പാമ്പുകടിയേറ്റ് മൂന്നു വയസുകാരി മരിച്ച സംഭവത്തില്‍ ഡോക്ടര്‍ക്കെതിരെ അന്വേഷണ റിപ്പോര്‍ട്ട്. തൃശൂര്‍ സ്വദേശി ബിനോയിയുടെ മകളാണ് മരിച്ചത്. 2021 മാര്‍ച്ചിലായിരുന്നു സംഭവം. കൊടുങ്ങല്ലൂര്‍ താലൂക്ക് ആശുപത്രിയിലെ ഡ്യൂട്ടി ഡോക്ടര്‍ക്കെതിരെയാണ് റിപ്പോര്‍ട്ട് സമര്‍പ്പിച്ചിരിക്കുന്നത്. കുട്ടിക്ക് ആന്റി സ്‌നേക് വെനം നല്‍കാതെ ചികിത്സയ്ക്കായുളള സമയം നഷ്ടപ്പെടുത്തിയെന്നാണ് വകുപ്പ് തല അന്വേഷണ റിപ്പോര്‍ട്ടില്‍ വ്യക്തമാക്കുന്നത്. കുട്ടിയുടെ മരണം സംഭവിച്ച് നാലു വര്‍ഷങ്ങള്‍ക്ക് ശേഷമാണ് റിപ്പോര്‍ട്ട് പുറത്തുവന്നത്. ഡോക്ടര്‍ക്കെതിരെ നടപടിക്ക് ശുപാര്‍ശ ചെയ്യുന്നതാണ് റിപ്പോര്‍ട്ട്.

വീട്ടുമുറ്റത്ത് കളിച്ചുക്കൊണ്ടിരിക്കുന്നതിനിടയിലാണ് കുട്ടിക്ക് പാമ്പുകടിയേറ്റത്. മുത്തശ്ശനും മുത്തശ്ശിയും മാത്രമായിരുന്നു വീട്ടിലുണ്ടായിരുന്നത്. കോക്കാച്ചി കടിച്ചെന്നാണ് കുട്ടി ഇരുവരോടും പറഞ്ഞിരുന്നത്. കൈ നീല നിറത്തിലാകുന്നത് കണ്ടതോടെയാണ് വീട്ടുകാര്‍ കുട്ടിയെ താലൂക്ക് ആശുപത്രിയില്‍ എത്തിച്ചത്. എന്നാല്‍ അടിയന്തര ചികിത്സ നല്‍കേണ്ടിയിരുന്നിടത്ത് ഓപി ടിക്കറ്റ് എടുത്ത് കാത്തുനില്‍ക്കേണ്ട സാഹചര്യമാണുണ്ടായത്. പാമ്പു കടിയേറ്റെന്ന് സംശയമുള്ളതായി വീട്ടുകാര്‍ അറിയിച്ചെങ്കിലും ഡ്യൂട്ടി ഡോക്ടര്‍ അടിയന്തര ചികിത്സ നല്‍കിയില്ലെന്നാണ് വീട്ടുകാര്‍ ആരോപിച്ചത്.

ഒടുവില്‍ ആരോഗ്യനില വഷളായതിനെ തുടര്‍ന്ന് കുട്ടിയെ സ്വകാര്യ ആശുപത്രിയിലേക്ക് കൊണ്ടുപോയെങ്കിലും വഴിമദ്ധ്യേ മരണം സംഭവിക്കുകയായിരുന്നു. ആശുപത്രിക്കെതിരെ വീട്ടുകാര്‍ രംഗത്തെത്തിയതോടെയാണ് അധികൃതര്‍ ഡിഎംഓയുടെ നേതൃത്വത്തില്‍ അന്വേഷണം നടത്താന്‍ ഉത്തരവിട്ടത്. ഈ റിപ്പോര്‍ട്ടിലാണ് ഡോക്ടര്‍ക്ക് ഗുരുതര വീഴ്ച സംഭവിച്ചതായി വ്യക്തമായത്.

ഡ്യൂട്ടി നഴ്‌സ് ഉള്‍പ്പെടെ ഡോക്ടര്‍ക്കെതിരെ മൊഴി നല്‍കിയിട്ടുണ്ട്. ആശുപത്രിയില്‍ ആന്റി സ്‌നേക് വെനം ഇല്ലെന്നായിരുന്നു ഡോക്ടര്‍ അന്വേഷണ സംഘത്തോട് പറഞ്ഞത്. എന്നാല്‍ വിവരാവകാശ നിയമപ്രകാരം വീട്ടുകാര്‍ നല്‍കിയ അപേക്ഷയില്‍ ലഭിച്ച മറുപടിയില്‍ ആശുപത്രിയില്‍ സംഭവ ദിവസം ആന്റി സ്‌നേക് വെനം സ്‌റ്റോക് ഉണ്ടെന്നും വ്യക്തമായിരുന്നു. തുടര്‍ന്നാണ് ബന്ധുക്കള്‍ നടപടി ആവശ്യപ്പെട്ട് രംഗത്തെത്തിയത്.