കൊടുംക്രൂരത..... കൊച്ചിയില്‍ ഇന്‍ഫോപാര്‍ക്കിന് സമീപത്തെ ഫ്‌ളാറ്റില്‍ യുവാവിനെ കൊലചെയ്ത് ഒളിപ്പിച്ചനിലയില്‍ കണ്ടെത്തി.... ഫ്‌ളാറ്റില്‍ ഒപ്പമുണ്ടായിരുന്ന സുഹൃത്തിനെ കാണാനില്ല, അവധിക്ക് വിനോദയാത്രയ്ക്ക് പോയിരുന്ന കൂടെ താമസക്കാരായ രണ്ടു പേര്‍ മടങ്ങിയെത്തിയപ്പോഴാണ് മൃതദേഹം കണ്ടത്, യുവാവിന്റെ ശരീരത്തില്‍ പലയിടത്തും മുറിവുകള്‍, സുഹൃത്തിനായി തെരച്ചില്‍ ആരംഭിച്ച് പോലീസ് .

മലപ്പുറം വണ്ടൂര്‍ അമ്പലപ്പടി സ്വദേശി സജീവ് കൃഷണയാണ് (23) കൊല്ലപ്പെട്ടത്. മൃതദേഹം ഫ്‌ളാറ്റിലെ പൈപ്പ് ഡക്ടില്‍ ഒളിപ്പിച്ച നിലയിലായിരുന്നു. ഫ്‌ളാറ്റില്‍ ഒപ്പമുണ്ടായിരുന്ന സുഹൃത്ത് കോഴിക്കോട് സ്വദേശി അര്‍ഷദിനെ കാണാനില്ല.

ഇന്‍ഫോപാര്‍ക്കിന് സമീപം ഇടച്ചിറ ഒക്‌സോണിയ ഫ്‌ളാറ്റിലാണ് സംഭവം. സജീവ് ഉള്‍പ്പെടെ അഞ്ച് പേരായിരുന്നു വാടകയ്‌ക്കെടുത്തിരുന്ന ഫ്‌ലാറ്റില്‍ താമസിച്ചിരുന്നത്. അവധിക്ക് വിനോദയാത്രയ്ക്ക് പോയിരുന്ന സഹതാമസക്കാരായ രണ്ടു പേര്‍ മടങ്ങിയെത്തിയപ്പോഴാണ് മൃതദേഹം കണ്ടത്.

രണ്ട് ദിവസത്തോളം പഴക്കമുള്ള മൃതദേഹം പുതപ്പും മറ്റും ഉപയോഗിച്ച് കെട്ടി മറച്ചനിലയിലായിരുന്നു. ശരീരത്തില്‍ പലയിടത്തും വെട്ടേറ്റ മുറിവുകളുണ്ടെന്ന് പോലീസ് പറഞ്ഞു. തിങ്കളാഴ്ച വിനോദയാത്ര കഴിഞ്ഞ് സുഹൃത്തുക്കള്‍ മടങ്ങിയെത്തിയപ്പോള്‍ ഫ്‌ളാറ്റിലെ മുറി പൂട്ടിയനിലയിലായിരുന്നു. തുടര്‍ന്നു സജീവിനെയും അര്‍ഷദിനെയും ബന്ധപ്പെടാന്‍ ശ്രമിച്ചപ്പോള്‍ സ്ഥലത്തില്ലെന്ന സന്ദേശം ഫോണില്‍ ലഭിച്ചു. തുടര്‍ന്ന് ഇവര്‍ സമീപത്തെ ഹോട്ടലില്‍ മുറിയെടുത്ത് താമസിക്കുകയായിരുന്നു.



പിന്നീട് രണ്ട് ഫോണുകളും സ്വിച്ച് ഓഫ് ഓഫായതിനെ തുടര്‍ന്ന് സംശയം തോന്നിയതോടെ ഉച്ചയോടെ ഫ്‌ളാറ്റിലെത്തി ഡ്യൂപ്ലിക്കേറ്റ് താക്കോല്‍ ഉപയോഗിച്ച് അകത്ത് കയറി. ഹാളില്‍ രക്തക്കറ കണ്ട ഇവര്‍ നടത്തിയ പരിശോധനയിലാണ് ഫ്‌ളാറ്റിലെ പൈപ്പ് ഡക്ടില്‍ തങ്ങി നില്‍ക്കുന്ന നിലയില്‍ മൃതദേഹം കണ്ടെത്തിയത്. മൃതദേഹം ഡക്ടിലൂടെ താഴേക്കിടാനുള്ള ശ്രമമായിരുന്നു എന്നാണ് കരുതുന്നത്. രക്തക്കറ കഴുകിക്കളയാന്‍ ശ്രമിച്ചിട്ടുണ്ടായിരുന്നു. തുടര്‍ന്ന് ഇരുവരും പോലീസില്‍ വിവരമറിയിച്ചു.

സജീവിനൊപ്പം താമസിച്ചിരുന്നവരേയും തൊട്ടുമുകളിലെ നിലയിലെ ഫ്‌ളാറ്റില്‍ താമസിക്കുന്ന സുഹൃത്തുക്കളെയും പൊലീസ് കസ്റ്റഡിയിലെടുത്തു. ഇന്‍ഫോപാര്‍ക്കിന് സമീപത്തുള്ള ഹോട്ടലിലെ ജീവനക്കാരനായിരുന്നു സജീവ്. മൃതദേഹം ഇന്ന് പോസ്റ്റ്‌മോര്‍ട്ടം ചെയ്യും.