രാജ്യത്ത് ഇന്ധനവില വീണ്ടും കൂട്ടി. സിഎൻജിക്ക് കിലോക്ക് ഒരു രൂപയാണ് വർധിപ്പിച്ചത്. ഇതോടെ ഡൽഹിയിലെ വില 80.09 ആയി ഉയർന്നു. ഒരാഴ്ചയ്ക്കിടെ രണ്ടാം തവണയാണ് വില കൂട്ടിയത്. നോയിഡയിലും ഗാസിയാബാദിലും വില കിലോയ്ക്ക് 88.70 രൂപയും ഗുരുഗ്രാമിൽ 85.12 രൂപയുമാണ്.

മുസാഫർനഗർ, മീററ്റ്, ഷംലി എന്നിവിടങ്ങളിൽ കിലോയ്ക്ക് 88.58 രൂപയും കാൺപൂരിൽ 91.42 രൂപയും അജ്മീറിൽ 89.44 രൂപയും ബന്ദയിൽ 86.42 രൂപയും ഹാപൂരിൽ 89.70 രൂപയുമാണ് വില. ഇൻപുട്ട് ഗ്യാസ് വിലയിലെ വർധനവും യുഎസ് ഡോളറിന്റെ മൂല്യത്തിലുണ്ടായ തകർച്ചയും മൂലമുണ്ടായ ആഘാതം നികത്തുകയെന്നതാണ് വില വർധനവിന്റെ ലക്ഷ്യമെന്നാണ് വിശദീകരണമുള്ളത്.

രണ്ട് ദിവസം മുമ്പാണ് രാജ്യത്ത് പെട്രോളിനും ഡീസലിനും വിലവർധിപ്പിച്ചത്. ലിറ്ററിന് മൂന്ന് രൂപ വീതമാണ് പെട്രോളിനും ഡീസലിനും വർധിപ്പിച്ചിരുന്നത്. കൊച്ചിയിൽ പെട്രോളിന് ലിറ്ററിന് 108.74 രൂപയായി, 97.63 രൂപയാണ് കൊച്ചിയിൽ ഒരു ലിറ്റർ ഡീസലിന് നൽകേണ്ടത്.
വില വർധന പൊതുജനങ്ങളെ വലിയ രീതിയിൽ ബാധിക്കും. അവശ്യ സാധനങ്ങളുടെ വിലയും വർദ്ധിക്കുകയും ചെയ്യും.