ഇഡിക്കെതിരെ ഹൈക്കോടതിയെ സമീപിച്ച തോമസ് ഐസക്കിന് തല്‍ക്കാലം ആശ്വസിക്കാനുള്ള വകയാണ് കിട്ടിയതെങ്കിലും ഇഡിയുടെ ലക്ഷ്യം ചെറിയ മീനിനെ തൊടുത്ത് വമ്പന്‍ സ്രാവിനെ പിടിക്കുകയാണെന്നാണ് വിവരം. ഐസക്കിലൂടെ പിണറായിയില്‍ എത്താനുള്ള തന്ത്രമാണ് ഇഡി മെനഞ്ഞതെങ്കിലും. ആദ്യ നീക്കം പരാചയപ്പെട്ടു എന്ന് വേണമെങ്കില്‍ പറയാം. അടുത്ത ബുധനാഴ്ച വരെ മുന്‍ മന്ത്രി തോമസ് ഐസക്ക് എന്‍ഫോഴ്‌സ്‌മെന്റ് ഡയറക്ടറേറ്റിനു മുന്നില്‍ ഹാജരാകേണ്ടതില്ലെന്നാണ് ഹൈക്കോടതി പറഞ്ഞിരിക്കുന്നത്. തോമസ് ഐസക്കിന്റെ സ്വകാര്യതയെ മാനിക്കണമെന്ന് ഹൈക്കോടതി ഇഡിക്ക് നിര്‍ദേശം നല്‍കിയിട്ടുണ്ട്. എന്നാല്‍ പ്ലേറ്റ് മാറ്റി എങ്ങനെയും ഐസക്കിനെ തങ്ങളുടെ മടയിലെത്തിക്കാനാണ് ഇഡിയുടെ നീക്കം. ഇതിന്റെ ഭാഗമായി തോമസ് ഐസക്കിനെ പ്രതിയായിട്ടല്ല നോട്ടിസ് നല്‍കിയതെന്നും ,സാക്ഷിയായിട്ടാണ് വിളിപ്പിച്ചതെന്നുമാണ് ഇഡി കോടതിയില്‍ വ്യക്തമാക്കിയത്. അദ്ദേഹം സാക്ഷിയാണ്. തെളിവു തേടാനാണ് വിളിച്ചതെന്ന് ഇഡി പറയുമ്പോള്‍. ലക്ഷ്യം ചെറിയ മീനല്ല വലിയ മീനാണെന്ന് വ്യക്തം.

പ്രാഥമിക ഘട്ടത്തില്‍ ഇത്രയിലേറെ വ്യക്തിപരമായ വിവരങ്ങള്‍ ഹാജരാക്കാന്‍ നിര്‍ദേശിച്ചത് എന്തുകൊണ്ടാണെന്നു വിശദീകരിക്കാന്‍ ജസ്റ്റിസ് വി.ജി. അരുണ്‍ ഇഡിക്ക് നിര്‍ദേശം നല്‍കിയിട്ടുണ്ട്. എന്നാല്‍ തങ്ങള്‍ കണ്ടെത്തിയ കാര്യങ്ങള്‍ പരസ്യമാക്കിയാല്‍ സ്വാധീനം ഉപയോഗിച്ച് പലരും രക്ഷപെടാനുള്ള സാധ്യത ഇഡി കാണുന്നുണ്ട്. അതുകൊണ്ടാണ് ഐസക്കിനെ സാക്ഷിയായിട്ടെങ്കിലും തങ്ങളുടെ തട്ടകത്തിലെത്തിക്കാന്‍ ഇഡി ശ്രമിക്കുന്നത്. അതേസമയം രണ്ടാമത്തെ സമന്‍സില്‍ തന്റെയും കുടുംബത്തിന്റെയും സ്വത്ത് വിവരങ്ങള്‍ ഉള്‍പ്പെടെ ഹാജരാക്കാന്‍ ഇഡി നിര്‍ദേശിച്ചിരുന്നതായാണ് തോമസ് ഐസക് പറയുന്നത്.

