ചൊവ്വയിലെ രഹസ്യങ്ങള് തേടി മംഗള്യാന് യാത്ര തുടങ്ങി
ഇന്ത്യയുടെ പ്രഥമ ചൊവ്വാ പര്യവേക്ഷണ ഉപഗ്രഹമായ മംഗള്യാന് വിക്ഷേപിച്ചു. ഉച്ചകഴിഞ്ഞ് 2.38ന് ശ്രീഹരിക്കോട്ടയിലെ സതീഷ് ധവാന് ബഹിരാകാശ നിലയത്തില് നിന്നാണ് മംഗള്യാന് വിക്ഷേപിച്ചത്. പേടകത്തെ വഹിച്ചുകൊണ്ട് ഉപഗ്രഹ വിക്ഷേപണ വാഹനം പി.എസ്.എല്.വി-സി 25 കുതിച്ചുയര്ന്നു. ആദ്യഘട്ടം വിജയകരമായിരുന്നുവെന്ന് ഐ.എസ്.ആര്.ഒ വൃത്തങ്ങള് പറഞ്ഞു. 40 കോടി കിലോമീറ്റര് യാത്ര ചെയ്ത് മംഗള്യാന് 300 ദിവസം കൊണ്ട് 2104 സെപ്റ്റംബര് 24ന് ചൊവ്വയുടെ ഭ്രമണപഥത്തിലെത്തും.
1,350 കിലോഗ്രാം ഭാരമുള്ളതാണു മാഴ്സ് ഓര്ബിറ്റര് മിഷന് (എം.ഒ.എം) എന്നു പേരുള്ള മംഗള്യാന് ഉപഗ്രഹം. വിക്ഷേപണത്തിന്റെ 56.30 മണിക്കൂര് നീളുന്ന കൗണ്ട് ഡൗണ് ഞായറാഴ്ച രാവിലെ 6.08നാണു തുടങ്ങിയത്. ചൊവ്വാഗ്രഹത്തില് ജീവന്റെ സാന്നിധ്യം ഉണ്ടോയെന്ന് അന്വേഷിക്കുന്നതിനൊപ്പം ചുവന്ന ഗ്രഹത്തിന്റെ ചിത്രങ്ങള് ശേഖരിക്കുകയും കാലാവസ്ഥ വിശകലനം ചെയ്യുകയുമാണു ദൗത്യത്തിന്റെ പ്രാഥമിക ലക്ഷ്യങ്ങള്.
കഴിഞ്ഞ 28ന് നടക്കേണ്ടിയിരുന്ന മംഗള്യാന് വിക്ഷേപണം കാലാവസ്ഥാ പ്രശ്നം മൂലം മാറ്റിവയ്ക്കുകയായിരുന്നു. 1965-ല് അമേരിക്കന് പര്യവേക്ഷണ വാഹനമായ മറൈന് 4 ആണ് ആദ്യമായി ചൊവ്വയുടെ ദൃശ്യങ്ങള് ഭൂമിയിലേക്കയച്ചത്. കഴിഞ്ഞവര്ഷം ആഗസ്തില് ചൊവ്വയിലിറങ്ങിയ അമേരിക്കയുടെ ക്യൂരിയോസിറ്റി ഇപ്പോഴും പര്യവേക്ഷണം തുടരുകയാണ്. ചൊവ്വയുടെ ഭ്രമണപഥത്തിലെത്തിക്കഴിഞ്ഞാല് മംഗള്യാന് ചുരുങ്ങിയത് ആറ് മാസമെങ്കിലും അന്വേഷണം തുടരുമെന്നാണ് ഐ.എസ്.ആര്.ഒ. കണക്കുകൂട്ടുന്നത്.
പരീക്ഷണം വിജയകരമായാല് യൂറോപ്യന് യൂണിയനും അമേരിക്കയ്ക്കും റഷ്യയ്ക്കും ശേഷം ചൊവ്വയുടെ ഭ്രമണപഥത്തിലേക്ക് പര്യവേക്ഷണ വാഹനമയയ്ക്കുന്ന രാജ്യം എന്ന ചരിത്ര നേട്ടം ഇന്ത്യക്ക് സ്വന്തമാകും.
https://www.facebook.com/Malayalivartha