ചിങ്ങമാസത്തെ പൂജകള്‍ക്കായി ശബരിമല ക്ഷേത്രനട 16ന് വൈകിട്ട് 5ന് തുറക്കും. മേല്‍ശാന്തി എന്‍.പരമേശ്വരന്‍ നമ്പൂതിരി ക്ഷേത്രനടതുറന്ന് ദീപങ്ങള്‍ തെളിക്കും.

താഴമണ്‍ മഠത്തിലെ മുതിര്‍ന്ന തന്ത്രി കണ്ഠരര് രാജീവരര് അടുത്ത ഒരുവര്‍ഷത്തെ താന്ത്രിക ചുമതലയേല്‍ക്കും. 17നാണ് ചിങ്ങം 1. അന്ന് പുലര്‍ച്ചെ നടതുറന്ന് നിര്‍മ്മാല്യദര്‍ശനം, അഷ്ടാഭിഷേകം എന്നീ ചടങ്ങുകള്‍ പൂര്‍ത്തിയാക്കി കിഴക്കേ മണ്ഡപത്തില്‍ തന്ത്രിയുടെ കാര്‍മ്മികത്വത്തില്‍ ഗണപതിഹോമം നടക്കും.

21 വരെ ഉദയാസ്തമയപൂജ, അഷ്ടാഭിഷേകം, കലശാഭിഷേകം, കളഭാഭിഷേകം, പടിപൂജ,പുഷ്പാഭിഷേകം എന്നിവയുണ്ടാകും. ചിങ്ങം 1ന് അയ്യപ്പസന്നിധിയില്‍ ലക്ഷാര്‍ച്ചന. തന്ത്രി കണ്ഠരര് രാജീവരുടെ കാര്‍മ്മികത്വത്തില്‍ ബ്രഹ്മകലശം പൂജിക്കും. 25 ശാന്തിക്കാര്‍ കലശത്തിന് ചുറ്റും ഇരുന്നു അര്‍ച്ചന നടത്തുകയും ഉച്ചയോടെ ലക്ഷാര്‍ച്ചന പൂര്‍ത്തിയാകുകയും ചെയ്യും.


ചൈതന്യം നിറഞ്ഞ ബ്രഹ്മകലശം വാദ്യമേളങ്ങളുടെ അകമ്പടിയോടെ ശ്രീകോവിലില്‍ എത്തിച്ച് അയ്യപ്പവിഗ്രഹത്തില്‍ അഭിഷേകം ചെയ്യും. ചടങ്ങുകള്‍ പൂര്‍ത്തിയാക്കി 21ന് രാത്രി 10 മണിക്ക് ഹരിവരാസനം പാടി നട അടയ്ക്കുന്നതാണ്.

അതേസമയം ചിങ്ങമാസ പൂജാദര്‍ശനത്തിനായുള്ള ഓണ്‍ലൈന്‍ ബുക്കിംഗ് ആരംഭിച്ചിട്ടുണ്ട്. വെര്‍ച്വല്‍ ക്യൂ ബുക്ക് ചെയ്യാത്തവര്‍ക്ക് നിലയ്ക്കലില്‍ സ്പോട്ട് ബുക്കിംഗ് സൗകര്യവും ഒരുക്കിയിട്ടുണ്ട്. കെ.എസ്.ആര്‍.ടി.സി പമ്പ നിലയ്ക്കല്‍ റൂട്ടില്‍ ചെയിന്‍ സര്‍വീസ് നടത്തും. ഓണനാളുകളിലെ പൂജകള്‍ക്കായി സെപ്തംബര്‍ 6ന് വൈകിട്ട് നട തുറന്ന് 10ന് അടയ്ക്കുന്നതാണ്.