഴിവാക്കി മാതൃഭൂമി പത്രം പ്രസിദ്ധീകരിച്ചെന്ന ആക്ഷേപവുമായി ജന്മഭൂമിയും രംഗത്തെത്തി. ലേഖനത്തിന്റെ ഭാഗമായി പത്രത്തില്‍ ഉള്‍പ്പെടുത്തിയിരിക്കുന്നത് ജമ്മുകശ്മീരിനെ ഒഴിവാക്കി കൊണ്ടുള്ള ഭൂപടം. ജൂലൈ 7 ആം തിയതിയിലെ പത്രത്തിലാണ് ജമ്മുകശ്മിര്‍ ഇല്ലാത്ത ഇന്ത്യയുടെ ഭൂപടം പ്രത്യക്ഷപ്പെട്ടിരിക്കുന്നത്. ഇതോടെ സംഭവം വിവാദമായി. മാതൃഭൂമിയുടെ രാജ്യവിരുദ്ധ നിലപാടാണ് ഇതിലൂടെ വെളിവാകുന്നതെന്ന് ഒരുപക്ഷം വായനക്കാര്‍ അഭിപ്രായപ്പെടുന്നു. അല്ലാത്ത പക്ഷം മാതൃഭൂമി മാപ്പ് പറയണമെന്നും ആവശ്യം ശക്താണ് എന്നാണ് ജന്മഭുമി പറയുന്നത്. ഇത് ബിജെപിക്കാരും ഏറ്റെടുത്തിട്ടുണ്ട്.

മന്ത്രി സജി ചെറിയാന്റെ ഭരണഘടനാ വിരുദ്ധ പരാമര്‍ശത്തിനും രാജിയ്ക്കും പിന്നാലെ മാതൃഭൂമിയുടെ എഡിറ്റോറിയല്‍ പേജില്‍ വന്ന ലേഖനത്തിനൊപ്പമാണ് അപൂര്‍ണമായ ഇന്ത്യയുടെ ഭൂപടം ഉള്‍പ്പെടുത്തിയിരിക്കുന്നത്. 'അറിയുക, ഭരണഘടന രാഷ്ട്രഭാവനയുടെ കണ്ണാടി' എന്ന തലക്കെട്ടില്‍ സുധാ മേനോന്‍ എഴുതിയ ലേഖനത്തിനൊപ്പമാണ് ഇന്ത്യയെ കീറിമുറിച്ചുകൊണ്ടുള്ള ഭൂപടം നല്‍കിയിരിക്കുന്നത്. ഇന്ത്യ എന്ന ആശയത്തെയും രാഷ്ട്രഭാവനേയും ഏറ്റവും തെളിമയോടെ ഓരോ ഇന്ത്യക്കാരനും മുന്നില്‍ പ്രതിഫലിക്കുന്ന മികവാര്‍ന്ന കണ്ണാടിയാണ് ഇന്ത്യന്‍ ഭരണഘടന എന്നെല്ലാം ലേഖനത്തില്‍ പറയുമ്പോഴും; ഇന്ത്യയുടെ രൂപത്തെ വികൃതമാക്കി കശ്മിര്‍ ഇന്ത്യയുടെ ഭാ?ഗമല്ലെന്ന് പറയുന്ന രാജ്യവിരുദ്ധ ശക്തികള്‍ക്ക് കുടപിടിക്കുന്ന തരത്തിലാണ് ഇന്ത്യയുടെ ഭൂപടത്തെ മാതൃഭൂമി പത്രം ചിത്രീകരിച്ചിരിക്കുന്നതെന്നും ആക്ഷേപമുണ്ട്.