കര്‍ണാടക നിയമസഭാ തെരഞ്ഞെടുപ്പില്‍ ബി.ജെ.പി ഏറ്റവും വലിയ ഒറ്റകക്ഷിയാകുമെന്ന് വ്യാജപ്രചരണം. അതും ബി.ബി.സിയുടെ ലോഗോയും മറ്റും ഉപയോഗിച്ച്. സംഭവം ശ്രദ്ധയില്‍പ്പെട്ടതിനെ തുടര്‍ന്ന് ബി.ബി.സി ന്യൂസ് ടിം വിശദീകരണവുമായി രംഗത്തെത്തി. കര്‍ണാടക തെരഞ്ഞെടുപ്പ് സംബന്ധിച്ച് തങ്ങളുടെ പേരില്‍ പുറത്തു വന്ന വ്യാജ സര്‍വേഫലത്തിനെതിരെ ബി ബി സി ട്വിറ്ററിലൂടെയാണ് അറിയിച്ചത്. ഇത്തരത്തിലൊരു സര്‍വേ തങ്ങള്‍ നടത്തിയിട്ടില്ലെന്നും ബി ബി സിയില്‍ നിന്നല്ല ഈ വാര്‍ത്ത പുറത്തു വന്നതെന്നും സന്ദേശത്തില്‍ വ്യക്തമാക്കുന്നു. ഇന്ത്യയിലെ തെരഞ്ഞെടുപ്പ് സംബന്ധിച്ച് ബി ബി സി സര്‍വേകള്‍ നടത്താറില്ലെന്നും ബി ബി സി ന്യൂസ് ഹെഡ് വ്യക്തമാക്കി.

തെരഞ്ഞെടുപ്പ് അടുത്തിരിക്കെ കോണ്‍ഗ്രസും ബി.ജെ.പിയും കടുത്ത വാക്‌പോരും പ്രചരണവുമാണ് നടത്തുന്നത്. രണ്ട് മാസം മുമ്പ് നടത്തിയ സര്‍വേയില്‍ കോണ്‍ഗ്രസ് വീണ്ടും അധികാരത്തില്‍ വരുമെന്ന് കണ്ടെത്തിയിരുന്നു. ഇതേ തുടര്‍ന്നാണ് ബി.ജെ.പി തെരഞ്ഞെടുപ്പില്‍ കൂടുതല്‍ ശ്രദ്ധകേന്ദ്രീകരിച്ചത്. 135 സീറ്റ് നേടി കര്‍ണാടക തെരഞ്ഞെടടുപ്പില്‍ ബി ജെ പി ഏറ്റവും വലിയ ഒറ്റക്കക്ഷി ആകുമെന്നാണ് ബി.ബി.സിയുടെ പേരിലുള്ള പ്രവചനത്തില്‍ പറയുന്നത്. പരമാവധി 90 സീറ്റുകള്‍ ബി ജെ പി നേടുമെന്നാണ് ആദ്യം പുറത്തു വന്ന മറ്റ് സര്‍വേകള്‍ പറയുന്നത്. ബി ബിസി ന്യൂസിന്റെ എംബ്‌ളമടക്കം അനധികൃതമായി ഉള്‍പ്പെടുത്തിയാണ് വ്യാജ സര്‍വേ വാര്‍ത്ത പ്രചരിക്കുന്നത്.

കര്‍ണാടകയിലെ പ്രധാന സമുദായമായ ലിംഗായത്തുകള്‍ കോണ്‍ഗ്രസുമായി അടുത്തതോടെയാണ് ബി.ജെ.പി വെട്ടിലായത്. ബി.ജെ.പി അധ്യക്ഷന്‍ അമിത്ഷായുമായി കൂടിക്കാഴ്ചയ്ക്ക് പോലും ലിംഗായത്ത് ആചാര്യന്‍ സമ്മതിച്ചില്ല. പ്രധാനമന്ത്രി നരേന്ദ്രമോദിയും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയും വാശിയേറിയ പ്രചരണ പരിപാടികളാണ് കര്‍ണാടകയില്‍ നടത്തുന്നത്. കേരളത്തില്‍ നിന്നുള്ള നേതാക്കളാണ് കോണ്‍ഗ്രസിന്റെ പ്രചരണ പ്രവര്‍ത്തനങ്ങള്‍ക്ക് ചുക്കാന്‍ പിടിക്കുന്നത്.