ഇതിനിടെ ഇഡിയെ കേരളത്തില്‍ നിന്ന് കെട്ടുകെട്ടിക്കാന്‍ പാര്‍ട്ടി ഒന്നടങ്കം രംഗത്തിറങ്ങിയിട്ടുണ്ട്. തോമസ് ഐസക്കിനു പിന്നാലെ ഇഡിക്കെതിരെ ഹര്‍ജിയുമായി ഒരു കൂട്ടം എംഎല്‍എമാരും ഹൈക്കോടതിയിലെത്തിയിട്ടുണ്ട്. ഇഡി ഇടപെടല്‍ വികസന പ്രവര്‍ത്തനങ്ങളെ ബാധിക്കുന്നുവെന്നാണ് ഇവരുടെ ഹര്‍ജിയിലെ ആരോപണം. മുന്‍ ആരോഗ്യമന്ത്രി കൂടിയായ കെ.കെ. ശൈലജയും നടന്‍ കൂടിയായ മുകേഷും ഉള്‍പ്പെടെയുള്ള എംഎല്‍എമാരാണ് ഹൈക്കോടതിയെ സമീപിച്ചിരിക്കുന്നത്. ഇഡിയുടേത് അനാവശ്യ കടന്നുകയറ്റാണെന്നാണ് ഇവരുടെ പരാതി. ഈ ഹര്‍ജി വ്യാഴാഴ്ച ചീഫ് ജസ്റ്റിസിന്റെ ബെഞ്ച് പരിഗണിക്കുമെന്നാണ് വിവരം.

കിഫ്ബി സാമ്പത്തിക ഇടപാടുകളുമായി ബന്ധപ്പെട്ട് ചോദ്യം ചെയ്യലിനായി വിളിപ്പിച്ച ഇഡിക്കു മുന്നില്‍ വ്യാഴാഴ്ച ഹാജരാകില്ലെന്ന് രേഖാമൂലം മറുപടി നല്‍കിയ തോമസ് ഐസക്, ഹൈക്കോടതിയെ സമീപിച്ചത് ആശ്വാസകരമായ സാഹചര്യത്തിലാണ് ഇവരുടെ നീക്കങ്ങളും.

ഇഡി സമന്‍സുകള്‍ നിയമവിരുദ്ധമാണ്. ഇതുമായി ബന്ധപ്പെട്ട തുടര്‍നടപടികള്‍ വിലക്കണം. കിഫ്ബിയോ താനോ ചെയ്ത ഫെമ കുറ്റം എന്താണെന്നു നിര്‍വചിച്ചിട്ടില്ല. കുറ്റമെന്തെന്ന് വ്യക്തമാക്കാത്ത അന്വേഷണം ഇഡിയുടെ അധികാരപരിധിക്കു പുറത്താണെന്ന് എന്നൊക്കെയായിരുന്നു തോമസ് ഐസക് ഹര്‍ജിയില്‍ ചൂണ്ടിക്കാട്ടിയിരുന്നത്. ഇഡി നോട്ടിസ് അനുസരിച്ച് ചോദ്യം ചെയ്യലിനു ഹാജരായാല്‍ സമാനമായ നീക്കം മുഖ്യമന്ത്രിയുടെ കാര്യത്തിലും ഇഡി നടത്തുമോയെന്ന ആശങ്ക തന്നെയാണ് കെ.കെ.ശൈലജയും മുകേഷും ഉള്‍പ്പെടെ അഞ്ച് എംഎല്‍എമാര്‍ കൂടി ഇഡിക്കെതിരെ ഹര്‍ജിയുമായി ഹൈക്കോടതിയെ സമീപിക്കാന്‍ കാരണം എന്ന് പകല്‍ പോലെ വ്യക്തം.

ഈഡി പറയാതെ തന്നെ തങ്ങളുടെ നീക്കങ്ങളിലൂടെ മുഖ്യമന്ത്രി പ്രതിസന്ധിയിലാണെന്ന് വിളിച്ചു പറയുകയാണ് സിപിഎം. സ്വപ്‌നയുടെ വെളിപ്പെടുത്തലുകള്‍ പിണറായിയെ വിടാതെ വേട്ടയാടുമ്പോള്‍ കിഫ്ബിവഴിയുള്ള ഈ പണി പിണറായിക്ക് താങ്ങാനാകുന്നതിലും അപ്പുറമാണ്. എന്നാല്‍ മുഖ്യമന്ത്രിയായതുകൊണ്ടു തന്നെ പിണറായിക്ക് സംരക്ഷണ വലയം തീര്‍ക്കാന്‍ പാര്‍ട്ടി എംഎല്‍എ മാരെയും സിപിഎം കളത്തിലിറക്കുമ്പോള്‍. മറു വഴികള്‍ തേടുകയാണ് ഇഡി. മന്ത്രിമാരെ രംഗത്തിറക്കിയാല്‍ പണിയാകും എന്നതിനാലാണ് എംഎല്‍എ മാരെ ഇറക്കി സിപിഎം കളിക്കുന്നത്.