വ്യാജ ലൗ വെബില്‍ തേന്‍ കെണിയൊരുക്കി വശീകരിച്ച് യുവാവിനെ തട്ടിക്കൊണ്ടുപോയി പണവും സ്വര്‍ണ്ണവും ആര്‍.സി. ബുക്കും കവര്‍ന്ന മണക്കാട് ഐരാണിമുട്ടം ഹണി ട്രാപ്പ് കേസില്‍ തലസ്ഥാന ജില്ലയിലെ ആറു കൗമാരക്കാരെ ഹാജരാക്കാന്‍ തിരുവനന്തപുരം രണ്ടാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതി ഉത്തരവിട്ടു. പ്രതികളെ ജൂലൈ 29 ന് ഹാജരാക്കാന്‍ സിറ്റി ഫോര്‍ട്ട് പോലീസ് സര്‍ക്കിള്‍ ഇന്‍സ്‌പെക്ടറോട് മജിസ്‌ട്രേട്ട് എ. അനീസ ഉത്തരവിട്ടു.


മണക്കാട് കളിപ്പാന്‍കുളം കാര്‍ത്തിക നഗറില്‍ താമസിക്കുന്ന വിഷ്ണു രാജ് (25) , ഇയാളുടെ കൂട്ടാളികളായ ദിലീപ് (23) , സച്ചിന്‍ (21) , അജീഷ് (23) , അനന്തു ശ്രീകുമാര്‍ (24) , വിഷ്ണു (24) എന്നിവരാണ് 1 മുതല്‍ 6 വരെയുള്ള പ്രതികള്‍.

2021 നവംബര്‍ ആദ്യവാരത്തിലാണ് കേസിനാധാരമായ സംഭവം നടന്നത്. ഒന്നാം പ്രതിയുടെ ഭാര്യയുടെ പേരില്‍ വ്യാജ ഫേസ്ബുക്ക് ഐ ഡി നിര്‍മ്മിച്ച് സ്ത്രീയാണെന്ന വ്യാജേന നെടുമങ്ങാട് സ്വദേശിയായ യുവാവുമായി ചാറ്റ് ചെയ്ത് വിശ്വസിപ്പിച്ച് വിളിച്ചു വരുത്തി തട്ടിക്കൊണ്ടുപോവുകയായിരുന്നു. ആറ്റുകാല്‍ പാര്‍ക്കിംഗ് ഗ്രൗണ്ടില്‍ എത്തിച്ച ശേഷം യുവാവിനെ തട്ടിക്കൊണ്ടു പോയി ഐരാണിമുട്ടം ഹോമിയോ കോളേജ് ഗ്രൗണ്ടില്‍ എത്തിച്ച് മര്‍ദ്ദിച്ച് ഭീഷണിപ്പെടുത്തി പണവും സ്വര്‍ണ്ണവും വാഹനത്തിന്റെ ആര്‍.സി ബുക്കുമാണ് കവര്‍ച്ച ചെയ്തത്.


പ്രതികള്‍ക്കെതിരെ ഇന്ത്യന്‍ ശിക്ഷാ നിയമത്തിലെ 365 (അന്യായ തടങ്കലില്‍ വക്കാനായി തട്ടിക്കൊണ്ടു പോകല്‍) , 294 ബി (അസഭ്യം വിളിക്കല്‍) , 323 (ദേഹോപദ്രവമേല്‍പ്പിക്കല്‍) , 324 ( ആയുധം കൊണ്ട് ദേഹോപദ്രവം ഏല്‍പ്പിക്കല്‍) , 395 (കവര്‍ച്ച) , 506 ( ഭീഷണിപ്പെടുത്തല്‍) എന്നീ കുറ്റങ്ങള്‍ക്ക് കേസടുത്താണ് പ്രതികളെ ഹാജരാക്കാന്‍ ആവശ്യപ്പെട്ടത്.