ഡോ. കഫീല്‍ ഖാന്‍ എന്ന ശിശുരോഗ വിദഗ്ധന് സ്വന്തം നാട് വിട്ട് പോകാന്‍ താല്‍പര്യമില്ല. താന്‍ ജനിച്ചു വളര്‍ന്ന ഗോരഖ്പുര്‍ വിട്ട് എങ്ങോട്ടുമില്ലെന്ന്് ജയില്‍മോചിതനായ ഡോക്ടര്‍ പറഞ്ഞു.ശ്വാസംകിട്ടാതെ പിഞ്ചുകുട്ടികള്‍ പിടഞ്ഞുമരിക്കുന്നത് ഒഴിവാക്കാന്‍ ശ്രമിച്ചതിന് താന്‍ എട്ടു മാസമാണ് ജയിലില്‍ കിടന്നു. ജയില്‍ മോചിതനായതിനു ശേഷം തന്നെ സീകരിക്കാന്‍ മരിച്ച കുഞ്ഞുങ്ങളുടെ രക്ഷിതാക്കളടക്കം എത്തിയതോടെ ലഭിച്ച മാനസിക ധൈര്യം പറഞ്ഞറിയിക്കാനാവുന്നില്ലെന്നും അദ്ദേഹം പറഞ്ഞു. 

കേസുകളില്‍ ഒന്നില്‍പോലും തെളിവ് ഹാജരാക്കാന്‍ സര്‍ക്കാറിനായില്ല. കേരളമടക്കം രാജ്യത്തിന്റെ പലഭാഗത്തുനിന്നും വിദേശങ്ങളില്‍നിന്നും പിന്തുണ ലഭിച്ചു. എന്നാല്‍, ഗോരഖ്പുര്‍ വിട്ട് എങ്ങോട്ടും പോകുന്നില്ല. സസ്‌പെന്‍ഷന്‍ പിന്‍വലിക്കുമെന്നാണ് കരുതുന്നത്. ഇല്ലെങ്കില്‍ ഗോരഖ്പുരില്‍ എല്ലാ സൗകര്യവുമുള്ള ആശുപത്രി സ്ഥാപിച്ച് ആളുകള്‍ക്ക് സൗജന്യ ചികിത്സ നല്‍കാനാണ് ഉദ്ദേശിക്കുന്നതെന്നും അദ്ദേഹം വ്യക്തമാക്കി.

180 പേര്‍ താമസിക്കുന്ന ചെറിയ ഹാളില്‍ ഒരു ശുചിമുറി മാത്രമാണ് ഉണ്ടായിരുന്നത്. ജയിലില്‍ കൂടെയുള്ളവര്‍ എപ്പോഴും പറയുമായിരുന്നു ഡോക്ടര്‍ സാബ് തെറ്റുചെയ്തിട്ടില്ലെന്ന്.ആഗസ്റ്റ് 10ന് ഓക്‌സിജന്‍ തീര്‍ന്നതോടെ എല്ലാ വഴികളും തേടിയിരുന്നു. എന്നാല്‍, ആശുപത്രിയില്‍ യു.പി മുഖ്യമന്ത്രി യോഗി ആദിത്യനാഥ് എത്തിയതോടെ അവസ്ഥയാകെ മാറി.

താന്‍ ഹീറോയാകുകയാണെന്നും കാണിച്ചുതരാമെന്നും ഭീഷണിപ്പെടുത്തി. ബി.ജെ.പി വക്താക്കള്‍ താന്‍ കള്ളനാണെന്നും പ്രചരിപ്പിച്ചു.ഓക്‌സിജന്‍ വിതരണത്തില്‍ തടസം നേരിട്ടതിനെ തുടര്‍ന്നാണ് ബിജെപി ഭരിക്കുന്ന സംസ്ഥാനമായ ഉത്തര്‍പ്രദേശില്‍ 48 മണിക്കൂറിനുളളില്‍ 30 പിഞ്ചുകുട്ടികള്‍ ഒന്നൊന്നായി മരണമടഞ്ഞത്. ആറുദിവസത്തിനിടെ ശ്വാസംകിട്ടാതെ ആശുപത്രിയില്‍ പിടഞ്ഞുമരിച്ചത് 72 കുഞ്ഞുങ്ങളാണ്.

ഇതില്‍ 17 നവജാത ശിശുക്കളുമുണ്ട്. ഓക്‌സിജന്‍ വിതരണവുമായി ബന്ധപ്പെട്ട് ആശുപത്രി അധികൃതരും വിതരണകമ്പനിയും എഴുതിയ കത്തുകളും ഇന്നലെ പുറത്തുവന്നിരുന്നു.